शहीद संजीब कुमार केँ मुखाग्नि चारि मासक दूधमुंहाँ पुत्रक हाथे

जम्मू कश्मीर केर राजौरी अन्तगर्त नौशहरा सेक्टर मे सीमा पर तैनात सेनाक जवान संजीव कुमार केँ सोम दिन दुपहर मे हुनक पैतृक गांव सिमरी बख्तियारपुर प्रखंड स्थित धोधसम पंचायत केर तिलाठी मे भरल आँखि सँ पूरा राजकीय सम्मानक संग अंतिम संस्कार कय देल गेलनि।

जखनहि हिन्दू विध-विधानक अनुसार लाश केँ अछिया पर चढायल गेल आर शहीद जवान संजीब कुमार केँ हुनक चारि मासक दूधमुंहाँ पुत्र अपन माय आशा देवीक कोरेसँ पिताक मुंह मे आगि देबाक विध पूरा केलक कि वातावरण मे कन्नारोहटक माहौल बनि गेल। एहि सँ पूर्व सोम दिन भोरे तिरंगा मे लपेटल जवानक पार्थिव शरीर केँ सेनाक वाहन मे तिलाठी गांव स्थित हुनक घरपर आनल गेल छल। एहि बीच अपन गामक संग-संग आसपासक क्षेत्र सँ भारी संख्या मे लोक सब आबिकय शहीद जवान केँ श्रद्धांजलि अर्पित कएलनि। वीर शहीद संजीव अमर रहैथ, जाबत सुरज चांद रहत, संजीव अहाँक नाम रहत आदि नारा सँ वातावरण गुंजायमान रहल। शहीद संजीव केँ सेनाक तरफ सँ बंदूक केर सलामी दैत अन्त्येष्टि क्रिया पूरा कएल गेल।

एहि अवसरपर जिला अधिकारी विनोद सिंह गुंजियाल, एसपी अश्विनी कुमार, एसडीओ सुमन प्रसाद साह, डीएसपी अजय नारायण यादव सहित विभिन्न थानाक पूलिस उपस्थित छलाह। ग्रामीण द्वारा बेर-बेर शहीद संजीव अमर रहे और भारत माता की जय केर नारा लगायल जाएत रहल।

संजीवक परिवार और ग्रामीण कहलनि जे यैह बितलहबा छठि पूजा मे संजीव अपन घर आयल छलाह और फेर जल्दिये वापस एबाक बात कहिकय गेल छलाह…. लेकिन के जानैत छल जे एहि बेर ओ एना तिरंगा मे शहीद भेलाक बाद लौटता।

संजीव ६३ आर आर बिहार रेजिमेंट बटालियन केर जवान छलाह और एलओसी पर तैनात छलाह। कहल जाएत अछि जे संजीव २०११ मे सेना मे भर्ती भेल छलाह। बटालियन हेडक्वार्टर कटिहार सँ पहुंचल एडम कर्नल स्टेशन हेड क्वार्टर सतीश दीक्षित कहलैन जे सेना सदैव संजीवक कुर्बानीक ऋणी रहत और सेना संजीव केर परिवार केर वास्ते सदिखन तत्परता संग हाजिर रहत। शहीद संजीवक अंतिम संस्कार मे राजनीतिक नेतृत्वकर्ता, समाजसेवी आर अभियानी लोकनिक सेहो नीक भीड़ लागल छल। श्रद्धाञ्जलि देनिहार मुख्य राजनीतिक चेहरा मे नीरज कुमार बबलू, रितेश रंजन, संजीव झा, ओम प्रकाश नारायण, अरविंद सिंह, शैलेन्द्र शेखर आदि मौजूद देखेलाह।

एहि सँ पहिने भोरे पुलिस लाईन सहरसा मे राजकीय सम्मान केर संग श्रद्धांजलि देल गेल छल। छह भाइ-बहिन मे सबसँ जेठ संजीव केँ श्रंद्धाजलि देनिहार भाजपा विधायक नीरज कुमार बबलू, पूर्व विधायक संजीव कुमार झा, पूर्व विधायक सुरेन्द्र यादव, जिला पर्षद अध्यक्ष अड़हुल देवी, उपाध्यक्ष छत्री यादव, पूर्व जिप उपाध्यक्ष रितेश रंजन, भाजपा नेता नीरज गुप्ता, अरविन्द सिंह, डीएम विनोद सिंह गुंजियाल, एसपी अश्वनी कुमार मौजूद रहैथ।

विदित हो जे जम्मू कश्मीर केर पाकिस्तान सीमा सँ सटल राजौरी केर नौशेरा सेक्टर मे सीमा पर तैनात जवान संजीव कुमार केँ करंट लगला सँ मृत्यु भेल रहनि। प्राप्त जानकारी मुताबिक, सिपाही संजीव कुमार नौशेरा सेक्टर मे सीमाक सुरक्षा वास्ते तैयार छलाह। ताहि समय हुनका करंट लागल छलन्हि, जाहि सँ ओ गंभीर रूप सँ घायल भऽ गेल छलाह। ओहिठाम नजदीक मे रहल अन्य जवान हुनका सैनिक अस्पताल मे इलाज वास्ते लऽ गेल, ताहि समय ओ दम तोड़ि देलनि। एहि संबंध मे सेना अपना स्तर पर जांच शुरू सेहो कय रहल अछि। शव केँ ओतुके उप-जिला अस्पताल मे पोस्टमार्टम कराकय संबंधित यूनिट केर अधिकारीक हस्तान्तरण कय देल गेल छल जतय सँ काल्हि भोरे हुनकर पार्थिव शरीर गाम पठायल गेल छल।

मैथिली जिन्दाबाद शहीद संजीव कुमार केँ श्रद्धाञ्जलि दैत अछि!