मिथिला आवाज सेहो भारत आवाज बनि हिन्दी मे चलत – कि कारण?

मिथिला मखान फिल्मक निर्देशक नितिन निरा चन्द्रा डा. चन्द्रमोहन झा सँ असहमति जतबैत अपन मातृभाषाक अस्मिता प्रति सब केँ जागरुक बनबाक लेल आग्रह केलनि अछि, ओ स्वयं भोजपुरी भाषी रहितो मैथिली भाषाक महत्व केँ स्वीकार करैत क्षेत्रीय महत्व सँ राष्ट्रीय महत्व बनैछ ताहि नीतिगत बात पर जोर दैत बिहारी पहिचान आइ अपनहि भाषाक असम्मान करैत कोना गारि बनि गेल अछि ताहि दिशा मे संकेत सेहो केलनि अछि।

एक अन्य स्थानीय पत्रकार मुकेश झा अपन टिप्पणी दैत कहलैन अछि जे जलि जेबाक बाद ज्ञान भेलनि अछि, एकटा छल मिथिला आवाज। अर्थात् मैथिली पत्रकारिता मे धक्का लगलाक बाद ओ एहेन विचार बनौलनि अछि। मैथिलीक बाजार नहि अछि। मैथिली पत्रिका लोक पढैत नहि अछि। कियो मैथिली पढबाक लेल खर्च करय लेल पर्यन्त तैयार नहि होएत अछि। हिनकर संकेतक पाछाँ किछु ई भावना सब छन्हि जे बहुत हद तक मैथिली भाषाकेर नकारात्मक अवस्था मे सहियो छैक।

अखिल भारतीय मिथिला राज्य संघर्ष समितिक सचिव शिशिर कुमार झा अत्यन्त सम्भ्रान्त आ सटीक टिप्पणी दैत कहलनि अछि, “अपन असफलता सँ एहेन निराश वाला भाव निकलनाई स्वभाविक। मुदा सार्वजनिक जीवन मे सार्वजनिक सफलता लेल सर्व सघर्ष पर जोर देनाई मात्र एहि निराशा सँ निकालि सकैत अछि। धैर्य आ निरंतर लगन जरूरी।”

मैथिली जिन्दाबाद केर संपादक प्रवीण नारायण चौधरी जतय अपन प्रारंभिक प्रतिक्रिया मे कहलैन, “मैथिली लेल मिथिला आवाज संघर्ष केने छल, आब इतिहास भ गेल। आदरणीय सी एम् झा केर सन्देश जे आब ओ क्षेत्रीय भाषा लेल नहि अपितु राष्ट्रीय भाषा हिंदी लेल आ मिथिला मात्र लेल नहि अपितु समूचा भारत देश लेल पुनः मिथिला आवाज केर सञ्चालन करता, से प्रसारित भ रहल अछि। पूंजी डूबे तय स नीक किछु हिंदीये में होमय। ओना मैनेजमेंट सूत्र यदि नहि बदलता त अहु में पूंजी डूबै के डर रहबे करत। मैथिली लेल दिन नीक हो सेहो सदिच्छा अछि। ब्रह्म कहि रहला अछि से जल्दिये होयत। छींटपन्थि स ऊपर उठु।”

ओत्तहि शिशिर कुमार झा केर नियंत्रित प्रतिक्रिया पर सहमति दैत आर एकर प्रतिक्रिया उग्र रूप मे बहसक विषय बनैत देखि ओ आगू कहलैन अछि,

“मैथिली मे पत्रकारिताक प्रखर आवाज आदरणीय डा. चन्द्र मोहन झा आइ अचानक एहेन स्टैन्ड बना लेलनि ताहि मे बहुत रास बात मननीय बुझाएत अछि।

एक, ई विचार हुनकर नहि भऽ सकैत अछि, कारण कोनो द्विवेदी नाम्ना व्यक्ति जे पक्का मैनेजमेन्ट आ कम्युनिकेशन फिल्डक कियो प्रोफेसनल रहल होयत तेकर मस्तिष्क सँ उपजल भावना थीक, पोस्ट केर प्रकृति सँ स्पष्ट अछि।

दोसर, डा. सीएमजे मैथिली लेल लगानी करबाक अदम्य साहस देखौलनि, मुदा व्यवस्थापन पक्ष मे जिनकर भरोसे नाव पार उतारबाक प्रयास कएलनि ओतय धोखा होएत हम अपन आँखि सँ देखलहुँ….. मिथिला आवाज मे मौलिकता सँ भरल समाचार केर अकाल छल, जनसरोकारक मुद्दा आ जनजुड़ाव केर घोर अकाल छल, ताहि पर सँ हरमुठाइ केर कइएक शिकायत होएत रहैत छल, अन्तर्द्वन्द्व सँ विज्ञ सज्जन संपादक, व्यवस्थापक सब केँ किनारा लगा देल गेल छल… बहुत तरहक कमजोरी रहल जेकरा सीएमजे शायद व्यक्तिगत कानूनी उलझन मे फँसल रहबाक कारणे नहि सम्हारि सकल छलाह। आर मिथिला आवाज बन्द करबाक बाध्यता भेल छल।

तखन तऽ आब पूँजीवादी विचारधाराक शासित मुलुक मे पूँजी कोना बचत ताहि लेल कोनो तिकड़म अपना सकैत छी।

मैथिली मे पाठक कोना बढत, ताहि पर सेहो मंथन हो। एकला सीएमजे पर आक्रमणकारी टिप्पणी ओतेक नहि सोहा रहल अछि।”

किनको ऊपर दोष देनाय समाधान कदापि नहि होयत। एहि लेल आत्ममंथनक आवश्यकता अछि जे स्थिति मैथिली लेल एहेन दयनीय कियैक। लगानीकर्ता मे जोश कोना आओत। एहि दिशा मे सोचब आवश्यक अछि।