ॐ श्री परमात्मने नमः!!
श्री कृष्णचन्द्र भगवान की जय !!
गीताक दोसर अध्याय पर प्रवीण व्याख्या
प्रथम अध्याय मे अर्जुन द्वारा दुनू सेनाक मध्य सँ युद्ध लेल तैयार दुनू पक्ष पर दृष्टि देला उपरान्त दुनू पक्ष मे अपन कहेनिहार स्वजन-परिजन, सगा-सम्बन्धी, गुरुजन-श्रेष्ठजन आदि केँ देखिकय अपन भूमिका एक वीर धर्नुर्धर महारथी रूप मे विपक्ष दिश ठाढ़ अपनहि लोक पर हथियार चलबय पड़त, मारय पड़त, ई सब सोचि ओ एकदम हताश भ’ गेलाह । ओ सारथि श्री कृष्ण सँ युद्ध विरूद्ध तर्क सब दियए लगलाह । गीताक प्रथम अध्याय मे राजा धृतराष्ट्रक जे सञ्जय सँ संवाद आरम्भ मे आशय रहनि जे धर्मक्षेत्र रूप मे जानल जायवला कुरुक्षेत्र मे युद्ध लेल एकत्रित हमर आ पांडव पक्षक लोक पर क्षेत्रक प्रभाव नहि पड़ल जाहि सँ ई युद्ध रुकि जाइत, सैह भाव आ आवेश अर्जुन पर पड़ल बुझाइत अछि ।
दोसर अध्याय आरम्भ होइछ सञ्जय केर एहि कथन सँ –
‘तं तथा कृपयाविष्टमश्रुपूर्णाकुलेक्षणम् ॥
विषीदन्तमिदं वाक्यमुवाच मधुसूदनः ॥’
अर्थात् हुनका (अर्जुन केँ) जे कि ‘कृपया’ (दया सँ), ‘आविष्टम्’ (अभिभूत भ’ कय, व्यग्र भ’ कय, दुःखी भ’ कय, आदि), ‘अश्रुपूर्णाकुलेक्षणम्’ (नोरायल आँखि सँ), विषीदन्तम् (शोक सँ भरि गेल) छलाह – तिनका सँ ‘मधुसूदन’ (मधुनाम्ना असुरक वद्ध कयनिहार श्रीकृष्ण) – वाक्यमुवाच (ई वाक्य कहलनि) ।
ध्यान दियौक – अर्जुन वीर धनुर्धर हेबाक संग-संग शास्त्रनिपुण सेहो रहथि । गुरुजन व श्रेष्ठजनक प्रिय सेहो रहथि । महाभारत युद्ध सँ पहिने सेहो कतेको बेर बचाव वास्ते कौरवी सेना सँ युद्ध सेहो कएने रहथि । लेकिन महाभारत युद्ध जेहेन अन्तिम आ निर्णायक युद्ध बेर मे हुनका अपना लेल युद्धक बल सँ राज्य प्राप्तिक बेर मे दया, आर्द्रता, क्रन्दन, शोक (चिन्ता) भेलन्हि आ ओ गांडीव संग तीर-तरकस सब रथ मे नीचाँ पटैक देने रहथि ।
हम सामान्यजन कतेको बेर एहि तरहक मनोस्थिति मे रहैत छी । करबाक रहैछ कर्म, करय लगैत छी तर्क-चिन्तन ।
भगवान कृष्ण ताहि पर कहनाय आरम्भ कयलनि –
कुतस्त्वा कश्मलमिदं विषमे समुपस्थितम् ॥
अनार्यजुष्टमस्वर्ग्यमकीर्तिकरमर्जुन ॥
गीता मे ज्ञान-विज्ञान, न्याय-दर्शन, मीमांसा, कर्म सिद्धान्त, गुण-प्रकृति, सृष्टि निर्माण, देवता आ परमात्माक वर्णन सहित बहुते रास पक्ष सब पर प्रकाश देल गेल अछि । बहुते रास रहस्य सब सँ पर्दा उठायल गेल अछि । परञ्च, गौर करयवला बात ई अछि जे ई ज्ञान-दर्शन केहेन स्थिति मे उपदेशित भेल । अर्जुनक मनोदशा आ भगवानक प्रथम जबाब – यानिः
“कुतस्त्वा (कतय सँ), कश्मलमिदं (ई निराशा, उदासी) विषमे (युद्ध जेहेन दुरुह परिस्थिति मे) समुपस्थितम् (अहाँ लग उपस्थित भेल) ? अनार्यजुष्टम् (अनार्य सब जेकाँ), अस्वर्ग्यम् (स्वर्ग प्राप्तिक मानवीय लक्ष्यक विपरीत), अकीर्तिकरम् (कीर्तिकर केर विपरीत – भावार्थ दुर्भाग्यशाली, लज्जास्पद) अर्जुन ?”
