नई दिल्ली, २५ जून, २०१७. मैथिली जिन्दाबाद!!
साभार न्युज १८ अंग्रेजी वर्सन
१०० सँ अधिक लोक केर जैरकय मृत्यु आ दर्जनों लोक गंभीर रूप सँ घायल होयबाक अत्यन्त दुखद समाचार पाकिस्तान केर मीडिया द्वारा देल गेल अछि। ई घटना एकटा तेल टैंकर केर बहावलपुर सिटी नजदीक एक हाईवे पर पहिने पलटब आर फेर ओहि मे विस्फोट भेला सँ घटल कहल गेल अछि।
The News International कहलक अछि जे एकटा तेल टैंकर अहमदपुर शरकिया क्षेत्र मे सड़क पर घसड़ाएत पलटी खा गेल, ई देखि नजदीक गामक लोक सब टैंकर सँ चूअल तेल संग्रह करबाक उद्देश्य सँ ओतय जमा भेल छल। किछुए समय मे पलटी खायल टैंकर मे आगि लाइग गेल आर बहुत तेज आवाज संग विस्फोट भेलाक बाद ओतय जमा लोक मध्य करीब १२३ लोक केर जान लय लेलक, रिपोर्ट मे कहल गेल अछि।
कम सँ कम ७५ लोक गम्भीर रूप सँ घायल भेल अछि जेकरा नजदीकक अस्पताल मे भर्ती करायल गेलैक अछि। मृतकक संख्या मे भारी वृद्धिक आशंका सेहो जतायल गेल अछि कारण बेसी घायल लोक केर अवस्था अत्यन्त गम्भीर कहल जा रहल छैक।
डा. रिजवान नसीर, पंजाब प्रान्तक बचाव सेवाक डायरेक्टर कहलैन अछि जे वीभत्स रूप सँ जरल मृत मानव शरीर जे भेटल अछि ताहि मे सँ अधिकांश केर पहिचान तक करब मोस्किल अछि।
पाकिस्तानी सेना कहलक अछि जे हेलिकोप्टर पठाकय घायल सब केँ बेहतर इलाजक प्रबन्ध कएल जा रहल अछि, सब अस्पताल केँ हाई एलर्ट पर राखल गेल छैक।
पाकिस्तान मे सड़कक खराब स्थिति, खराब हालतक गाड़ी आर लापरवाह चालकक बेपरवाह गाड़ी चलेबाक कारण सड़क दुर्घटनाक बहुत खराब आ बदनाम रेकर्ड अछि।
कम सँ कम ६२ लोक जाहि मे महिला तथा बच्चा सेहो शामिल छल एक एहने दुर्घटना जे दक्षिणी पाकिस्तान मे २०१५ मे तखन घटल छल जखन एकटा बस आ तेल टंकी मे टक्कर भेल छल, ओहू मे अहिना तेज आवाज संग आगि लागब आ लोक केर जिन्दे जरबाक घटना घटल छल जाहि मे मृतक केँ चिन्हनाय तक मोस्किल भेल छल।
