रवीन्द्र भारती, खजौली, मधुबनी। जनवरी २०, २०१७. मैथिली जिन्दाबाद!!
भारतक चर्चित पारा-बैंकिंग संस्था ‘सहारा इंडिया’ केर तरफ सँ एहि मे कार्यरत विभिन्न सहयोगी हाथ केँ संस्थापक सुब्रत राय केर तरफ सँ कठिन परिस्थिति मे पर्यन्त धैर्यपूर्वक कार्य करबाक आर उत्कृष्ट प्रदर्शन करबाक काज केर प्रशंसा करैत प्रशस्ति पत्र हस्तान्तरण मधुबनीक टाउन क्लब मे समारोहपूर्वक कएल गेल अछि।
मधुबनी मंडल प्रमुख बच्चा झा केर अध्यक्षता मे आयोजित “आभार-प्रशस्ति पत्र वितरण समारोह” द्वारा सहारा इंडिया परिवार केर सदस्य लदनियां (पिपराही) निवासी दिनेश चौधरी सहित समस्त एजेन्ट तथा कार्यालय कर्मचारी केँ हस्तान्तरण कएल गेल अछि। दिनेश चौधरी मैथिली जिन्दाबाद प्रतिनिधि सँ बात करैत जनतब देलनि जे सभाध्यक्ष बच्चा झा द्वारा कंपनीक सब कर्मचारी तथा एजेन्ट द्वारा संस्थापक पर कानूनी कार्रबाही चलबाक बिपरीत अवस्था मे पर्यन्त धैर्य आर साहस संग ग्राहकवर्ग मे विश्वास दियाबैत कंपनीक हितरक्षा लेल स्वयं संस्थापकक तरफ सँ आभार आर प्रशंसा केर आशय सहितक प्रशस्ति पत्र हस्तान्तरण करबाक निर्देश मुताबिक ई आयोजन राखल जेबाक बात कहल गेल। संगहि हुनका द्वारा भविष्य मे आरो बेसी उर्जा आ ईमानदारिताक संग कंपनी तथा ग्राहक बीच विश्वासक सेतु बनि काज करबाक प्रेरणा सेहो देल जेबाक बात चौधरी बतौलनि।
एहि प्रशस्ति पत्रक वितरण सँ एजेन्ट, कर्मचारी तथा ग्राहक सब मे खुशीक माहौल देखल गेल।