स्पष्ट छैक जे भगवान कृष्ण अर्जुनक दयनीय अबस्था सँ छुब्ध भेलाह आ हुनका जबर्दस्त डाँट लगबैत बुझेनाय शुरू कयलनि । “ई सब कमजोरी विषय स्थिति मे केना आयल? तथा ई आर्यक लक्षण नहि भेल, ई मनुष्यक लक्ष्य प्राप्ति – यानि स्वर्ग प्राप्तिक विरूद्ध बात आ अकीर्तिकर – अत्यन्त निन्दनीय, दुर्भाग्यपूर्ण, लज्जास्पद बात भेल ।
एतबा नहि ! कृष्ण अर्जुनक उपरोक्त अबस्था पर आर तीक्ष्ण टिप्पणी करैत कहलनि –
क्लैब्यं मास्म गमः पार्थ नैतत्त्वय्युपपद्यते ॥
क्षुद्रं हृदयदौर्बल्यं त्यक्त्वोत्तिष्ठ परन्तप ॥
कृपया एक-एक शब्द पर ध्यान देल जाय –
क्लैब्यं – नामर्दगी, मास्म गमः – जुनि आनू, पार्थ – हे पृथाक पुत्र, नैतत्त्वय्युपपद्यते – एतत – एहेन, त्वयि – अहाँ मे, न उपपद्यते – खराबी करत, क्षु्द्रं – ओछ, हृदयदौर्बल्यं – दुर्बल हृदय केर बनब, त्यक्त्वोत्तिष्ठ – त्यक्ता – (एकरा सब केँ) त्यागिकय, उत्तिष्ठ – उठू, परन्तप – हे शत्रु सब केँ जराकय खाख करयवला (अर्जुन) !
ताहि पर अर्जुन तर्क प्रस्तुत करय लगलाह –
कथं भीष्ममहं संख्ये द्रोणं च मधुसूदन ॥
इषुभिः प्रतियोत्स्यामि पूजार्हावरिसूदन ॥
मुदा हम केना, एहि युद्ध मे, हे मधुसूदन, भीष्म आ द्रोण पर तीर चलाबी, जे सब बरु पूजा करय योग्य छथि, हे मधुसूदन ?
गुरूनहत्वा हि महानुभावान् श्रेयो भोक्तुं भैक्ष्यमपीह लोके ॥
हत्वार्थकामांस्तु गुरूनिहैव भुञ्जीय भोगान् रुधिरप्रदिग्धान ॥
एहि महान आत्माक स्वामी लोकनि केँ मारय सँ नीक भीख मांगिकय खेनाय होयत । आ जँ मारि दैत छी, तँ अहु संसार मे, हमर सम्पूर्ण सम्पदाक आनन्द-भोग एवं इच्छा पर खूनक दाग लागि जायत ।
न चैतद्विद्मः कतरन्नो गरीयो यद्वा जयेम यदि वा नो जयेयुः ॥
यानेव हत्वा न जिजीविषामस्तेऽवस्थिताः प्रमुखे धार्तराष्ट्राः ॥
आर, निस्सन्देह बड़ा मोस्किल सँ हम कहि सकैत छी जे कोन नीक होयत, जे हम (पांडव) सब ओकरा उपर विजय हासिल करी, या ओ (कौरव) सब हमरा सब पर विजय हासिल करय । एहि धृतराष्ट्रक पुत्र लोकनि केँ मारिकय हमरा सब केँ जिवितो रहय लेल नहि सोचबाक चाही, अपना आपो केँ चेहरा नहि देखबाक चाही ।
कार्पण्यदोषोपहतस्वभावः पृच्छामि त्वां धर्मसंमूढचेताः ॥
यच्छ्रेयः स्यान्निश्चितं ब्रूहि तन्मे शिष्यस्तेऽहं शाधि मां त्वां प्रपन्नम् ॥
हमर स्वभाव पर कमजोर सहानुभूति हावी भ’ गेल अछि, आर हमर मन मे कर्तव्यक मादे किछु सन्देह (ओझराहट) आबि गेल अछि, हम अहाँ सँ विनती करैत छी । अहाँ निर्णीत रूप सँ कहू जे हमरा लेल कि नीक अछि । हम अहाँक शिष्य छी । हम अहाँक शरण मे आयल छी, हमरा (उचित) निर्देशन (शिक्षा) देल जाउ ।
एतय स्वामी स्वरूपानन्द जीक टिप्पणी अत्यन्त ध्येय आ मननीय अछि हमरा सब लेल –
“धर्म कोनो चीजक ‘नेस’ (ness) थिक, कोनो वस्तुक अन्तर्विधान (आन्तरिक सिद्धान्त) केर नियम (कानून/कायदा) थिक । धर्मक पहिल अर्थ नेकी (अच्छाइ) या रिलीजन (religion) नहि अछि, बल्कि ई त बस एकर दोसर अर्थ अछि । सही काजक वास्ते लड़नाय क्षत्रिय केर धार्मिक कर्तव्य या धर्म थिक, जखन कि यैह काज एकटा ब्राह्मणक लेल पाप अछि, कियैक तँ ई ओकर अस्तित्वक सिद्धान्त (नियम) केर विपरीत अछि । तेँ अपन अस्तित्व केर नियमक हिसाब सँ कर्म करनाइये कोनो व्यक्तिक धर्म या मोक्ष केर रास्ता थिक । कर्मक मेघ (बादल) स्वयं (आत्मा) रूपी सूर्य केँ नजरि सँ नुका लैत अछि । जे साधन एहि बादक बात केँ बिना बढ़ेने खत्य कय दैत अछि आर एहि तरहें स्वयं केँ सही करय मे मदति करैत अछि, वैह धर्म थिक ।
