मिथिलाभाषा रामायण – सुन्दरकाण्ड पहिल अध्याय – हनुमानजीक लंका पहुँचब

स्वाध्याय

– प्रवीण नारायण चौधरी

कवि चन्द्र विरचित मिथिला भाषा रामायण

अथ सुन्दरकाण्ड

पहिल अध्याय

हनुमानजीक लंका पहुँचब; सुरसा, सिंहिका व लंकिनी सँ सामना

।द्रुतविलम्बित छन्दः।

धुतनगेऽम्बरगे परमोत्सवे, चकितभानुगणे जितमन्मथे ॥१॥
जनकजाधिविनाशिमनोगतौ, प्रणतिरस्तु हनूमति मारुतौ ॥२॥

भावार्थः

पहाड़हु केँ हिलाबयवला, आकाश मे उड़यवला, परम उत्साह सँ भरल, सूर्य-चन्द्रादि केँ चकित करयवला, कामदेव केँ जितयवला, जानकीजीक व्यथा हरयवला, मन-जेकाँ तेज चलयवला पवनसुत हनुमान केँ प्रणाम ॥१-२॥

।चौपाइ।

जयजय राम नवल-घनश्याम । सकललोक-लोचन अभिराम ॥३॥
मनमे तनिक ध्यान दृढ़ राखि । मारुतनन्दन उड़ला भाखि ॥४॥
शतयोजन वारिधि विस्तार । लाँघब हम मन हर्ष अपार ॥५॥
रघुनायक-कर जनु शर मुक्त । तथा हमहुँ जायब मुदयुक्त ॥६॥
देखथु कपिगण जाइत गगन । शोभित जेहन प्रवहमे भगण ॥७॥
वैदेही हम देखब आज । दोसर यहन आन की आज ॥८॥
रघुनन्दन काँ वार्ता कहब । सत्वर घुरब अनत नहि रहब ॥९॥
नामस्मरण अन्त एक बार । जनिकाँ भव-जलनिधि से पार ॥१०॥
प्रभुक मुद्रिका हमरा सङ्ग । होयत न हमर मनोरथ भङ्ग ॥११॥
जायब लङ्का दनुज-समाज । प्रभुप्रताप साधब सब काज ॥१२॥

भावार्थः

नव मेघ जेकाँ श्यामवर्ण तथा सभक आँखिक लोचन रामजीक जय हो, जय हो । मन मे हुनक दृढ़ ध्यान कय केँ पवनसुत हनुमान ई कहैत उड़ि चललाह – “ई समुद्र जे सौ योजनक विस्तार मे पसरल अछि तेकरा आइ हम लाँघब से मन मे अपार हर्ष भ’ रहल अछि । जेना रामजीक हाथ सँ छुटल बाण (तीर) चलैत अछि तहिना आइ हमहुँ आनन्दपूर्वक निकलि जायब । हमरा वानर सब आकाश मे जाइत ओहिना देखथि मानू जेना प्रवह पवन ग्रह-नक्षत्र सब मे चलैत देखाय पड़ैछ । आइ हम सीताजी केँ देखबनि, एहि सँ बढ़िकय आर दोसर कोन काज भ’ सकैत अछि ! रामजी केँ हुनकर समाचार सुनेबनि । जल्दिये वापस सेहो आबि जायब, अन्तऽ (बाहर) नहि रहब । अन्त मे एक बेर फेर वैह प्रभुजीक नाम स्मरण करैत छी जिनकर कृपा सँ समुद्र कि, भवसागरो केँ लोक पार कय जाइत अछि । प्रभुक मुद्रिया हमरहि लग मे अछि । हमर मनोरथ किन्नहुँ भंग नहि होयत । लंका मे राक्षस समाजक बीच मे जायब आ रामजीक प्रताप सँ सबटा काज पूरा करब ।” ॥३-१२॥

।सोरठा।

उड़ि चलला हनुमान, ध्यान राम-पद मे सतत ॥१३॥
प्रबल प्रलय पवमान, रौद्र-मूर्ति लङ्काभिमुख ॥१४॥

