अजय मिश्र मैथिल, मैनाकरड़ी, सप्तरी।
सितम्बर १७, २०१६. मैथिली जिन्दाबाद!!
सप्तरी आ सुन्सरी जिलाक सीमा जोड़यवला कोसी नदीक बीच मे करीब ६० गोट सवारी आ माल-समान भरल नाव डूबि जेबाक दुर्भाग्यपूर्ण समाचार आयल अछि। सुन्सरीक राजबास केर पास ई घटना करीब १२ बजे घटल अछि।
नाव मे ६० सवारीक अलावे माल-समान सेहो भरल छल। गोरिया टप्पू सँ नाह राजबास आबि रहल छल। एहि दुर्घटना सँ अपन जान बचाबय मे सफल भेल एक व्यक्ति विरेन्द्र ई खबैर देलनि अछि। ओ कहलैन जे हमरा सहित करीब २५ गोटे अपन जान बचेबा मे सफल भेल। हमहुँ नाह मे राखल एकटा बोरा जे पानिक ऊपर हेलि रहल छल से पकड़ि अपन जान बचा सकलहुँ। बाकी लोकक अवस्था अज्ञात छैक। ई नाह कोसीक बीच मे पहुँचलाक बाद डूबि गेल।
नाह मे ततेक समान भरि देलक जाहिक कारण धीरे-धीरे पानि भरय लागल छल, खतराक संकेत शुरु मे नहि भेटि सकल आर दुर्घटना बीच नदीमे पहुँचलाक बाद घटि गेल, विरेन्द्र कहलैन।