अहाँक शिष्य: जाबत धरि ई घोषणा कय नहि देल जाइछ, गुरु लोकनि उच्च ज्ञान नहि दय सकैत छथि ।”
आब एहिठाम सँ गीताक उपदेश बुझू शुरू होइत अछि । आब श्रीकृष्ण कहनाय आरम्भ करैत छथि । कारण अर्जुनक मनक बात जे गुरुतुल्य श्रेष्ठजन सब केँ मारिकय राज्यक भोग करू, एहेन खूनक दाग लागल (कलंकित) राज्यक भोग सँ नीक जे भीख मांगिकय खायब, अपन जीवन पार लगा लेब, लेकिन गुरु सब पर तीर चलेनाय उचित नहि लगैछ । हम एहि कारण सँ युद्ध करय सँ मना कयल अछि ।
परञ्च, आखिर मे ओ अपन मनक कमजोरी सेहो स्पष्ट करैत छथि । कहैत छथि जे, “हमर स्वभाव पर कमजोर सहानुभूति हावी भ’ गेल अछि, आर हमर मन मे कर्तव्यक मादे किछु सन्देह (ओझराहट) आबि गेल अछि, हम अहाँ सँ विनती करैत छी । अहाँ निर्णीत रूप सँ कहू जे हमरा लेल कि नीक अछि । हम अहाँक शिष्य छी । हम अहाँक शरण मे आयल छी, हमरा (उचित) निर्देशन (शिक्षा) देल जाउ ।”
कमजोर सहानुभूतिक हावी होयब, कर्तव्यक मादे ओझराहट आयब, मुदा फेर स्वयं केँ शिष्यवत् जगद्गुरु श्री कृष्णक मार्गदर्शन व निर्णीत रूप सँ उचित निर्देशन देबाक आग्रह करैत छथि । एतय सँ अर्जुन शरणागतिक पथ पर अग्रसर होइत छथि । तेँ, हमरा विचार सँ गीताक उपदेश एहि पड़ाव उपरान्तक चर्चा मे होइछ ।
श्री कृष्ण अर्जुनक मिश्रित अबस्था देखि विहुंसिकय कहनाय आरम्भ करैत छथि –
“अहाँ ओकरा सब लेल शोच कय रहल छी जेकरा सब लेल शोच नहि करबाक चाही । तैयो अहाँ ज्ञानक बात बाजि रहल छी । ज्ञानीजन नहि तँ जिवित लेल, नहिये मृत् लेल शोक करैत छथि । हम, अहाँ या ओ सब – एहेन नहि छैक जे पहिने नहि रही, आ कि बाद मे फेर नहि होयब । आत्मिक अस्तित्व सदा सनातन रहैछ । जेना एहि शरीर मे बचपन, युवा आ बुढ़ापा रहैछ, तहिना दोसर शरीर भेटनाय सेहो होइछ । शान्त आत्मा एहि सब सँ धोखा मे नहि पड़ैछ ।…”
हम १३मा श्लोक धरिक बात लिखलहुँ । १४मा श्लोक सँ भगवान् ‘सत्’ आ ‘असत्’, यानि स्थायी आ अस्थायी अस्तित्वक सोदाहरण व्याख्या करब आरम्भ कयलनि । ज्ञानेन्द्रिय सभक क्षणिक अनुभूति सँ आत्मिक अनुभूतिक सदा-सनातन सत्यक अबस्था बीच मिहिन आ विस्तृत अन्तर पर प्रकाश दैत अर्जुनक मन-मस्तिष्क केँ अनुकूलित करैत रहलाह । बेर-बेर अर्जुनक जिज्ञासा बीच-बीच मे अबैत रहैछ । तदनुसार क्रमिक रूप सँ हरेक चीज पर श्री कृष्ण हुनका संबोधन-प्रबोधन करैत रहल छथि ।
गीताक दोसर अध्यायक प्रवीण व्याख्या – भाग २
(जे निरन्तर पढ़ि रहल होइ, हुनकहि सब लेल विशेष समर्पित)
हमरा बुझने गीता प्रवचन अध्याय २ केर ११मा श्लोक सँ दुःखी आ शोकग्रस्त अर्जुन केँ श्री कृष्ण द्वारा बुझेबाक-बौंसबाक लेल कहल गेल वचन सँ आरम्भ होइछ ।
हम मानव स्वयं कतेको बेर अनुभव करैत छी जे अपन धर्म आ कर्तव्य केँ नीक सँ बुझि कर्म करबाक समय बिल्कुल अर्जुन जेकाँ हाल मे चलि जाइत छी । अर्जुन केँ अचानक युद्ध मैदान ‘कुरुक्षेत्र’ मे कौरव व पांडव सेनाक बीच सँ दुनू दिश लड़बाक-मरबाक लेल उद्यत् लोक सब पर दया व आर्द्रताक भाव आबि गेलनि । ओ शास्त्र, पुराण, आदिक तर्क-क्रान्ति मे ओझरा गेलाह । मुंह सुखा गेलनि । आँखि नोरा गेलनि । गांडीव पटैक देलाह । झूर-झमास भ’ कय रथ मे अपन स्थान पर मानू खसि पड़लाह । युद्धकर्म नहि करब । एहेन राज्य नहि भोगब जाहि पर रक्तक दाग लागल हो । बरु भीख मांगिकय खायब । बहुते बात सब बजलाह । सामान्यजनक दृष्टि सँ हुनकर एकहु टा बात काटय योग्य नहि अछि ।
