काठमांडु, नेपाल। जुलाई २४, २०१६. मैथिली जिन्दाबाद!!
मिथिलाक अनुपम डेग केर राष्ट्रीय संयोजक निराजन झा मैथिली जिन्दाबाद संग फोन पर जानकारी करबैत आम जनमानस मे अपील करैत नेपालक मिथिलाक चारि जिलाक बाढिग्रस्त क्षेत्र लेल राहत संकलन मे सहयोग करबाक अनुरोध केलैन अछि।
निराजन झा कहलैन जे आइये सँ हम सब राहत संकलन मे लागि गेल छी। झापा, मोरंग, सुनसरी आ सप्तरी मे सैकड़ों परिवार निरंतर बरखा केर कारण आयल बाढि सँ विस्थापित होयबाक लेल बाध्य भेल छथि। बाढि सँ अत्यधिक नोकसानीक खबैर मर्माहत करयवला अछि। सरकारी राहत व्यवस्था समय सँ लोक सब धरि नहि पहुँचि पाबि रहल अछि। एहेन विपत्तिक समय मे मिथिलाक अनुपम डेग केर स्वयंसेवी कार्यकर्ता मार्फत राहत सहित टोली पठेबाक निर्णय कैल गेल अछि।
अपन नंबर ९८१५७६२१३५ उपलब्ध करबैत दाता सँ निराजन अनुरोध कएलनि अछि जे जिनकार जे सहयोग पठेबाक हो ताहि लेल सम्पर्क कय सकैत छथि। २६ जुलाई केँ काठमांडु मे एहि राहत संकलन कार्य लेल एकटा चैरिटी शो केर सेहो प्रदर्शन कैल जेबाक जानकारी निराजन उपलब्ध करौलनि अछि।
