सिमरिया, अगस्त २३, २०१६. मैथिली जिन्दाबाद!!
आशीष कुमार मिश्र के आदर्श मिथिला पार्टी के प्रदेश संयोजक नियुक्त केल गेल!
दिनांक 20/08/2016 कऽ सिमरिया घाट पर श्री चिदात्मन जी महाराज के सान्निध्य मे आदर्श मिथिला पार्टी के राष्ट्रीय अध्यक्ष श्री सुधीर नाथ मिश्र केर अध्यक्षता मे आदर्श मिथिला पार्टी द्वारा एक महत्वपूर्ण बैसार आयोजित छल।
एहि बैसार मे अन्तर्राष्ट्रीय मैथिली परिषद् केर प्रवक्ता धनाकर ठाकुर, नगीना प्रसाद महतो, योगी जनक, अधिवक्ता प्रमोद कुमार झा, दिनेश कुमार सिंह, राम कुमार झा, मुन्ना कुमार झा, शिव शंकर चौधरी, समाजसेवी सुशील कुमार झा चुन्नू, दरभंगा जिला अध्यक्ष सुनील ठाकुर, संजय झा, सुमित कुमार, अजय कुमार मुरारी, राजीव कुमार, अनिल कुमार एवं आशीष कुमार मिश्र सहित अन्य सदस्य तथा पदाधिकारी गण उपस्थित छलाह।
मिथिलाक विकास संगहि आदर्श मिथिला पार्टीक संगठनात्मक विस्तार पर चर्चा करबाक क्रम मे सुनील ठाकुर केर प्रस्ताव पर आशीष कुमार मिश्र केँ आदर्श मिथिला पार्टीक प्रदेश संयोजक नियुक्त कैल जेबाक जानकारी स्वयं मिश्र द्वारा कराओल गेल अछि। सुनील ठाकुर केर प्रस्ताव केँ उपस्थित सब पदाधिकारी एवं सदस्य लोकनि ध्वनि मत सँ पारित केलनि, ई खबर स्वयं आशीष अपन फेसबुक माध्यम सँ करौलनि अछि।
विदित हो जे आशीष मिश्र एक कर्मठ युवा एवं अपन माटि-पानि-संस्कृति लेल किछु न किछु करबाक जिम्मेदारी सँ सदिखन अपना आप केँ बान्हैत राखैत आबि रहला अछि आर एहि नव जिम्मेदारी सँ मिथिलावाद केर एक नव दल आरो मजगूती हासिल कएलक ई बात सोझाँ आयल अछि।
ई नव जिम्मेदारी सम्माननीय संत व मिथिलाक अकाट्य समर्थक स्वामी चिन्मयानन्द केर सान्निध्य भेटला सँ हम काफी उत्साहित छी, आगामी समय मे अपन पार्टीक मंच केर सदुपयोग करैत मिथिला राज्य निर्माण वास्ते तन-मन-धन एक करैत कार्य करब – ई प्रतिबद्धता आशीष व्यक्त केने छथि।
