लेख विचार
प्रेषित: कीर्ति नारायण झा
श्रोत: दहेज मुक्त मिथिला समूह
लेखनी के धार ,बृहस्पतिवार साप्ताहिक गतिविधि
विषय :- पावनि -तिहार आ स्त्री
मैथिल संस्कृति आ मिथिलाक परंपरा में स्त्रीगण आ पावनि-तिहार एक दोसर के पूरक मानल जाइत छैथि । जँ मिथिलाक पावनि-तिहार केँ एकटा सुसज्जित देह मानल जाए, तँ ओकर प्राण ओहि घरक स्त्रीगण छैथि। बिना स्त्रीक कोनो पावनि के कल्पना करब मिथिला में असम्भव अछि।
मिथिलाक संस्कृति मे स्त्री केवल पावनि मनावय वाली पात्र नहि, अपितु ओकर सृजनहार छैथि। चाहे ओ मधुश्रावणी होइ, जितिया होइ, वा सामा-चकेबा, एकर विधि-विधान आ कथाक परंपरा पीढ़ी-दर-पीढ़ी स्त्रिए द्वारा जीवित राखल गेल अछि। पावनि-तिहारक माध्यम सँ स्त्रीगण अपन लोक-परंपरा आ संस्कारक संरक्षण करैत छैथि।
कोनो पावनि में अरिपन के बिना पूजा सम्पूर्ण नहिं मानल जाइत अछि। पिठार सँ आँगन-दुआरि पर पारल गेल सुंदर अरिपन स्त्रीक कलात्मकताक परिचायक अछि। कोहबर सँ ल’क’ भित्त चित्र धरि, मिथिलाक कला केँ विश्व स्तर पर पहचानि स्त्रीगण अपन श्रद्धा आ पावनिक भक्ति सँ देलनि अछि।
मिथिलाक पावनि कठोर नियम आ निष्ठा लेल जानल जाइत अछि। छठि क’ दू दिनक निर्जला व्रत होइक वा जितिया क’ कठिन साधना, स्त्रीगण अपन परिवारक सुख-समृद्धि आ संतानक दीर्घायु लेल ई कष्ट सहर्ष स्वीकार करैत छैथि। ई त्याग ई दर्शाबैत अछि जे स्त्री आ पावनि एक-दोसरक पूरक छैथि, कियेक तऽ ओतय भक्ति में “शक्ति” क’ समावेश होइत अछि।
पावनि-तिहारक असली रौनक़ घरक भन्सा घर सँ शुरू होइत अछि। पिरिकिया , ठकुआ, पकमान, आ तरुआ क’ जे सुगंध पावनि मे आबैत अछि, ओ स्त्रीक ममता आ कुशलताक फल अछि। हुनका हाथक स्वाद पावनिक उमंग केँ दोगुना क’ दैत अछि ।
बिना गोसाउनि गीत वा लोकगीतक मिथिलाक पावनि सुन्न अछि। पूजाक समय सामूहिक रूप सँ गीत गाइब क’ स्त्रीगण जे वातावरण बनाबैत छैथि, ओ कोनो आध्यात्मिक साधना सँ कम नहि अछि। ई गीत ने मात्र भक्ति अछि, बल्कि समाज केँ जोड़वाक एकटा सशक्त माध्यम सेहो अछि।
संक्षेप में कहल जा सकैत अछि जे मिथिला में पावनि-तिहार मात्र तिथि-नक्षत्रक खेल नहि अछि, अपितु ई धैर्य,स्त्रीक कला, प्रेम, आ श्रद्धा क’ उत्सव अछि। स्त्रीगणक सक्रियता आ उमंग सं पावनि जीवंत होइत अछि, आ पावनि-तिहार सँ स्त्रीक सामाजिक आ आध्यात्मिक गरिमा बढ़ैत अछि।
यथार्थ मे, स्त्री छैथि त’ संस्कृति अछि, आ संस्कृति अछि त’ पावनि अछि।
