राम नरेश शर्मा, मुंबई। फरबरी १६, २०१६. मैथिली जिन्दाबाद!!
“सुच्चा मैथिल” केर तरफ सं आयोजित सरस्वती पुजनोत्सव मुंबई केर विरार पूर्व (ममता गार्डन, फुलपाडा) आ दिल्ली केर संगम विहार(शिरोमणि पब्लिक स्कूल) में दिनांक १३ फरवरी केँ संपन्न भेल । चूंकि मैया शारदे के पुजनोत्सव बहूत रास जगह मनायल गेल ताहि लऽ कऽ सब अतिथि केँ बहुत रास आमंत्रण कार्ड आयल छलैन आ हुनका सबके सब ठाम पहुंचनाय संभव नहि छलैन, तइयो सुच्चा मैथिल केँ हरेक तरहक सहयोग कय केँ हुनका सबकेँ उत्साहवर्द्धन केलनि ताहि लेल आयोजन समिति द्वारा सब गोटा केँ कोटि-कोटि धन्यवाद ज्ञापन कैल गेल छल ।
सुच्चा मैथिल मुम्बई केर संयोजक तथा सक्रिय मैथिली-मिथिला अभियानी राम नरेश शर्मा आगन्तुक समस्त अतिथि संगे मैथिली फिल्म “सस्ता जिनगी महग सेनुर” आ “सजना के अंगना सोलह सिंगार” केर निर्देशक श्री मुरलीधर जी प्रति विषेश आभार प्रकट केलनि जे अपन अपार व्यस्तताक बादो आयोजनकर्ता सब केँ उत्साहवर्द्धन करबाक वास्ते ओ आयल छलाह। तहिना दिल्ली मे आयोजन समितिक सदस्य अमलेश कुमार मंडल आयोजन सफलतापूर्वक संपन्न होयबाक आ एहि अवसर मैथिल जनमानस संग विशेष भेंटघांट करबाक सुअवसर भेटबाक जानकारी करौने छथि। सुच्चा मैथिल दिल्ली एहि तैयारी मे पैछला कतेको दिन सँ लागल छल आर सबहक एकजुट सहयोग सँ ई कार्यक्रम संपन्न भेल ओ कहलैन।
