मिथिलाभाषा रामायण – किष्किन्धाकाण्ड सातम अध्याय – अंगद केँ हनुमानजीक उपदेश

।चौपाइ।

सीता-सह सानुज रघुनाथ । अयला वन पितृ-आज्ञा लाथ ॥३४॥
रावण छलसौँ सीता-हरण । कयलक ध्रुव तनिकर लग मरण ॥३५॥
शुनितहिँ वैदेहीक विलाप । कयल जटायु गतायु प्रताप ॥३६॥
युद्ध विरुद्ध कयल से घोर । कहि कहि दुष्ट दशानन चोर ॥३७॥
रावण तनिकाँ मारल बाण । मूर्छित खसला तन धर प्राण ॥३८॥
मोक्ष जटायुक अन्त चरित्र । रामचन्द्र काँ कपिपति मित्र ॥३९॥
बालि-निधन सुग्रीवक राज । अयलहुँ सभहुँ तनिक हित काज ॥४०॥
सीता तकइत तकइत आज । अयलहुँ एहि गह्वरक समाज ॥४१॥
बहुत विलम्ब बितल एक मास । सुग्रीवक हो अतिशय त्रास ॥४२॥
लवणोदधिक आबिकेँ तीर । जायत प्राण कि रहत शरीर ॥४३॥
वृद्ध गृद्ध अँह काँ दुर सूझ । हमरा सबहिक आधि के बूझ ॥४४॥
जनक-नन्दिनी छथि जे गाम । कहू दयामय मन दय ठाम ॥४५॥
अङ्गद-वचन शुनल से गृद्ध । कहलनि भ्राता छल छथि वृद्ध ॥४६॥
कति सहस्र बीतल अछि वर्ष । वार्त्ता शुनि मन बाढ़ल हर्ष ॥४७॥
कहब जतय छथि वचन सहाय । जलक समीप दिअओ पहुचाय ॥४८॥
पहुचाओल समुद्रक कात । देल तिलाञ्जलि कहि सहजात ॥४९॥
पुनि पहुचाओल पहिलहि ठाम । कहल तखन किछु समय विराम ॥५०॥
गिरि त्रिकूट पर लङ्का नाम । पुरी अशङ्क दशानन-धाम ॥५१॥
छथि वैदेही विपिन अशोक । कोटवार अछि राक्षसि लोक ॥५२॥
योजन शत कत जलचर पानि । से समुद्र जे जयता फानि ॥५३॥
से सीता काँ देखथि जाय । सत्य कथा हम देल जनाय ॥५४॥
रावण-वध करबा हम दक्ष । कि करब सम्प्रति नहि गति पक्ष ॥५५॥
गृद्ध लोककाँ सूझय दूर । करु उपाय उत्तम जे फूर ॥५६॥

भावार्थः

पिताक आज्ञाक बहाने सीता आ लक्ष्मण संग राम वन मे अयलाह । रावण छलपूर्वक सीताक हरण कय लेलक । ओकर मृत्यु आब नजदीक आबि गेल छैक । सीताक विलाप सुनितहि वृद्ध जटायु बड पैघ पराक्रम कयलनि । दुष्ट रावण केँ चोर कहि-कहिकय ओकरा संग घोर युद्ध कयलनि । रावण हुनका एक बाण मारलक । ओ मूर्च्छित भ’ खसि पड़लाह आ प्राण त्यागि देलनि । जटायु केँ जीवनक अन्त मे मोक्ष भेट गेलनि । तेकर बाद रामजीक सुग्रीव संग मित्रता भेलनि । बालि मारल गेलाह । सुग्रीव केँ राज्य भेटलनि । हम सब वैह रामक मदति लेल निकलल छी । सीता केँ तकैत-तकैत हम सब एहि खोह धरि पहुँचल छी । बहुत समय लागि गेल । एक मास बीति गेल । आब सुग्रीवक बहुते डर लगैत अछि । आब लवण-सागरक किनार पर आबि हम सब असमंजस मे पड़ि गेल छी, के कहय, जान बचत कि चलि जायत । हे वृद्ध गिध! अहाँ केँ त बहुत दूर धरि सूझैत अछि । हमरा लोकनिक चिन्ता आर के बुझत । हे दयामय, कृपा कय ई कहू जे जनकपुत्री सीता कतय छथि ?” ॥३४-४५॥

अंगदक बात सुनिकय ओ गिध बजलाह – “बूढ़ जटायु हमर भाइ रहथि । कतेको हजार वर्षक बाद आइ हुनकर समाचार सुनिकय बहुत प्रसन्नता भेल । हम केवल वचन सँ सहायता करब, ई कहि देब जे सीता कतय छथि । हमरा समुद्रक किनार धरि पहुँचा त दिय’ ।” फेर ओ समुद्रक किनार पर आनल गेलाह । ओ सहोदर भाइ कहिकय जटायु केँ तिलाँजलि देलनि । फेर ओ पूर्व स्थान पर गेलाह, तखन किछु समय रुकिकय ओ कहलनि । त्रिकूट पर्वत पर लंका नामक एकटा नगर अछि । ओतय रावण निरापद रूप सँ रहैत अछि । ओतय सीता अशोक वाटिका मे राखल गेलि अछि । राक्षसी सब हुनकर रखबारि करैत अछि । जे सौ योजन मे पसरल भाँति-भाँतिक जलचर व जलराशिवला समुद्र केँ नाँघिकय ओहि पार पहुँचि सकैछ वैह व्यक्ति जाकय सीता केँ देखि सकैछ । सत्य बात हम बता देलहुँ । हम त रावण केँ मारय मे समर्थ छी, मुदा कि करू, आब हमर पाँखिये बेकार भ’ गेल अछि । गिध पक्षी केँ दूर धरि सूझैत छैक । आब एहेन उपाय करू जे सब सँ उत्तम बुझय मे आबय ॥४६-५६॥

।सवैया छन्द।

शतयोजन जलनिधि सुख फानथि, लङ्कापुरी अशङ्कित जाय ॥५७॥
वैदेहीक कुशल सभ जानथि, समाचार सन्तोष शुनाय ॥५८॥
फानथि पुन निर्भयसौँ जलनिधि, छथि के यहि मे करू विचार ॥५९॥
होयत कार्य्य-सिद्धि निश्चय अछि, श्री नारायण-कृपा अपार ॥६०॥

भावार्थः

एहि सब मे सँ के एहेन वीर छथि जे सौ योजन धरि पसरल समुद्र केँ नाँघि सकैत छथि, निःशंक भ’ कय लंकापुरी मे प्रवेश कय सकैत छथि, फेर सीताक कुशल-समाचार जानिकय आ हुनका बोल-भरोस दय कय फेर ओ समुद्र केँ निर्भय भ’ पार कय सकैत छथि ? काज अवश्य बनत, कियैक तँ नारायणक बड पैघ कृपा अछि ।” ॥५७-६०॥

।इति श्री चन्द्रकवि-विरचिते मिथिला‍-भाषा रामायणे किष्किन्धाकाण्डे सप्तमोऽध्यायः।

।मैथिल चन्द्रकवि विरचित मिथिलाभाषा रामायण मे किष्किन्धाकाण्डक सातम अध्याय पूरा भेल।

हरिः हरः!!