दरभंगा, नवम्बर ३, २०१६. मैथिली जिन्दाबाद!!
मिथिला राज्य निर्माण सेनाक राष्ट्रीय अधिवेशनक समय जेना-जेना नजदीक आबि रहल अछि तेना-तेना ई अभियान गाम-गाम रथ घुमाकय आ शहर आदि मे होर्डिंग बोर्ड लगाकय लोक सब केँ अपन स्वराज्य मिथिला राज्य लेल कसगर जुटानीक जोरदार अपील करय लागल अछि।
पैछला एक हप्ता सँ सेनाक विभिन्न सेनानीक नेतृत्व मे दु-दु टा रथ दरभंगा जिलाक विभिन्न इलाका मे घूमि-घूमिकय प्रचार कय रहल अछि। स्वयं राष्ट्रीय महासचिव राजेश झा आर सेनाक अन्य महारथी सब प्रचार रथ संग अलग-अलग गाड़ी मे घूमि-घूमिकय हरेक पंचायत आ प्रखंड सँ बेसी सँ बेसी लोक केर जुटानी करबाक लेल करबद्ध प्रार्थना कय रहला अछि।
महासचिव झा कहलैन जे जानकी केर सेना मे स्वैच्छिक सहयोग देनिहार सेनानी स्वयं आगू आबि कार्यक्रम केर बागडोर सम्हारि रहला अछि। आब मिरानिसे जनसभा लेल स्वतःस्फूर्त समर्थन केर जनसैलाब देखि रहल छी। मिथिला राज्य मुद्दा केर बीजारोपण भऽ चुकल अछि। मिथिला विरोधी पर अंतिम प्रहार हैत ९ नवंबर केँ संस्कृत विश्वविद्यालय, दरभंगाक मैदान मे। मिरानिसे केर मंच आक्रामक आ निरंतर संघर्ष केर पटल रूप में काज करत।
परसू मंगल दिन भरदुतिया यानि भाइ-बहिनक पूजाक दिन विशेष रूप सँ अभियान संचालन मे खराज, गंधवारि, पंडौल, सकरी, बेनीपुर केर यात्रा मे सेनाक मजबूत स्तम्भ अनिल झा सेहो भाग लेलनि। सम्पर्क केर क्रम मे अलग-अलग जिम्मेदार नेतृत्वकर्ता सब पर भार देल गेल। सब गाम – समाजक लोक प्रचार रथ केर स्वागत करैत अपन राज्य लेल जान-प्राण गमाबय पड़त सेहो गमायब लेकिन आब चुप नहि रहब एहेन जोश भरल भावना प्रकट करैत देखेला।
महासचिव झा कहलैन जे दुनु मिरानिसे प्रचार रथ बिरौल केर आसपास के क्षेत्र में जनसभा लेल लोक केँ जागृत करबाक काज कएलक बुध दिन। रथ केर कमान सम्हारने छलाह दरभंगा जिला परिषद उपाध्यक्ष आ युवा चेहरा भाई आलोक झा उर्फ टिंकू भाई। तन, मन आ धन – तीनू तरहे टिंकू भाई नेतृत्व द रहला अछि। दैनिक भास्कर में कार्यरत उत्तम भाई कहला जे सब जगह मिरानिसे रथ केर जबरदस्त स्वागत कैल गेल। टिंकू भाई केर हार्दिक अभिनंदन।
आइ ३ नवंबर एक बजे सँ कोसी आईबी, बेनीपुर मे मिरानिसे केर सहयोग केनिहार भाई-बंधू केर बैसार गुँजन भाई केर नेतृत्व में आयोजित हैत। जनसभा में बेनीपुर क्षेत्र केँ जन सहयोग पर विचार-विमर्श हैत। एहि बैसार मे राष्ट्रीय अध्यक्ष श्याम सुन्दर झा आ कोषाध्यक्ष संजय मंडल बिठौली सँ, अनिल झा खराज सँ, टिंकू भाई बिरौल सँ, अनिल भाई तारडीह सँ आ मिरानिसे जनसभा केर संयोजक एवं प्रदेश अध्यक्ष रंगनाथ ठाकुर दरभंगा सँ अहि बैसार में शामिल हेताह। लग-पास में रहनिहार भाई अपन सुझाव-सलाह स मिथिला आंदोलन केँ मजबूत करी से करबद्ध निवेदन। – ई अपील महासचिव झा सोसल मीडिया सँ केलनि अछि।
जानकी केर सेनानी मिरानिसे रथ केर संग सागरपुर-ब्रह्मोत्तरा पहुँचल। जानकी वाहिनी केर नायक भाई मिहिर झा महादेव फूल फॉर्म में सहयोग कय रहला अछि। भाई स्वयं उपस्थित रहता 9 के कार्यक्रम में। सकरी बाजार स चंदन भाई आ रजनीश जी मिरानिसे केर आवाज बुलंद कय रहला अछि। सबके जुटानी हेतैक 9 नवंबर केँ दरभंगा में। मिथिला विरोधी सावधान, आब देब परतौ मिथिला के सम्मान। जय मिथिला जय जानकी। – राजेश झा केर दोसर अपील द्वारा जानकारीक संग-संग मिथिला विरोधी सबकेँ चेतौनी सेहो देल गेल अछि।
