राइजिंग स्टार ग्रान्ड फिनाले मे भेल विवादास्पद निर्णय पर कएल जायत कोर्ट मे केसः अशोक झा

मैथिली ठाकुर केर पिता या मैथिली ठाकुर एहि लेल कोनो तरहक सहमति नहि देता जे निर्णय पर सवाल ठाढ कएल जाय। ओ बेचारी त हँसिते रहल, ओकरा कियो पूछियो नहि रहल छलैक अन्त मे, मुदा ओ बिल्कुल जानकीक रूप रखनिहाइर साक्षात् जानकियेक भूमिका करैत मात्र विजेता बैनिट केर तरफ सँ उचित सान्त्वना पेलक। बाकी त सब किछु ततेक चटपट भेल जे सब देखबे केलहुँ। अन्त मे जल्दी सँ बन्द नहि कएल जइतय प्रोग्राम त कतेको टेलिविजन फूटैत आ कतेको आक्रोशित लोक विरोध मे किछु कय सकैत छल। हम दाबाक संग कहि सकैत छी जे ई ‘अन्याय’ आ ‘जुर्म’ केर वर्ग मे कएल गेल अछि। एहि विन्दुपर सिलसिलेवार विश्लेषण स्पष्ट करैत अछि जे मैच फिक्स्ड छल। विशेषज्ञ महेश भट्ट केर तर्क सँ सहमत छी जे ई सब शो पूर्वे मे फिक्स्ड भऽ जाएत अछि। कतय मैथिलीक सुन्दर-सुमधुर शास्त्रीय गीत, कतय पंजाबी भांगड़ा! आह! बेईमानीक पराकाष्ठा त ६१% वोट पर क्लोजिंग आर फेर अचानक सिस्टम मे गड़बड़ी…. ई सब चोरक दाढी मे तिनकावला बात आ बड पैघ धांधलीक संकेत कय रहल अछि।

एहि दिशा मे तुरन्त जाँच बैसेबाक मांग सेहो करय पड़त रिट याचिका मे आर कोर्ट सँ कलर्स टीवी केँ ई निर्देशन दियाबय पड़त जे ओ सब प्रक्रिया कोर्ट मे प्रमाण सहित राखय। आर, विवादित निर्णय केँ कोर्ट केर फैसला धरि स्टे लगायल जाय तुरन्त। बाद मे कोर्ट के निर्णय भेला उपरान्त ग्रान्ड फिनाले केर शो केँ रिवाइज कएल जाय।

आर, एक बात! हर हाल मे अशोक बाबूक ई फैसला पर उचित कार्रबाई हो से कामना करैत छी। फेसबुकिया भभाड़ा त बहुते पढलहुँ, मुदा एक सही आ ठोस व्यक्तिक ई घोषणा पढि हम एहि पक्ष मे छी जे तुरन्त रिट पेटिशन दायर कएल जाय। There is a sustainable question, time given for voting and random counts of vote added to cross the score of Maithili – public the whole thing or accept the dishonesty and revise the decision.

हरिः हरः!!