आब शुरू भेल मोदी सरकार – २ – आगामी ५ वर्ष मे मजबूती आ गम्भीर परिवर्तनक संकेत

मोदी जी दोसर बेर भारतीय प्रधानमंत्री बनबाक शपथ लेलनि। शपथ-ग्रहण समारोह मे ८ हजार लोक केँ आमंत्रित कयल गेल छल। मीडिया मे जगह-जगह एहि बातक चर्चा जोर-शोर सँ भऽ रहल अछि। सोशल मीडिया सेहो एहि सँ अछूता नहि य। हमरो लोकनिक मैथिली भाषाक संग हिन्दी दिग्गज कवि-गीतकार आदरणीय बुद्धिनाथ मिश्र देहरादून सँ एहि शपथ-ग्रहण मे सहभागिता देबाक जानकारी अपन फेसबुक सँ देने छलाह। एम्हर राजनीतिक क्षेत्र मे कार्यरत कतेको लोक मिथिला सँ सेहो एहि मे भाग लेबे केलनि। भारतीय मीडिया द्वारा हाइलाइटेड सहभागिता मे पश्चिम बंगाल केर राजनीतिक हिंसा मे मारल गेल लोकक परिवार केँ सेहो सहभागी बनायल गेल छल।

२४ कैबिनेट, २४ राज्य आ ९ स्वतंत्र प्रभार केर संग १ स्वयं नरेन्द्र मोदी केर शपथ ग्रहण समारोह मे विदेश सँ बिम्सटेक राष्ट्राध्यक्ष केँ मात्र आमंत्रित कयल गेल। एकर अलावे शंघाई कोऑपरेशन ऑर्गेनाइज़ेशन केर प्रमुख किर्गीज़स्तान केर राष्ट्रपति केँ आमंत्रित कयल गेल, तहिना मॉरीशस के प्रधानमंत्री केँ सेहो आमंत्रित कयल गेल छल। आइ राष्ट्रीय-अन्तर्राष्ट्रीय मीडिया मे एहि विन्दु पर सेहो गहन मंथन करैत समीक्षा सब पढय लेल भेटि रहल अछि। बिबिसी हिन्दी द्वारा ‘मोदी के शपथ समारोह में इमरान को न बुलाने पर पाकिस्तान में बहस’ शीर्षक सँ अभिमन्यु कुमार साहा केर लेख अछि, जाहि मे समस्त संसारक मीडिया द्वारा एहि शपथ समारोह मे आमंत्रण केकरा आ कियैक, कोन ध्येय सँ कयल गेल तेकर जिकिर भेटैत अछि। बिम्सटेक राष्ट्राध्यक्ष केँ बजेनाय माने भारत द्वारा सार्क केर विकल्पक रूप मे निर्मित एकटा क्षेत्रीय सहयोग संगठन केँ महत्व देनाय, पाकिस्तान केर आतंकवादी विरुद्ध मजबूत डेग नहि उठेबाक कारण ओकरा किनार रखबाक नीति केँ पृष्ठपोषण करैत देखाइत अछि।

एखन धरिक सब प्रस्तुति आगामी ५ साल भारत केँ विश्व शक्ति बनेबाक दिशा मे बढबाक संकेत दय रहल अछि, संगहि कतहु कोनो बात लेल ठेहुनिया रोपि देबाक नियत वर्तमान सरकारक नहि रहत, प्रचंड बहुमत केर जनादेश प्राप्त मोदी सरकार २ ताहि लेल कठोर प्रतिबद्ध अछि, सेहो संकेत नरेन्द्र मोदी अपन प्रचंड आह्वान मे कय देने छथि। एहि बीच किछु अप्रत्याशित घटनाक्रम सेहो घटल, जेना बिहार मे ५०% केर साझेदार राजनीतिक दल जदयू सत्ता मे सहभागी नहि भऽ बाहरे सँ समर्थन देबाक नीति अपनौलक। तहिना उत्तर प्रदेश केर ‘अपना दल’ सेहो बाहरे सँ समर्थन देबाक नीति अपनौलक। एकर समीक्षा सेहो विभिन्न मीडिया मे भिन्न-भिन्न अछि, परञ्च समग्र मे सहयोगी दल लेल १ टा कैबिनेट सीट मात्र देबाक रणनीति अपनेबाक आ ताहि सँ जदयू प्रतिनिधिमंडल मे सन्तोषजनक बँटवारा संभव नहि रहि जेबाक कारण नीतीश कुमार सरकार सँ बाहर रहबाक निर्णय दय कोनो अन्तर्द्वंद्व सँ मुक्त रहबाक लेल संभवतः ई निर्णय कयलनि तेना बुझाइत अछि। आगामी २०२० मे प्रदेशक सरकार लेल चुनाव अछि, आर ताहि समय जदयू लेल नैतिक सवाल उठितय ताहि सँ नीक जे सरकार सँ बाहर रहि अपन समर्थन सँ काज आगू बढाबी। अस्तु! राजनीतिक विषय केर समीक्षा मे दृष्टिकोण फराक भेनाय संभव छैक, लेकिन समग्रता मे आजुक स्थिति एतबे अछि।