बहुप्रतिभासंपन्न मैथिली भाषा-कला अभियानी किसलय कृष्ण केर भेल काशी मे सम्मान

बनारस, गौतम कुमार झा । जुलाई ७, २०१५. मैथिली जिन्दाबाद!!

आइ महासचिव भोगेन्द्र झा केर आवास पर मैथिल समाज बनारसक सम्मान सभा आ विचार गोष्ठी आयोजित भेल । एहि अवसर पर मुख्य अतिथि छलाह मैथिली सिनेमाकर्मी आ प्रसिद्ध मंच उद्घोषक किसलय कृष्ण । ई गोष्ठी किसलय जीक सम्मानमे राखल गेल छल । आचार्य दिनेश पाण्डेयक मंगलाचरण सँ आरम्भ गोष्ठीमे सर्वप्रथम महासचिव भोगेन्द्र झा आ देवेन्द्र कुमार ठाकुर (स्टेट बैंक अधिकारी) द्वारा दोपटा, माला आ प्रतीक चिन्ह सँ सम्मानित कयल गेलनि तकर बाद मैथिल समाजक अध्यक्ष अधिवक्ता निरसन कुमार झा स्वागत मन्तव्य रखलनि । पुन: समाजक बुजुर्ग सुधीर संग्रामी संस्थाक गतिविधि पर प्रकाश देलनि । अपन वक्तव्य रखैत युवा संस्कृतिकर्मी किसलय कृष्ण मैथिली संस्था सभक मध्य व्याप्त संवादहीनता केँ तोड़बा पर बल दैत कैक महत्वपूर्ण प्रसंग काशी आ मिथिला केँ जोड़ैत सुनेलनि आ सभके विभोर क देलनि ।

उपस्थित मीडियाः कर्मी सभक एक प्रश्नक उत्तरमे श्री किसलय कहलनि जे ई प्रधानमंत्री जीक संसदीय क्षेत्र थीक आ हुनका विश्वनाथ मंदिर परिसर स्थित मिथिलाक महान दार्शनिक मंडन मिश्रक प्रतिमा आ मकानक जीर्णोद्धार करबाक चाही । संगहि बीएचयू मे पुन: मैथिली विभाग स्थापना हेतु संस्था सँ पत्राचार करबाक आग्रह केलनि संगहि सभ तरहक रचनात्मक सहयोगक वचन सेहो देलनि । एहि अवसर पर बीएचयू केर भाषाविज्ञान विभागमे मैथिलीक फेलो पंकज कुमार, संजय झा फिल्मकर्मी नितेश भारद्वाज सहित कतेको वक्ता अपन विचार रखलनि । जलपान संग गोष्ठी केर समापन भेल ।