दिल्ली, अक्टुबर ३१, २०१५. मैथिली जिन्दाबाद!!
अखिल भारतीय मिथिला पार्टीक दिल्ली प्रदेश अध्यक्ष अपन बिहारक चुनावी दौरा केँ बीच्चहि मे छोड़ि पुन: दिल्ली वापसी करैत मैथिली जिन्दाबाद केँ जानकारी करौलनि जे दिल्ली मे अपन मिथिलाक दामिनी संग कैल गेल अछि दरिंदगीक खतरनाक खेल, एकटा नावालिग १३ वर्षक गरीब टैम्पू चालकक बचियाक संग कैल गेल अछि यौन शोषण आ दिल्ली पूलिस द्वारा पीड़िताक आवाज तक नहि सुनल जा रहल अछि, नहिये एफआइआर दर्ज कैल गेल अछि, वर्तमान दिल्ली सरकार केर उच्च रसूख राखनिहारक दबाव मे कैल जा रहल अछि घोर अत्याचार…. मिथिलाक लोक लेल दिल्ली मे राजनीति करैत हमर ई कर्तब्य बनैत अछि जे एहि लेल उचित सहायता आ मानवीय संवेदना सँ पीड़ित परिवार केँ रक्षा करी।
बात दिल्लीक बुरारी विधानसभा क्षेत्र अन्तर्गत मंडावली थानाक्षेत्रक थीक। ओतय मिथिला सँ प्रवास पर रहि रहल एक गोट टैम्पू चालक संग ओहि परिवार संग नजदीकी रखनिहार एकटा दोसर टैम्पू चालक २५ वर्षीय अपराधी प्रवृत्तिक उत्तर प्रदेशक वासिन्दा द्वारा चालकक १३ वर्षीया मैथिली पुत्रीकेँ बहला-फुसलाकय गंदा एमएमएस बनाय करीब डेढ वर्ष सँ निरन्तर ओकर यौन शोषण करबाक मामिला सोझाँ आयल अछि। अन्त मे जखन ओहि नावालिग लड़की केँ सहन क्षमता सँ बाहर भेल तखन ओ अपन माता-पिता सँ ओहि अपराधीक करतूत पर बात करबाक बाध्यता भेल। ओ पीड़ित परिवार शिकायत लऽ के मंडावली थाना मे गेल। मुदा थाना अपराधी सँ किछु पैसा घूस लैत एफआइआर दर्ज करय सँ मना कय देलक। उनटा ओहि पीड़ित परिवार केँ डरेलक-धमकेलक। पीड़िताक पिता जानकारी देलनि जे अपराधी एहि ठामक स्थानीय नेताक संरक्षण पाबिकय एकटा गरीब परिवार पर कैल गेल अत्याचार केँ झाँपय लेल कोनो हद तक जेबाक लेल तैयार अछि। झरौदा थाना मे सेहो पाइ खुआकय अपराध केलाक बादो खुलेआम घूमि रहल अछि। अन्त मे कोर्ट द्वारा आदेश लैत एफआइआर आ मेडिकल करबैत न्याय लेल संघर्षरत अछि पीड़ित परिवार।
आइ-काल्हि एहि प्रकृतिक ब्लैकमेल करैत यौन शोषणक घटना दिन-प्रतिदिन बढैत जा रहल अछि। लेकिन अपराधी केँ राजनीतिक शरण दैत कोनो पीड़ित परिवार पर जुर्म केनाय हमरा सब मैथिल पर अत्याचार होयत – ई भावना अभामिपा केर दिल्ली प्रदेश अध्यक्ष रमानाथ झा रखलैन। एहि मामिला पर स्थानीय विधायक द्वारा सेहो कोनो प्रकारक कार्रबाई नहि करब हमरा सबकेँ हुनकर (संजीब झा) मैथिल होयबा पर संदेह उत्पन्न कय रहल अछि। कम सँ कम जनप्रतिनिधिक नाते हुनका एकटा गरीबक आवाज सुनबाक चाही। उनटा सुनबा मे आयल अछि जे हुनकहि नाम लैत थाना केँ पाइ खुआ अपराधी पीड़ित परिवार केँ न्याय पेबा सँ वंचित कय रहल अछि।
अपराधी कतेक शातिर अछि तेकर अंदाज अही सँ लगायल जा सकैत छैक जे एक्कहि विधा मे सहकर्मी आ पड़ोसी रहितो ओ अपना सँ आधा उमेर केर बालिका केँ डरा-धमकाकय दुष्कर्म केलक आ तेकर एमएमएस बनाकय लगातार डेढ साल सँ यौन शोषण करैत आबि रहल अछि। एकटा मैथिल केर बेटी पर भेल अत्याचार हमरा सबहक बेटी पर अत्याचार समान अछि। एहि मामिला पर आइ दिल्लीक मुख्यमंत्री अरविन्द केजरीवाल सँ भेंट करैत आगाँक डेग निर्धारित करब – जानकारी करौलनि रमानाथ झा।
सामाजिक संजाल फेसबुक पर धीरे-धीरे सब जागरुक मैथिल द्वारा एहि घटनाक घोर भर्त्सना कैल जा रहल अछि। दिल्ली मे रहनिहार लाखों मैथिल एहि जघन्य अपराधक सजाय दियेबाक लेल हर स्तर पर संघर्ष करय लेल तैयार देखा रहल अछि।