मुदा श्री कृष्णक पहिल प्रतिक्रिया मे ‘विषम परिस्थिति मे ई कमजोरी पार्थ अर्जुन मे केना आयल’ तेहेन विस्मय आ एक तरहें हुनका फटकारैत एक्कहि बेर ‘ब्रह्मज्ञान’ केर महत्वपूर्ण उपदेश दय देलाह ।
विदित हो, सांख्य दर्शन मे ब्रह्मज्ञानक निरूपण ज्ञानी ऋषि-मुनि कएने छथि । एहि अनुसार ‘आत्मा-परमात्मा’ केर समझ हमरा सब केँ प्राप्त होइछ ।
अर्जुन भीष्म पितामह आ गुरु द्रोण जेहेन महान आत्माधारी पूज्य श्रेष्ठजन सहित सम्पूर्ण सम्बन्धी केँ दु-बगली सेना मे युद्धातुर अबस्था मे देखि अपना केँ एहेन कर्म सँ किनार करय चाहलाह । मुदा श्री कृष्ण हुनकर मनोदशा केँ बुझैत अनुकूलनक श्रेष्ठ सिद्धान्त केँ अपनौलनि । दोसर अध्यायक प्रवीण व्याख्याक पहिल भाग मे एहि सब पर चर्चा भेल छल । आब आगाँ देखू –
ब्रह्मज्ञानक संछिप्त रूप
ज्ञानीजन न जीवित लेल शोक करैत छथि आ न मरल लेल । हम सब पहिने नहि रही, एखनहिं टा छी, फेर बाद मे नहि रहब – तेहेन नहि होइत छैक । हे वास्तविक ‘हम’ (आत्मा) छी, से सदा-सनातन रहल, अछि आ रहत । ई जाहि शरीर मे रहैछ, ओ जेना बचपन, जबानी आ बुढ़ापा देखैत अन्त मे मरि जाइछ; त ‘हम’ पुनः नव शरीर मे प्रवेश कय जाइत छी । शान्त आत्माक ज्ञानी लोक एहि ज्ञान सँ परिचित छथि, ओ सब तेँ कोनो धोखा मे नहि पड़ैत छथि ।
जाड़-गर्मी, सुख-दुःख आदि इन्द्रिय केर विषय सँ संसर्गक कारण होइछ । ई आरम्भ होइछ, फेर अन्त भ’ जाइछ । आरम्भ-अन्त, अनित्य (क्षणिक), बस गम्भीरतापूर्वक झेलैत चलू । सुख आ दुःख दुनू मे शान्त रहू । धीरता जरूरी अछि । जे एहि द्वंद्व सँ व्यथित (परेशान) नहि होइछ, समत्वबुद्धि रखैछ ओ अमरत्व केँ प्राप्त करैछ ।
असत् ओ जे हमेशा लेल नहि टिकैछ । परिवर्तन होइत रहैत छैक । सत् ओ जे कहियो खत्म नहि होइछ । सदैव अपरिवर्तनशील रहैछ । परमसत्य केर जानकार एहि दुनू केँ जनैत छथि । ‘अविनाशी’ – सत् आ असत् एहि टा सँ भरल अछि । ई निश्चयपूर्वक जानि लिय’ जे ओ अविनाशी अछि । एहि अटल सत्य केँ नष्ट करबाक सामर्थ्य केकरहु मे नहि छैक । देहक अन्त अछि मुदा देह भीतर रहयवला ‘अविनाशी’ शरीरी (आत्मा) केर अन्त कहियो नहि होइछ । ओ ‘नित्य’ अछि । आत्मा केँ नित्य, अविनाशी आ अप्रमेय अछि ।
उपरोक्त सत्य केँ अनुभूति करैत हे अर्जुन ! अहाँ युद्ध करू ।
आत्मा नहि त मरैत अछि, नहिये मारैत अछि । जे एकरा मारयवला कि मरयवला बुझैत अछि – एहि दुनू मे सँ कियो यथार्थ बात नहि जनैछ । आत्मा न जन्म लैछ, नहिये मरैत अछि । ई अजो (बिना जन्म केँ), नित्य (सदा रहयवला), शाश्वत (कहियो नहि बदलयवला), पुराण (सदिखन एकसमान) रहैछ । ‘अयं न हन्यते हन्यमाने शरीरे’ – जखन शरीर मरैछ त ई नहि मरैछ । जे एना जनैत अछि जे ई अविनाशी, नित्य, आजन्मल, अव्यय अछि – ‘कथं स पुरुषः पार्थ कं घातयति हन्ति कम्’ – कहू हे पार्थ ! ओ पुरुष केना केकरो मारि सकैछ वा केकरो द्वारा मरबायल जा सकैछ ?
