रविन्द्र उदासी, दोहा, कतार। जनवरी १९, २०१७. मैथिली जिन्दाबाद!!
जनवरी १८ तारीख तदनुसार ५ माघ २०७३ साल बुध दिन कतारक सनैयामे मधेशी युवावर्गसब द्वारा मधेश बलिदानी दिवस मनाओल गेल। ज्ञातव्य अछि जे आइ सँ दस बर्ष पूर्व एहि माघ ५ गतेक दिन अपन हक/अधिकार लेल मधेश केर वीर सपूतसब अपन जानक आहुति देने छल। इएह स्मरणमे हरेक वर्ष मधेशी भाइ बन्धुसब द्वारा मधेश बलिदानी दिवस मनबय लागल अछि। एहिबेर दोहा/कतारमे सेहो ओतुका मधेशप्रेमी युवासब मधेश बलिदानी दिवस मनौलक। प्रवासी मिथिला समाज कल्याण दोहा कतार, नेपाल प्रवासी तराइ मधेसी मंच आ गैर अबासीय मधेसी संघ द्वारा मधेश बलिदानी दिवस पर विभिन्न कार्यक्रम सभक आयोजना करैत शहीद सब केँ स्मृति मे आनैत श्रद्धाञ्जलि सुमन अर्पित कएल गेल।
कवि समाजसेवी तथा गायक रबिन्द्र उदासी माली केर संयोजन मे शुरु भेल कार्यक्रम मे समाजसेवी रामनन्दन गुप्ता द्वारा दीप प्रज्ज्वलन करैत सभाक आरम्भ कैल गेल तथा सभामे उपस्थित सम्पूर्ण मधेशी भाइ-बंन्धु द्वारा फूलमाला अबीर लगाकय शहीद सबकेँ श्रद्धाञ्जली अर्पण कैल गेल छल। एहि अवसरपर बहुत रास वक्ता लोकनि मधेश, मधेशीक अधिकार आ शहीद सभक शहादत विषयपर अपन-अपन मन्तव्य सेहो देने छलाह।
