दरभंगा, नवम्बर १६, २०१७. मैथिली जिन्दाबाद!!
मिथिला स्टुडेन्ट युनियन केर छात्र-छात्रा द्वारा ललित नारायण मिथिला विश्वविद्यालय पर विशाल धरना-प्रदर्शन
सम्पूर्ण मिथिला क्षेत्रक सर्वथा प्राचीन आ दोसर अति महत्वपूर्ण विश्वविद्यालय मे शैक्षणिक ओ प्रशासनिक अराजकताक विरुद्ध काल्हि १५ नवम्बर ललित नारायण मिथिला विश्वविद्यालय मे मिथिला स्टुडेन्ट युनियन केर छात्र नेता ओ सदस्य लोकनि विशाल धरना-प्रदर्शन कयलक। सैकड़ों छात्र-छात्राक समूह मिसू – MSU केर खास पीरा टीशर्ट (गंजी), माथ पर फेंटा आ हाथ मे पीरा झंडा लेने एहि क्रान्तिक आगाज करैत विशला जुलूस सहित विश्वविद्यालय क्षेत्र मे प्रवेश कयलक। पहिले त विश्वविद्यालयक प्रशासन द्वारा पुलिसक हस्तक्षेप सँ प्रदर्शनकारी केँ चौखम्बा सँ आगू नहि बढय देबाक प्रयास कयल गेल, परञ्च छात्रक हुजुम नाराबाजी करैत शिष्टतापूर्वक अपन ११-सूत्रीय मांग केँ पूरा करबाक दबाव बनबैत पुलिस बल केँ धकेलैत परीक्षा विभाग भवन धरि पहुँचि गेल। ओहि ठाम सेहो छात्र सब उग्र नाराबाजी आ प्रदर्शन करैत विश्वविद्यालय मे शैक्षणिक-प्रशासनिक लापरवाही दूर करैत छात्रक भविष्य निर्माण प्रति सजगता अपनेबाक मांग करैत रहल। बाद मे विश्वविद्यालय प्रशासन छात्र सब केँ वार्ता करय लेल आमंत्रित कयलक। आन्दोलनरत छात्र सभ मिसू अध्यक्ष रौशन मैथिलक अगुवाई मे एकटा प्रतिनिधि मंडल संग उपकुलपतिक कार्यालय पहुँचि मांगपत्र सौंपि हरेक मांग पर चर्चा केलक। वार्ताक निष्कर्ष अनुरूप छआत्रक हरेक मुद्दा केँ विश्वविद्यालय प्रशासन ध्यानपूर्वक सुनैत किछु मांग प्रत्यक्ष रूप सँ सम्बोधन करबाक आश्वासन देलक, तहिना किछु एहेन मांग जाहि मे विश्वविद्यालय प्रशासन केँ अन्य सम्बद्ध निकाय सँ मशवरा करैत डेग उठेबाक आवश्यकता पड़त से समयान्तरालक संग पूरा करबाक वचनबद्धता प्रकट कयल गेल।मिसू – एक नवगठित छात्र संगठन रहितो जाहि तरहें शिक्षाक बदहाली पर आवाज बुलन्द केलक अछि ताहि सँ मिथिलाक भूमि पर सेहो क्रान्ति संभव छैक ई सन्देश गेल अछि। एकजुटता आ शिष्टता सँ आन्दोलन केँ पूरा करबाक ऐतिहासिक कार्य मिसू द्वारा भेल अछि। सौशल मीडिया सँ हैश-टैग एमएसयूफोरएलएमएनयू मुहिम चलाकय अपार समर्थन जुटेबाक काज सेहो सफल रहल। तहिना दरभंगा आ मधुबनी जिलाक विभिन्न प्रखंड सँ नीक समन्वय करैत सैकड़ों छात्र एकत्रित होयबाक ई पहिल उदाहरण बनल। सूत्रक मानल जाय त एहि क्रान्ति सँ भारतीय जनता पार्टी ओ अन्य दल सभक छद्म छात्र राजनीति देखार होयबाक भय सँ एहि नवोदित छात्र समूह केर मुहिम केँ असफल बनेबाक भरपूर प्रयास कयल गेल, परन्तु एकजुटता सँ छात्र सभ अपन मांग अन्ततोगत्वा प्रशासन सँ मनबाकय मात्र मानलक। आगामी समय मे मांग पूरा नहि भेला पर आरो सशक्त आन्दोलनक चेतावनी मिसू द्वारा वक्तव्य मे कहल गेल अछि।
अपुष्ट समाचार ईहो भेटल अछि जे भाजपा समीप किछु नेतागण छात्र सभक एकजुटता केँ भंग करबाक लेल स्थानीय मिसू नेतृत्व पर मनगढंत आरोप लगाकय मारि-पीट सेहो केलक अछि। सोशल मीडिया सँ वायरल भऽ रहल किछु विवादास्पद स्थिति सेहो एहि बातक संकेत कय रहल अछि जे छात्र सभक एकजुटता सँ दलाल प्रवृत्तिक दलीय राजनीति कयनिहार कतहु न कतहु चिन्तित भऽ गेल अछि जे आगाँ ओकरा सब लेल जातिक नाम पर वोट लैत सत्ताक स्वाद चाखबाक सपना अधूरा नहि रहि जाएक। कतेक लोक नाजायज धन खर्च कय केँ जे सत्ताक स्वाद चखैत अछि ओत्तहु छात्र सभक एकजुटता सँ हड़बड़ाहट देखल जा रहल अछि। हर तरहें मिथिला स्टुडेन्ट यूनियन एक ऐतिहासिक प्रदर्शन सँ समूचा राष्ट्र मे मिथिलाक जनमानस मे सेहो क्रान्ति करबाक कूब्बत छैक ई सिद्ध कय चुकल अछि।
