जनकपुर मे सेहो साहित्यिक कार्यक्रम ‘साँझक चौपाड़ि पर’

मिथिलाक राजधानी जनकपुरधाम मे काल्हि (शनि) दिन तेसर साहित्यिक चौपाडि सम्पन्न भेल अछि । युवा साहित्यकार बिन्देश्वर ठाकुरक संयोजकत्व आ स्थानीय नवतुरिया सर्जकक सहभागिता मे जनकपुरक बाबा भुतनाथ मंन्दिरक प्राङ्गणमे ई साहित्यिक आयोजन सफलतापुर्वक सम्पन्न भेल अछि।

“अहाँ मानु या नै मानू गज्जब भऽ गेलै.. देखिते सुरत अहाँके गजल भ’ गेलै” गजलक ई पाँति सुनैत समुच्चा सहभागी सभ ताली केर गडगडाहट सं वातावरण केँ रोमाञ्चित बना देलखिन। तहिना शत्रुघन मुखिया जे प्रवास मे रहि कामकाज करितो मैथिली मे निरन्तर लेख-रचना सब लिखैत रहैत छथि, हुनका द्वारा सेहो नीक सृजनात्मक रचना सब राखल गेल छल। हुनकर वाचन शैली सबगोटे केँ झुमा देने छ्ल। एस. के. मैथिल जी सेहो अपन रचना आ वाचनशैली सँ सबहक मोन केँ छूबा मे सफला भेलाह। एकटा फराक प्रसंगमे ओ कहलैन जे जनकपुर मे नवतुरिया सभ केँ आगाँ नहि आबय देबय मे अग्रज सर्जक आर साहित्य मे ख्यातिप्राप्त लोकनिक विभेदकारी मानसिकता मूल कारकतत्व थीक। ओ कहलैन – “जे अपना केँ नामी साहित्यिक हस्तीक रुपमे चिन्हबैत छथि आर ओ ई चाहैत छथि जे नवतुरिया सब सेहो आगू बढैथि तऽ हुनका सब केँ अपन व्यवहार मे उदारता प्रस्तुत करय पड़तनि।”