४ अप्रैल, २०१७. मैथिली जिन्दाबाद!!
असहाय, गरीब, अपाहिज, शहीद आर समाजक विपन्न वर्गक उत्थानक संग-संग अपन मिथिलाक भाषा आ संस्कृति समेत लेल समर्पित कार्य कएनिहार प्रवासी मैथिल जे वैदेशिक रोजगार पर मलेशिया, सउदी, कतार, दुबई आदि स्थानपर कार्यरत रहितो संस्था ‘अपन मिथिला सेवा समाज नेपाल’ केर स्थापना कय निरंतर कार्य कय रहला अछि – ताहि संस्थाक अध्यक्ष कैलाश यादव सउदी अरब सँ मैथिली जिन्दाबाद केर सम्पादक प्रवीण नारायण चौधरी केँ फोन करैत ई जानकारी देलनि अछि जे मैथिली भाषा मे समाचार संप्रेषण करबाक महत्वपूर्ण कार्य लेल मैथिली जिन्दाबाद वेब न्युज पोर्टल पर विज्ञापन उपलब्ध करबैत सहयोग कएल जायत, संगहि नेपालक मिथिलाक्षेत्र सँ मैथिली भाषा मे समाचार संप्रेषण केर महत्वपूर्ण कार्य कएनिहार केँ वार्षिक १५ हजार टका केर पुरस्कार सेहो देल जायत। ई पुरस्कार मैथिली जिन्दाबाद केर माध्यम सँ देबाक घोषणा करैत कैलाश यादव देश-विदेश मे रहनिहार संपूर्ण मिथिलावासी सँ अनुरोध कएलनि अछि जे अपना जीवन लेल त सब जिबैत अछि, अपन समाज, भाषा, संस्कृति आ असहायक सहाय बनि अपन-अपन जीवन केँ सम्मानित करबाक काज मे सब कियो आगू आउ। जाहि जनक केर मिथिला मे हमरा लोकनिक जन्म भेल अछि आर जेना जनक महाराज समाजक सब तवकाक लोकक हित लेल सोचिकय अनेकानेक सामाजिक सिद्धान्त बनौलनि, जेकरा पण्डित सभक भाषा मे वैदिक कहल जाएत अछि, ताहि मिथिलाक वर्तमान बदहाली केँ हम युवा सन्तान सब मिलिकय दूर कय सकैत छी।
मैथिली जिन्दाबाद केर तरफ सँ अपन मिथिला सेवा समाज नेपाल केर एहि सुन्दर घोषणा केर हृदय सँ स्वागत करैत हुनका धन्यवाद ज्ञापन करैत छी। संगहि एहि पुरस्कार लेल मिथिलाक्षेत्रक विभिन्न पत्रकार लोकनि सँ अपन समाद आ संचारकर्म दिस ध्यान देबाक अनुरोध करैत छी। ई पुरस्कार वार्षिक सभा जे अप्रैल-मई मे आयोजित होएत अछि ताहि समय मे हस्तान्तरण कएल जेबाक जानकारी सेहो करबैत छी।
हरिः हरः!!
