ऐतिहासिक मिथिला मध्यमा परिक्रमा आइ सँ शुरु
– मणीष कर्ण, जनकपुरधाम। मार्च ८, २०१६. मैथिली जिन्दाबाद!!
मिथिलाक ऐतिहासिक एवं धार्मिक आस्थाक रुप मे रहल मिथिला मध्यमा परिक्रमा आइ सँ सुरु भऽ रहल अछि। धनुषाक ठेरा कचुरी गामक मठ सँ मिथिला बिहारीक डोला सँग शुरु भेल आजुक राति जनकपुरधाम मे विश्राम करत। १५ दिन धरिक यात्रा केर ई परिक्रमा मिथिलाञ्चलक सब सऽ पैघ ऐतिहासिक आ धार्मिक यात्रा मानल जाएत अछि।
फागुुन शुक्ल चतुर्दशी (परिवा) तिथिक दिन भोरे कचुरी सऽ मिथिला बिहारीक डोलाक सँग शुरु भेल परिक्रमा दुपहरियामे जनकपुरक रत्नसागर मन्दिर मे पहुँचैत अछि। परिक्रमा में सहभागी तीर्थयात्री लोकनि रत्नसागर मन्दिर मे दिनका भोजन पश्चात् किछु समय ओत्तहि विश्राम कय जानकी मंदिर मे दर्शन करैत रात्रि विश्रामक लेल कुवा स्थित हनुमाननगर पहुँचैत छथि। राति भरि विश्राम उपरान्त वृहस्पति दिन ओहि पार मिथिलाक कल्याणेश्वर महादेव मन्दिर, कलनाक लेल प्रस्थान करैत अछि। तहिना जनकपुरक अग्नि कुण्ड सऽ किशोरी जीक डोला सेहो राति मे हनुमाननगर मे विश्राम करैत अछि आ दुनु डोला एक्कहि संग दिनक परिक्रमा करैत अछि।