कृष्ण ओहि अविनाशी पुरुष यानि आत्मा केँ नहि त अर्जुन मारयवला भ’ सकैत छथि, नहिये स्वयं श्री कृष्ण हुनका युद्ध करबाक निर्देशन दय युद्धकर्म मे लगाकेँ मरबाबयवला भ’ सकैत छथि । अर्जुन केँ ‘ब्रह्मज्ञान’ दैत ई स्पष्ट भेल अछि एहिठाम ।
वसांसि जीर्णानि यथा विहाय नवानि गृह्णाति नरोऽपराणि ॥
तथा शरीराणि विहाय जीर्णान्यन्यानि संयाति नवानि देही ॥२-२२॥
नैनं छिन्दन्ति शस्त्राणि नैनं दहति पावकः ॥
न चैनं क्लेदयन्त्यापो न शोषयति मारुतः ॥२-२३॥
अच्छेद्योऽयमदाह्योऽयमक्लेद्योऽशोष्य एव च ॥
नित्यः सर्वगतः स्थाणुरचलोऽयं सनातनः ॥२-२४॥
अव्यक्तोऽयमचिन्त्योऽयमविकार्योऽयमुच्यते ॥
तस्मादेवं विदित्वैनं नानुशोचितुमर्हसि ॥२-२५॥
ब्रह्मज्ञान केर वर्णन करैत ई चारि गोट श्लोक हमरा अत्यन्त महत्वपूर्ण लागैछ । एकर भाव छैक –
जेना लोक पुरान कपड़ा त्यागि नव कपड़ा धारण करैछ, तहिना आत्मा जीर्ण शरीर छोड़ि नव शरीर धारण करैछ । एकरा शस्त्र सँ काटल नहि जा सकैछ, आगि सँ जरायल नहि जा सकैछ, पानि सँ भिजायल नहि जा सकैछ, हवा सँ सुखायल नहि जा सकैछ । नहिये काटल जा सकैछ, न जरायल जा सकैछ, न भिजायल जा सकैछ, न सुखायल जा सकैछ । कखनहुँ नहि बदलयवला (हमेशा अपरिवर्तित), हर स्थान पर उपस्थित (सर्वव्याप्त), आ न हिलयवला (अचल), आत्मा सदा-सनातन रहयवला अछि । एहि (आत्मा) केँ अव्यक्त, अकल्पनीय आर अपरिवर्तनीय कहल गेल छैक ।
तेँ, एकरा एना बुझिकय, अहाँ केँ शोक नहि करबाक चाही ।
ब्रह्मज्ञानक बाद भौतिकतावादी पक्ष सेहो बुझबैत छथि श्री कृष्ण आ अर्जुन सँ कहैत छथि –
“मुदा जँ अहाँ एकरा लगातार जन्मय आ मरयवला मानैत छी, तैयो, हे महाबाहु, अहाँ केँ एकरा लेल शोक नहि करबाक चाही ।”
एतय कृष्ण, तर्क लेल, भौतिकवादी सोच केँ लैत छथि, आर देखबैत छथि जे जँ आत्मा सेह किछु समय लेल होइ, तैयो दुःख खत्म भ’ जेबाक चाही, कियैक तँ ओहि स्थिति मे कोनो परलोक नहि होयत, कोनो पाप नहि होयत, कोनो नरक नहि होयत ।
फेर दोसर पंक्ति जोड़ैत छथि
जातस्य हि ध्रुवो मृत्युर्ध्रुवं जन्म मृतस्य च ॥
तस्मादपरिहार्येऽर्थे न त्वं शोचितुमर्हसि ॥२-२७॥
ओ जे जन्म लेने अछि, ओकर मृत्यु पक्का अछि; जे मरि गेल अछि, ओकर जन्म सेहो पक्का अछि । तेँ, जे हेबाके टा अछि, ताहि लेल अहाँ केँ दुःखी नहि हेबाक चाही ।
तदोपरान्त अनुमान पद्धति सँ यथास्थिति केँ बुझयवला तर्क दैत श्री कृष्ण कहैत छथि –
अव्यक्तादीनि भूतानि व्यक्तमध्यानि भारत ॥
अव्यक्तनिधनान्येव तत्र का परिदेवना ॥२-२८॥
हे भारत, सब जीव अपन आरम्भ मे बिना देखेने (यानि अव्यक्त रूप मे), अपन बीच केर हालत मे देखायल (व्यक्त), आर अपन अन्त मे फेर बिन देखेने होइत अछि । त फेर दुःख केर कोन बात छैक ?
आत्माक वर्णन करैत श्री कृष्णक ई अकाट्य वचन ध्येय अछिः
आश्चर्यवत्पश्यति कश्चिदेनमाश्चर्यवद्वदति तथैव चान्यः ॥
आश्चर्यवच्चैनमन्यः शृणोति श्रुत्वाप्येनं वेद न चैव कश्चित् ॥२-२९॥
किछु लोक आत्मा केँ विलक्षण मानैत अछि । दोसर एकरा विस्मयकारी (आश्चर्यजनक) कहैत अछि । किछु आरो लोक एकरा एकटा आश्चर्य जेकाँ सुनैत अछि । आर किछु लोक, सुनितहु, एकरा एकदमे नहि बुझैत अछि ।
आर बेर-बेर अर्जुनक विषाद केँ समाप्त करबाक लेल श्री कृष्ण निर्णीत स्वर मे हुनका सँ युद्धकर्म लेल तत्पर हेबाक लेल तैयार करैत रहैत छथि । यथा –
देही नित्यमवध्योऽयं देहे सर्वस्य भारत ॥
तस्मात्सर्वाणि भूतानि न त्वं शोचितुमर्हसि ॥२-३०॥
हे भरत केर वंशज, ई सभक शरीर मे रहयवला सदैव अविनाशी अछि । अत: अहाँ केँ कोनो प्राणीक वास्ते शोक नहि करबाक चाही ।
वर्ण आ स्वधर्म आधारित शिक्षा
