मैथिली-मिथिला केँ नहि चाही भीड़तंत्र: कर्मठता देखाउ, दोसरक चरित्र-चित्रण छोड़ू

परिणाम कि होइत छैक? कि ई हमरा कहय पड़त? अहाँ स्वयं नहि देखैत छियैक? अफरातफरी – गारा-गारी आ वर्चस्वक लड़ाई मे कतेको निर्दोष-गरीबक खून – यैह तऽ थिकैक वर्तमान भीड़तंत्र! अहाँ यदि सुच्चा सेवाभाव सँ मातृभूमि व अपन समाज तथा राष्ट्र लेल किछु करय चाहैत छी तऽ भीड़ कम आ समर्पण बढेबाक प्रयास मे लागू। भीड़ केँ जुटेबाक लेल भौतिकतावादी लफड़ा-झगड़ा सँ नितान्त दूर ओहेन कार्य करू जाहि मे लोक कमो रहत मुदा संवेदनशील आ सचेतनशील रहत। ओकर परिणाम बहुत दूरगामी हेतैक।

मैथिली वा मिथिला लेल वर्तमान समय ओ साधन छहिये नहि कतहु जे भीड़ भेटत। जे छहियो, ओ आपसे मे विष-वमन करैत रहैत छैक। अपना केँ सब संत बुझलक, दोसर केँ असंत। यैह तऽ अवस्था छैक। आब न कियो विदेह, न कियो जनक, न कियो विद्यापति, न कियो वाचस्पति, न कियो भामती, न कियो भारती, न कियो गार्गी…. बस छूछ-दुलारक समय मे ‘अपन मोने मियां मुँह मिट्ठू’ केर परिस्थिति विद्यमान् छैक।

जँ सच्चा पुत्र बनिकय माय-बाप प्रति सिनेह छलका सकैत छी, तहिना मातृभूमि आ मातृभाषाक प्रति समर्पण राखि सकैत छी। अपन कर्म पर बल दियौक। दोसराक चरित्र-चित्रण करब बिसैर जाउ। मिथिला मे जतेक जन्मलैक, जेकरा-जेकरा एतुका पानि पियब नसीब भऽ रहलैक अछि, ओकरा ऊपर जानकीक विशेष कृपा छैक। अहाँ के होइत छी अनावश्यक दोसरक चिन्ता मे अपना केँ गलेनिहार…? बेकार अछि ई सब! एतीकाल जँ एकटा छोट कार्य कय दितियैक तऽ चौजुगी नाम होइतय। नामे लेल काज करैत छी, पदे लेल काज करैत छी, तैयो कीर्ति स्थापित करहे टा पड़त।

मिथिला निर्माणार्थ कर्मठ पुत्र बनब बहुत जरुरी अछि!!