मैथिली कथा गोष्ठीक आयोजन आइ २ बजे सँ दरभंगा मेः संयोजक अशोक मेहता

1. कथा पर केन्द्रित त्रैमासिक आयोजन होइक। ई *कथा गोष्ठी* क नाम सँ जानल जायत।

2. एकर पहिल आयोजन दरभंगा मे डॉ. अशोक कुमार मेहता जीक संयोजन मे *8 सितंबर 2018* (दोसर शनि) केँ होयत। (पहिल आयोजन लेल प्रस्ताव डॉ. महेन्द्र नारायण राम जी खुटौना लेल, प्रदीप बिहारी जी बेगूसराय लेल आ अजित आज़ाद मधुबनी लेल सेहो देने छलाह। मुदा दरभंगा स्वीकृत भेल।)

3. ई कथा गोष्ठी दिनक *2 बजे सँ रातिक 12 बजे* तक होयत।

4. कथा गोष्ठी मे युवा आ सर्वथा नव कथाकार लोकनि केँ प्राथमिकता देल जायत। मुदा नव कथाकार लोकनि सँ इहो आग्रह रहत जे गोष्ठी मे कथा पाठ करबा सँ पूर्व विज्ञ लोकनि सँ अपना स्तर सँ एक बेर अवश्य परामर्श क’ लैथि।

5. दीर्घ कथाक पाठ लेल अनुमति नहि देल जायत। एक कथा लेल अधिकतम 10 मिनट सँ 12 मिनट समय आवंटित रहत।

6. प्रत्येक कथा पर विमर्श होयत।

7. लेखकीय मर्यादाक अनुपालन करबाक बाध्यता अनिवार्य रूप सँ रहत।

8. कथा गोष्ठीक अंत मे सर्वसम्मति सँ अगिला गोष्ठीक संयोजक आ स्थान निर्धारित कएल जायत। संयोजक वैह हेताह जे उक्त गोष्ठी मे उपस्थित रहता।

9. गोष्ठी लेल दोसर अथवा चारिम शनि केँ प्राथमिकता देल जायत।

10. गोष्ठी मे भाग लेनिहार लेल ई आवश्यक जे ओ लोकनि संयोजक केँ अपन आगमनक पूर्व सूचना अवश्य देथि। संगहि अपन कथाक एक प्रति कथा-पाठ सँ पूर्व संचालक लग जमा क’ देथि।

11. दिनुका भोजन एवं रातुक भोजन सहित विश्रामक व्यवस्था संयोजक दिस सँ रहत। मार्ग-व्यय आदि नहि देल जायत।

12. पुस्तक अथवा पत्र-पत्रिकादिक लोकार्पण गोष्ठीक आरम्भ मे होयत।

13. गोष्ठीक समापनक उपरांत रात्रि-भोजन होयत। एकर बाद विश्राम मुदा सहमतिक आधार पर अनौपचारिक रूप सँ गीत-ग़ज़ल, कविता, कथा आदिक गायन-वाचन भ’ सकैत अछि, बशर्ते कि किनको व्यवधान नहि होइन्ह।

14. एहि बेरक संयोजक डॉ. अशोक कुमार मेहता जी छथि। हुनक मोबाइल नम्बर अछि 94 30 827941.

कृपया एहि विचार केँ अपन सहमति दैत हमरा लोकनिक हकार स्वीकार करी।