विशाखापटनम, दिसम्बर २५, २०१६. मैथिली जिन्दाबाद!!
आइ दिनांक २५ दिसम्बर, मिथिला साँस्कृतिक परिषद् विशाखापत्तनम् केर तत्वावधान में मैथिली सम्मेलन केर आयोजन कएल गेल जाहि में शहर केर विभिन्न क्षेत्र सं करीब १५०० मैथिलगण भाग लेलनि ।
स्थानीय विधायक श्री पल्ला श्रीनिवास द्वारा दीप प्रज्वलन एवं महाकवि विद्यापति केँ श्रद्धा-पुष्प अर्पित केलाक बाद मिथिलाक प्रसिद्ध भगवती वंदना जय जय भैरविक गायन संग कार्यक्रमक शुभारंभ भेल ।
परिषद्क महासचिव काली कान्त झा द्वारा स्वागत भाषणक उपरान्त अध्यक्ष बैकुन्ठ झा परिषद केर उद्देश्य आ गतिविधिक बारे में उपस्थित समुदाय केँ विस्तृत जानकारी देलन्हि । मुख्य अतिथि पी. श्रीनिवास कार्यक्रम केर बहुत प्रशंसा केलन्हि आ भविष्य मे हर संभव सहायता करबाक आश्वासन देलन्हि ।
साँस्कृतिक कार्यक्रम केर आयोजन परिषदक साँस्कृतिक सचिव गिरिजा नन्द मिश्र व कल्याणी मिश्राक निर्देशन मे बहुत प्रसंशनीय रहल एवं जुही मंच संचालनक कार्य बखुबी निभौलनि । मैथिलक स्वादानुसार सामूहिक प्रीतभोज केर आनन्द सेहो अपूर्व छल । परिषदक संस्थापक व संरक्षक वाई. के. चौधरी संस्थाक वर्तमान परिस्थितिक बहुत सराहना केलन्हि आर संतोष प्रकट केलनि ।
उपाध्यक्ष प्रफूल्ल नारायण चौधरी, कोषाध्यक्ष राजदेव मंडल, संयुक्त सचिव अरुण झा, भूषण सिंह, वरिष्ठ सदस्य अशोक मिश्रा, मनोज झा, पी के मिश्र द्वारा अतिथिगण कें मिथिलाक पारंपरिक व प्रतीक वस्त्र पाग- दोपटा सँ सम्मानित कएल गेल ।
एहि अवसर पर परिषदक पवन झा, अनिल झा, प्रकाश मंडल, मोहन झा, राजेश मंडल, जितेन्द्र मिश्र एवं सब सक्रिय सदस्यगण सेहो उपस्थित छलाह ।