“स्वधर्मपि चावेक्ष्य न विकम्पितुमर्हसि ॥” – अपन धर्म केँ देखैतो अहाँ केँ नहि डगमगेबाक चाही, कियैक तँ क्षत्रिय लेल धर्मयुद्ध सँ बढ़िकय किछु नहि होइछ । (यानी, क्षत्रिय केर कर्तव्य अछि जे ओ अपन देश, प्रजा आर धर्म केर हित मे लड़य ।) हे पृथापुत्र, क्षत्रिय सचमुच भाग्यशाली अछि, जेकरा एहेन युद्ध मे लड़बाक लेल बजायल जाइत छैक जे स्वर्गक खुजल द्वार जेकाँ बिना मंगनहि आबि जाइत छैक । मुदा जँ अहाँ एहि धर्मयुक्त युद्ध मे भाग लय सँ मना करब, त अपन धर्म आ प्रतिष्ठा हरेबाक कारण अहाँ केँ पाप लागत । दुनिया सेहो अहाँक एहि अकीर्ति (अकर्मण्यता) केँ हमेशा खराब मानत । प्रतिष्ठित लोक वास्ते (अकीर्ति – अकर्मण्यताक) बदनामी मरइयो सँ खराब होइत छैक । बड़का-बड़का रथी-योद्धा लोकनि यैह विश्वास करता जे अहाँ डराकय युद्ध सँ पाछाँ हंटि गेलहुँ । आर जे लोक सब अहाँक बारे मे बहुत पैघ बात सब सोचने छथि ओहो सब अहाँ केँ तुच्छ (नीच) बुझताह । अहाँक दुश्मन पर्यन्त अहाँक महान शक्तिक निन्दा करैत अहाँक बारे मे एहेन बात कहत जे कहबाक योग्य नहि अछि । एहि सँ बेसी बर्दाश्तक बाहर आर कि भ’ सकैत अछि ? मरिकय अहाँ स्वर्ग पबैत छी; जीतिकय अहाँ पृथ्वी पर आनन्द लैत छी । तेँ, हे कुन्तीपुत्र, युद्ध करबाक निश्चय कय केँ उठू ।”
युद्धकर्म सँ पाप होइत छैक – अर्जुन अपन शोकग्रस्त होयबा मे पाप केँ सेहो एकटा बहाना रूप मे प्रस्तुत कएने रहथि । तेँ श्री कृष्ण हुनकर हरेक दुविधा केँ ओहि अनुरूपे स्पष्ट कय रहल छथि । ब्रह्मज्ञान आ स्वधर्म उपरान्त पापकर्म सँ बचबाक लेल श्रीकृष्ण कहलनि –
सुखदुःखे समे कृत्वा लाभालाभौ जयाजयौ ॥
ततो युद्धाय युज्यस्व नैवं पापमवाप्स्यसि ॥२-३८॥
दुःख आ सुख, लाभ आ हानि, जीत आ हार केँ एक मानिकय, अहाँ युद्ध मे लागि जाउ । तखन अहाँ केँ कोनो पाप नहि लागत ।
आब आगू देखू –
भगवान् कृष्ण स्वयं कि कहि रहल छथि –
एषा तेऽभिहिता सांख्ये बुद्धिर्योगे त्विमां शृणु ॥
बुद्ध्या युक्ता यया पार्थ कर्मबन्धं प्रहास्यसि ॥२-३९॥
“अहाँ केँ आत्म-साक्षात्कार (सांख्य दर्शनक बुद्धियोग) केर ज्ञान कहल गेल अछि । आब अहाँ (ओहेन) योग केर ज्ञान केँ सुनू, जाहि ज्ञान सँ सम्पन्न भ’ कय, हे पृथापुत्र, अहाँ कर्म केर बन्धन सब केँ तोड़ि देब ।”
गीताक दोसर अध्यायक प्रवीण व्याख्या – भाग ३
जेना कि अपने सब जानि रहल छी जे अर्जुन युद्धभूमि मे दुइ सेनाक मध्य ठाढ़ सारथि श्री कृष्णक चलायल रथ मे झूर-झमास भ’ कय बैसि रहलाह – बहुते रास तर्क देलनि – गुरु, पितामह, स्वजन, पुत्र आदिक हत्या केना करब आ युद्धक परिणाम जीते जँ हो त ओ कलंकित रहत, बरु भीख मांगि लेब, मुदा युद्ध नहि लड़ब कहला उपरान्त कृष्णदेव सर्वप्रथम हुनका बुझेलनि जे देह कि होइछ आ आत्मा कि होइछ । देह मरैछ, आत्मा अमर अछि । तेँ ई सब चिन्ता मे एकदम नहि पड़ू । तदोपरान्त मनुष्यक वर्ण अनुसार स्वधर्म नीक, क्षत्रिय रूपी अर्जुन लेल युद्धकर्मे नीक, ब्राह्मण जेकाँ भीख मांगिकय खा लेब, युद्ध नहि लड़ब आदि उचित नहि । स्वधर्म श्रेयस्कर हेबाक बात कहलनि । आत्मा आ देह केर ज्ञान केँ सांख्य दर्शनक बुद्धियोग कहल जाइछ । आत्मसाक्षात्कार केर ज्ञान कहल जाइछ । आगू योग केर ज्ञान पर श्री कृष्ण बुझेता से घोषणा कयलनि ।
स्वामी स्वरूपानन्द जी अपन टिप्पणी मे लिखलनि अछि –
योग: कर्म-योग, या आचरण केर ओ योजना जे पैछला कर्म सब केँ पूरा करय मे, नव कर्म सब केँ संचित (जमा) नहि करय मे आ पूरा इच्छाशक्तिक संग आत्म-साक्षात्कार लेल प्रयास करबाक वास्ते सुरक्षित करैत अछि । एहि विद्या मे, जीवन मे व्यक्तिक एकमात्र उद्देश्य आत्म-साक्षात्कार होइत छैक; ताहि सँ कोनो आर चीजक कोनो महत्व नहि देल जाइत छैक । एहि तरहें सब कार्य बिना कोनो आसक्ति या परिणाम केर परवाह कएने बिना कयल जाइत छैक । तेँ कोनो नव कर्म नहि कयल जाइत छैक; मात्र पहिनहिं सँ संचित कयल गेल कर्म टा समाप्त होइत रहैत छैक । आर संगहि, पूरा इच्छाशक्ति केँ मात्र आत्म-साक्षात्कार प्राप्त करबाक लेल समर्पित होयबाक लेल स्वतंत्र छोड़ि देल जाइत छैक ।