भावार्थः

एतेक कहिकय हनुमानजी रामजीक चरण मे निरन्तर ध्यान लगबैत प्रलयकालक प्रबल वायु जेकाँ लंका दिश उड़ि चललाह ॥१३-१४॥

।चौपाइ।

लङ्का जाइत छथि हनुमान । की बल की मति से के जान ॥१५॥
सुरसा काँ सुर सत्वर कहल । सर्प्प-जननि करु सुरहित टहल ॥१६॥
बहुत दिवस धरि मानब गून । जाउ शीघ्र घुरि आयब पून ॥१७॥
रोकब बाट कहब नहि मर्म्म । बूझब की करइत छथि कर्म्म ॥१८॥
कहल कयल से नभ पथ रोकि । चललहुँ कतय ततय देल टोकि ॥१९॥
हमरा आनन सत्वर आउ । विहित भक्ष्य अन्यत्र न जाउ ॥२०॥

भावार्थः

(देवता सब सोचलनि जे) हनुमान लंका जा रहल छथि । हुनकर केहेन बल छन्हि आ केहेन बुद्धि छन्हि से केकरा पता छैक । सुर लोकनि तुरन्त सुरसा सँ कहलनि – “हे साँपक माता, अहाँ देवता लोकनिक खातिर एकटा टहल करू । एहि लेल हम सब अहाँक बहुते दिन धरि गुण मानब । जल्दी जाउ आ फेर जल्दिये घुरि आउ । अहाँ हनुमानजीक रस्ता रोकब, लेकिन वास्तविक बात नहि कहबनि । ई देखब जे ओ कोन उपाय करैत छथि ।” सुरसा देवता लोकनिक आज्ञाक अनुसार चलि पड़लिह आ आकाश मे हनुमानजीक रास्ता रोकिकय कहली – “अहाँ कतय चलि देलहुँ ? आउ, जल्दी सँ हमर मुँह मे आउ । अहाँ हमरे विहित भक्ष्य (आहार) थिकहुँ । अन्यत्र जुनि जाउ ।” ॥१५-२०॥

।सवैया छन्द।

मारुत-सुत कहलनि शुनु माता, राम-काज कय आयब घुरि ॥२१॥
सीता-विषय कहब श्रीप्रभुकाँ, अहँक देब प्रत्याशा पूरि ॥२२॥
सुरसा देवि होइ अछि अरसा, कल जोड़ैछी छोड़ू बाट ॥२३॥
अभिनत मारुति कहल न मानल, नमस्कार कयल भेलहुँ आँट ॥२४॥
सुरसा कहल शून रे बाबू, नहि छोड़ब बिनु खयलैँ ॥२५॥
एखनहुँ धरि जीवन-प्रत्याशा, हमरा मुहमे अयलैँ ॥२६॥
बहुत दिनासौँ हम भूखलि छी, बिनु आहारैँ मरबे ॥२७॥
हाथ मुसरी बियरि मे दय, कड़े कड़े नहि करबे ॥२८॥

भावार्थः

हनुमानजी कहलनि – “हे माता, सुनू । हम रामजीक काज कय केँ घुरि जायब, रामजी सँ सीताजीक हाल कहबनि, तखन अहाँक इच्छा पूरा कय देब । हे सुरसादेवी, हमरा देरी भ’ रहल अछि । हाथ जोड़ैत छी, रस्ता छोड़ि दियह ।” प्रणाम करैत थाकि गेलाह, मुदा सुरसा विनीत हनुमानक कहब नहि सुनलनि । सुरसा कहलनि – “सुन रे बाबू, तोरा खेने बिना हम नहि छोड़ब । एखनहुँ धरि तूँ जिबय के आशा करैत छँ । आब तूँ हमर मुँह मे आबि गेलैँ । हम बहुत दिन सँ भुखले छी । आहाक बिना हम मरि जायब । हम हाथ मे पकड़ायल मूस केँ बिल मे दय देब आ ओकरा कड़ाक-कड़ाक कय केँ नहि खायब ?” ॥२१-२८॥