पटना, दिसम्बर १, २०१५. मैथिली जिन्दाबाद!!
मिथिलाक एकटा नामी-गिरामी सपुत – समाजसेवी – नेतृत्वकर्ता – छात्र जीवन सँ बाम आन्दोलनक एकटा हस्ती आ करीब १५ वर्ष धरि अपन गामक मुखिया – हाले राष्ट्रीय लोक समता पार्टीक टिकट पर मधुबनीक हरलाखी विधानसभा क्षेत्रसँ विजयी विधायक बसंत कुशवाहा केर दुखद निधन केर खबैड़ अछि।
हालहि संपन्न त्रिदिवसीय मिथिला विभूति स्मृति पर्व समारोह दरिभंगा मे सहभागिता दैत स्व. कुशवाहा इच्छा व्यक्त केने छलाह जे ओ विधानसभा मे मैथिली मे शपथ लेता आर अपन मातृभाषा केर सम्मान केँ बढेता। एतबा नहि, ओ कहने छलाह जे मिथिलाक्षेत्रक उपेक्षाक विरुद्ध संघर्ष करता आर क्षेत्रक विकास मे कोनो कसैर नहि रखताह। आर, निज शपथ खेबाक दिन भोरे मे हुनक दुखद निधन हेबाक शोक-समाचार चारूकात पसैर गेल। समूचा राज्य मे हुनका सनक नेतृत्वकर्ताक मृत्युक खबैड़ स्तब्ध करऽवला भेल। खासकय मैथिली-मिथिला जगत् मे एहेन महान् सपुत आ संघर्षशील-कर्मठ नेतृत्वकर्ताक निधन तऽ मानू जेना अनाथ बनबयवला भेल।
सामाजिक संजाल पर सेहो हुनक मृत्युक समाचार आगि जेकाँ पसैर गेल। परिचित-अपरिचित अनेकानेक अभियानी ओ जनमानस केर आम जनता हुनक मृत्यु पर शोक प्रकट करैत देखेलाह। मिडिया मे ई समाचार सेहो हेडलाइन्स मे रहल।
काल्हिये ओ पटना पहुँचल छलाह। राति मे छाती मे दर्दक शिकायत केला पर पीएमसीएच मे भर्ती करायल गेलनि। मुदा होनी केँ किछु आरे मंजूर छल – हुनक आजुक दिन कतेको वर्षक ओ सपना पूरा होमयवला छल जे ओ विजेता विधायक बनिकय विधानसभा मे मातृभाषा मैथिली मे शपथ ग्रहण करितैथ, तहिये काल हुनका अपन ग्रास बनाकय समूचा मिथिलावासी केँ लिल्लोह कय देलक।
आइ हुनकर शव केर अन्तिम दर्शन व श्रद्धांजलि अर्पण करबाक लेल पार्टी मुख्यालय पर राखल गेल छल। जतय मुख्यमंत्री नीतीश कुमार सहित अनेकानेक नेतागण व पार्टीक अन्य नेता लोकनि हुनका श्रद्धांजलि अर्पण कएने छलाह। बाद मे हुनकर शव केँ मातृभूमि मिथिलाक निज गाम उत्तरा आनल गेल जतय पूर्ण राजकीय सम्मानक संग हुनक अन्त्येष्टि कैल जेबाक छल।
अस्पताल द्वारा जारी कैल विज्ञप्तिक मुताबिक राति भैर हुनकर हालत नाजूक बनल रहल, भरपूर प्रयासक बादो हुनका नहि बचायल जा सकल। पारिवारिक स्वजन आदिक शोकावस्था अवर्णनीय अछिये, समूचा क्षेत्र मे हुनक दुखद मृत्यु सँ शोक-लहैर पसैर गेल अछि। विदित हो जे हालहि संपन्न बिहारक चुनाव मे रालोसपा केर कुल दुइ विधायक केँ जीत भेटल छलनि, जाहि मे एक स्व. बसन्त कुमार कुशवाहा छलाह।
मैथिली जिन्दाबाद परिवार केर तरफ सँ विनम्र श्रद्धांजलि!!