पैछला श्लोक सब, ११-२५ मे, कृष्ण सब सँ उच्च ज्ञान, प्राचीन ब्रह्मज्ञान केर दृष्टिकोण देलनि अछि । २६म आ २७म मे हमरा सब केँ पूर्णतया भौतिकवादी दृष्टिकोण भेटैत अछि । श्लोक २८ सँ ३७ मे दुनियादारीक बारे मे कहल गेल अछि । ३८म श्लोक मे हमरा सब केँ योग केर उम्मीद प्राप्त होइत अछि । आर आगू जे अछि, ताहि मे हमरा सब केँ जीवन केर दर्शन मे श्री कृष्ण केर अपन योगदान भेटैत अछि ।
“एहि (योग) मे नहि त अधूरा प्रयास केर बर्बादी होइत छैक आर नहिये उल्टा फल (परिणाम) भेटैत छैक । एहि धर्म केर कनियो टा अंश सेहो महान आतंक सँ रक्षा करैत अछि ।”
“एहि (कर्म-योग) मे, हे कुरुवंशी, बस एक्के टा सुनिश्चित बात छैक । जे निर्णय नहि कय पबैछ ओकर उद्देश्य अनगिनत आ कतेको भाग मे बँटल रहैत छैक ।”
कर्म-योग मे, एकमात्र उद्देश्य छैक जे स्वयं केँ प्राप्त करू (आत्म-साक्षात्कार करू) ।
जे निर्णय नहि कय पबैछ (यानी सब सँ नीक “सर्वश्रेष्ठ” केर बारे मे), ओ अपना आप केँ छोट आदर्श (कार्य सब) मे लगा दैत अछि, जाहि मे सँ कोनो टा सन्तोष नहि दय सकैत छैक । एहि तरहें ओ एक योजना सँ दोसर योजना मे जाइत रहैत अछि ।
‘यामिमां पुष्पितां वाचं प्रवदन्त्यविपश्चितः’ – अर्थात् हे पार्थ, अल्पज्ञानी सब जे एहि फूल समान आकर्षक बात सभक विस्तारपूर्वक वर्णन करैत रहैत अछि, वेदवादरत (यानि वेदक वर्णित कथ्य सब मे रत – आसक्त) लोक बाकी किछो नहि होइछ से घोषणा करैत रहैछ, से कामना (इच्छा सब) सँ भरल स्वर्ग प्राप्ति केँ अन्तिम लक्ष्य मानिकय कयल गेल कर्मक फलस्वरूप बेर-बेर जन्म प्राप्तिक फल पबैत रहैछ; ओ भोग आ ऐश्वर्यक प्राप्ति हेतु ‘क्रियाविशेषबहुलां’ – विभिन्न कर्मकांडीय कर्म – रीति, अनुष्ठान, आदि करैत रहैछ । भोग आ ऐश्वर्य सँ गहींर आसक्तिक चलते ओकर चित्त अपहृत (हरण) भ’ जाइत छैक, व्यवसात्मिका बुद्धि हेबाक चलते ओकरा समाधि (मनक शान्ति) नहि भेटि पबैत छैक ।
व्यवसायात्मिका बुद्धिः भोग-ऐश्वर्य प्राप्तिक निमित्त चंचल मन अनेकों कामना (इच्छा) सभक पूर्ति लेल ई करू, ओ करू, कि करू, नहि करू तेहेन स्थिति मे रहल करैछ । अनेकों तरहक सुख-भोग प्राप्तिक इच्छा सँ भ्रमित चित्त निश्चय अस्थिर बुद्धिवला भेल करैत छैक । एहेन लोक केँ समाधि (मनक शान्ति, समत्व आ स्थिरता) नहि भेटि पबैत छैक ।
ई बहुत महत्वपूर्ण आ मननीय तथ्य थिक, ई हमरा सभक लेल बेर-बेर मननीय अछि । एहि दोसर अध्यायक ४२ सँ ४४मा श्लोक केँ स्वामी स्वरूपानन्द कनेक भिन्न तरहें अनुवाद कएने छथि, वाक्य-संरचना केँ ओ अपना तरहें निम्नरूप मे रखने छथि – एक बेर एहि पर सेहो गौर करूः
“हे पार्थ, जे लोक सुख आ शक्तिक पाछाँ बहुत बेसी लागल रहैत अछि, आर जेकर समझ अज्ञानी लोकक आकर्षक बात द्वारा आकर्षित कय लेल जाइत छैक (अर्थात् अज्ञानी लोकक आकर्षक बात सब मे जेकर समझशक्ति – विवेक फँसि गेल करैत छैक), जे कतेको तरहक इच्छा (कामना) सब सँ भरल रहैत अछि आर स्वर्ग केँ अपन सब सँ पैघ गन्तव्य (प्राप्त होयबला उद्देश्य) मानैत अछि आर वेदक स्तुतिपरक शब्द (वेद-स्तोत्र जे विभिन्न देवता लोकनिक प्रशंसा करयवला शब्दभाव सँ भरल अछि) ताहि सब मे आनन्द उठबैत कहैत अछि जे आर बाकी किछु अछिये नहि, ओकर मन मे दृढ़निश्चय इच्छा (निश्चयात्मक बुद्धि) नहि बनि पबैछ । ओकरा पास फूल सन (आकर्षक) बात सब सुख आ शक्तिक साधन केर रूप मे कोनो खास रीति (कर्मकांड) सब सँ भरल रहैत छैक आ ओकर (सकाम भाव सँ कयल गेल) कर्मक परिणामस्वरूप नव जन्म सभक कारण भेल करैत छैक ।”
