अजय मिश्र मैथिल, विराटनगर। सितम्बर ८, २०१६. मैथिली जिन्दाबाद!!
पैछला मंगल ६ सितम्बर विराटनगर मे एक अत्यन्त वीभत्स हत्याकांडक समाचार आयल अछि। आपसी मित्रता मे भेल खटपटी सँ शत्रुता मे परिणत मानवीय सम्बन्ध केर ई एक असाधारण घटना प्रतीत भऽ रहल अछि। हत्याक प्रकृति देखि एना लगैत अछि जे घटना पूर्ण योजनाबद्ध तरीका सँ कैल गेल अछि। संगहि भेटल साक्ष्य आ घटनास्थल सँ लहासक प्रकृति सँ मानवताकेँ पर्यन्त कलंकित करयवला घटना घटल तेहेन बुझा रहल अछि।
विराटनगर केर तिनटोलिया स्थित सिद्धार्थ मार्ग मे ओमकार श्रेष्ठकेर निजी मकान मे भाड़ापर छात्रावास चला रहल बिनोद कुमार यादव केँ निर्ममताक संग हत्या कैल गेल आर फेर लहास केँ ठेगाना लगेबाक क्रम मे खंड-खंड काटिकय बोरा मे मृतकक बिछाओनक तोसकादि मे बान्हिकय गायब करबाक प्रयास सँ पूर्वहि पूलिस द्वारा छापामारी करैत लहास बरामद कय लेल गेल।
तत्काल घटनास्थल सँ हत्यारा सब फरार भऽ जेबाक बादो एकटा अन्य रूम मे बन्द नावालक छात्र केँ स्थानीय पूलिस द्वारा पकड़लाक बाद धीरे-धीरे सब रहस्य पर सँ पर्दा उठबैत पूलिस द्वारा ऐगला दिन हत्यारा सबकेँ भारतीय सीमावर्ती क्षेत्रक होटल मे नुकायल अवस्था सँ गिरफ्तार कय लेल गेल।
हत्याराक पास सँ हत्यामे प्रयुक्त हथियार कट्टा पेस्तोल, खुखुरी आ ८ थान मोबाइल सेहो बरामद कैल गेल। हत्याक कारण मित्रता मे आयल खटास आर आपसी लेनदेन आदिक समस्याक अन्दाज लगायल जा रहल अछि। विराटनगर पूलिस उपरीक्षक भंडारी व हत्यारा केँ पकड़यवला टोली द्वारा काल्हि एकटा पत्रकार सम्मेलन कय एहि सब बात केर जानकारी सार्वजनिक कैल गेल अछि।
मानवीयताकेँ कलंकित करयवला एहेन जघन्य हत्याकांड समूचा नेपाल मे चर्चाक विषय बनि गेल अछि। हत्यारा ऊपर कड़ा सँ कड़ा कानूनी कार्रबाई करबाक मांग विभिन्न दिशा सँ होमय लागल अछि। आक्रोशित जनमानस हत्याक प्रकृति देखि हत्यारा सब लेल तुरन्त फाँसीक मांग सेहो कय रहल अछि।
घटनाक विस्तृत जानकारी
हत्या भेल लोक १९ वर्षीय विनोद यादव सुनसरी जिलाक औराबनी-५ केर बासिन्दा कहल जाएत अछि। ओ अक्सफोर्ड होस्टल केर संचालन करैत छल। हत्याक आरोपी जे पकड़ल गेल अछि ताहि मे सिरहा पिपराहाक सूर्यनारायण यादवक बेटा २२ वर्षीय राकेशकुमार यादव, सिरहेक १७ वर्षीय कृष्णकुमार यादव आर सप्तरीक १७ वर्षीय जितेन्द्रकुमार शाह अछि। जिल्ला प्रहरी कार्यालय माेरङमे पत्रकार सम्मेलन करैत प्रहरी उपरिक्षक सन्दिप भण्डारी ई जानकारी करबैत कहलैन जे ई सबटा विद्यार्थी सब थीक। घटनाक अनुसन्धान करबाक लेल पूर्व क्षेत्रीय प्रहरी कार्यालयक टोली सेहो परिचालन भेल छल ओ जानकारी देलैन । घटनास्थलमे फेला पड़ल १३ वर्षक बालक मनाेज शाह पकड़ल गेल तीन अाराेपी मध्यक एक जितेन्द्र शाहक भाइ थीक, ओकरा ओकर परिवार केँ सुपुर्द कैल जेबाक जानकारी सेहो कराओल गेल।
घटनास्थल सँ प्रहरी द्वारा घटनामे प्रयाेग कैल गेल कट्टी, एक थान कटुवा पेस्तोल, मोवाइल सेट ८ थान, सिमकार्ड तथा रगत लागल कपडा सब सेहो बरामद कैल गेल अछि । प्रहरी उपरिक्षक भण्डारी द्वारा कहल गेल जे विनोद केँ पहिने मारल गेल आर फेर लहास केँ सहजे गायब करबाक उद्देश्य सँ टुकड़ा कैल गेल।
समाचारः साभार आवर विराटनगर डट कम
