सुभाषचन्द्र झा, सहरसा। फरबरी २६, २०१७. मैथिली जिन्दाबाद!!
कोशी क्षेत्रक धार्मिक पौराणिक एवं ऐतिहासिक विरासत के अक्षुण्ण रखबा के लेल कतेको वर्ष स कोशी महोत्सव केर आयोजन जिला मुख्यालय में कयल जाइत रहल अछि । पूर्वहि जेकाँ एहि साल कोशी महोत्सवक तैयारीक लेल आयोजित पहिल बैठक में महोत्सव केर आयोजनक तिथि केर घोषणा कयल गेल ।
स्थानीय विकास भवन सभागार में जिला पदाधिकारी बिनोद सिंह गुंजियालक अध्यक्षता में कोसी महोत्सव 2017 केर सफल आयोजन हेतु बैठक आयोजित भेल । जिलाधिकारी कहलनि जे कोशी वासी केर सहयोग स काफी धूमधाम स सब साल कोशी महोत्सव मनायल जाइछ । कोसी महोत्सव केर आयोजन 24 एवं 25 मार्च 2017 केँ निर्धारित कयल गेल अछि । सर्वसम्मति स कोशी महोत्सव आयोजन केर तिथि 24 एवं 25 मार्च 2017 केँ निर्धारित कयल गेल ।
महोत्सव केर उद्घाटन संध्या समय में करबाक निर्णय लेल गेल । शहर केर गणमान्य व्यक्ति द्वारा सुझाव देल गेल कि एहि वर्ष नामचीन कलाकारक संग-संग कोशी के स्थानीय कलाकार के सम्मिलित कयल जायत । कोशी महोत्सव 2017 केर अवसर पर स्मारिका सह सचित्र विवरणिका प्रकाशन के सेहो निर्णय लेल गेल। जाहि में आलेखक साथ-साथ पुरातात्विक, धार्मिक एवं पर्यटन स्थलक सचित्र विवरण प्रकाशित कयल जायत ।
