हैदराबाद, ०६ मार्च, २०१७. मैथिली जिन्दाबाद!!
मिथिला सांस्कृतिक परिषद् एवम् मिथिला मंथन केर संयुक्त आयोजन मे सुगौली संधिक २०१म वार्षिक दिवस ४ मार्च, २०१७ केँ हैदराबाद मे विभिन्न आयोजनक संग स्मृति मे आनल गेल। संस्थापक बीके कर्ण द्वारा पूर्व घोषणा अनुरूप आजुक दिवस समस्त मिथिलावासी १-दिना उपवास राखि एकटा अत्यन्त दुःखक दिन केर रूप मे स्मृति मे रखबाक कार्य करैथ से एतहु पूरा कएल गेल। उपवासक संग-संग अन्यान्य आयोजन एहि दिवसक खासियत रहल।
श्री कर्ण द्वारा अपडेट कएल गेल जनतब मुताबिक सुगौली संधि सँ मिथिला विभाजनक २०१ वर्ष (मार्च ४, १८१६ – मार्च ४, २०१७) पर
१) एक दिन केर उपवास
२) “जय मिथिला, जय जय मिथिला” पर गोष्ठी
३) गोष्ठी उपरांत मिथिलाक प्रिय भोजन चूड़ा-दही चीनी अचार सँ उपवास पूरा
ई समस्त कार्यक्रम सैकड़ों महिला एवम् सज्जनवृन्द मिथिलावासीक संग सफलतापूर्वक सम्पन्न भेल।
एहि अवसरपर बहुत रास विषयपर मंथन कएल जेबाक बात सेहो श्री कर्ण अपन अपडेट्स मार्फत जनौलनि अछि। ओ कहलैन अछि जे विशेषरूप सँ सुगौली संधिक प्रभाव पर चर्चा कएल गेल जाहि मे ९ मुख्य मुद्दा पर वक्ता लोकनि विचार रखलैन। ओ ९ विन्दु एना छलः
१) विभाजनक वेदना और उपवास : मन शांति, क्षेत्र शांति, जे जतय रहय प्रसन्न रहय, विकास करय, मिथिलाक सांस्कृतिक विभाजन नहि भेल अछि, आब आरो कोनो तरहक विभाजन केँ स्वीकार नहि कएल जा सकत।
२) मार्च ०४ केँ हरेक वर्ष उपवास, हरेक मैथिल अपने-आप राखथि – स्वेच्छा सँ, ई आह्वान कएल गेल।
३) मैथिल केर अपन विशिष्ट पहिचान केँ स्थापना करबाक लेल विभिन्न आयोजन – कार्यक्रम सब होएत रहबाक चाही।
४) मिथिला ब्रांड केँ लोकप्रिय करब – हर स्तर पर निजता केँ प्रवर्धन करबाक प्रण।
५) आवासी – प्रवासी मैथिल जनमानसक बीच निरंतर सेमिनार और ओकर प्रभाव केर आकलन होएत रहबाक जरुरी पर प्रकाश देल गेल।
६) फोन पर Hello कहबाक बदला मे मैथिल सभक बीच “जय मिथिला” सँ बातचीत शुरू हो, प्रतिउत्तर मे – “जय जय मिथिला” बाजल जाय जाहि सँ अपन निजता प्रति आत्मगौरवक बोध बढत।
७) सुगौली संधि केर संग मिथिलाक इतिहासक बारे मे टेक्स्ट बुक मे स्थान हो, भारत सरकार सँ आग्रह।
८) मिथिलाक प्रवासी जो जाहि क्षेत्रक विशेषज्ञ छथि, मिथिला क्षेत्र लेल हुनका सँ ओहि क्षेत्र मे सहयोग केर अपेक्षा।
९) चुड़ा दही चीनी भोजन मिथिलाक विशेष भोजन थिक, एकर मिथिलाक बाहरो प्रचार-प्रसार कएल जेबाक चाही। आजुक फास्ट फूड संस्कृति मे एकर लोकप्रियता आ महत्व अलगे अछि, एहि विन्दुपर जन-जन धरि मिथिलाक फास्ट फूड – चुड़ा-दही-चीनी-अँचारक प्रचार कएल जेबाक चाही।
एहि ९ विन्दुपर चर्चा आ कार्ययोजनाक अतिरिक्त मैथिली ठाकुर जे कलर्स टीवी पर चलि रहल राइजिंग स्टार पर ११ मार्च केँ लाइव पर्फोर्म करती हुनका लेल वोट देबाक अपील कएल गेल, ओ मिथिलाक गर्व थिकीह, से निर्णय सब कियो एकजुट स्वर मे लेलनि।