उपर समाधि केर माने “मन” सँ जोड़ल गेल अछि । एहि शब्दक सामान्यतया मानल जायवला अर्थ (गहींर ध्यान सँ उत्पन्न होयबला ईश्वर-चेतना मे डुबि गेनाय) सेहो ओतबेक एकरूप वला आ प्रसन्नता प्रदान करयवला अर्थ देत; सुख आर शक्तिक पाछाँ लागल लोक दिव्य ध्यान मे मन केँ पूरापूरी स्थिरता नहि पाबि सकैत अछि ।
वेदक स्तुतिपरक बात – वेद केर कर्म-कांड या यज्ञ वला भाग जे खास कर्म आर ओकर फल लेल खास नियम (रीति) बतबैत अछि आर एकर बिना वजह बेसी प्रशंसा करैत अछि ।
कर्मकांडक आलोचना विभिन्न तरहें आजुक समाज मे भेटैछ । गहींर विश्लेषण स्वयं श्री कृष्ण द्वारा एहि ४२-४४ श्लोक धरि भेल अछि । भोग आ ऐश्वर्यक प्राप्ति लेल लेकिन वेदक कथन कर्मकांडक आवश्यकता रहितो, एकर अन्तिम परिणाम कतेक प्रतिकूल अछि से स्पष्ट कयल गेल अछि । संगहि, स्वर्ग केँ अन्तिम लक्ष्य बुझनिहार अपनहिं सँ अपने अनेकों कर्मक बन्धन निर्माण करैत जन्म-मृत्युक चक्कर मे फँसल रहैछ ।
हमरो सब संग ई स्थिति स्पष्ट रूप सँ देखि-बुझि आ गुनि सकैत छी । कतेको बात नीक सँ बुझितो समाधिस्थ होयबाक बदले सांसारिक उलझन मे फँसल रहैत छी । क्षणिक सुख आ आनन्दक लेल किछो करय लेल तत्पर रहल करैत छी । परञ्च दूरगामी दृष्टि राखब त एहि सँ उपर उठहे टा पड़त ।
वेद द्वारा भोग, ऐश्वर्य, विभिन्न कामना आदिक प्राप्ति निमित्त अनेकों मार्गदर्शन केँ अन्तिम सत्य नहि कहि सकैत छी, परञ्च ओहो सत्य अछि तेकरा नहि काटि सकैत छी । आब एहि श्लोक पर गौर करू –
त्रैगुण्यविषया वेदा निस्त्रैगुण्यो भवार्जुन ॥
निर्द्वन्द्वो नित्यसत्त्वस्थो निर्योगक्षेम आत्मवान् ॥२-४५॥
वेद तीन गुण केर बारे मे कहैत अछि । हे अर्जुन, अहाँ गुण सभक तिकड़ी सँ मुक्त भ’ जाउ । द्वंद्व (विपरीतार्थक शब्दक जोड़ा) सँ मुक्त भ’ जाउ । हमेशा सन्तुलित (नित्यसत्त्वस्थ) रहू । पेबाक आ रखबाक इच्छा (क्षेम) सँ मुक्त (निर्योग) भ’ जाउ, तथा आत्मवान् बनू (स्वयं मे स्थिर रहू) ।
गुण सांख्य दर्शन केर एकटा तकनीकी शब्द थिक जेकरा वेदान्त सेहो एहि अर्थक संग उपयोग करैत अछि । प्रकृति तीन गुण सब सँ बनल अछि; सत्व (इक्विलिब्रियम), रजस (अट्रैक्शन), तमस (इनर्शिया) । प्रकृति केर तीनटा गुण छैक, एहेन नहि छैक जे ओ (प्रकृति) ओकरा सब मे छैक । गुण केर अशुद्ध अनुवाद (माने) क्वालिटी छैक; ई सब्सटेंस (पदार्थ) केर संग क्वालिटी (गुण), मैटर (द्रव्य) आ फोर्स (बल) सेहो छैक । जेतय कतहु नाम आ रूप छैक, ओतय गुण छैक । गुण केर अर्थ रस्सी सेहो होइत छैक, जे बान्हैत अछि । – स्वामी स्वरूपानन्द
एकटा उदाहरण दैत छथि भगवान् कृष्ण – ई ब्राह्मणक सम्बन्ध मे अछि । चूँकि वेदक सर्वथा सेवक-अध्येता ब्राह्मणक प्रथम कर्तव्य रूप मे निर्धारित अछि, तथापि भगवान् कृष्ण एतय ब्राह्मणक सत्य रूप केँ व्याख्या करैत अर्जुन केँ बुझेलनि अछि –
“जे ब्राह्मण स्वयं केँ जानि लेने छथि, हुनका वास्ते सबटा वेद ओतबे काजक अछि, जतेक बाढ़ि एलापर कोनो पोखरि केर ।”
जाहि व्यक्तिक पास आत्मज्ञान होइत छैक ओकरा वेद केर कोनो जरूरत नहि छैक । मुदा, एकर मतलब ई नहि जे वेद बेकार अछि; बस ब्रह्म केँ जननिहार लेल ओकर कोनो महत्व नहि छैक, कियैक तँ ओहि सँ भेटयवला किछु समय केर सुख स्वयं केँ जानि लेबाक (आत्मज्ञान प्राप्त कय लेबाक) अनन्त आनन्द मे भेटि जाइत छैक ।
एकर बाद पुनः भगवान् कृष्ण अर्जुन सँ फराक दृष्टिक वृत्तान्तक वर्णन करैत कहैत छथि –
कर्मण्येवाधिकारस्ते मा फलेषु कदाचन ॥
मा कर्मफलहेतुर्भूर्मा ते सङ्गोऽस्त्वकर्मणि ॥२-४७॥
अहाँक अधिकार मात्र कर्म करब अछि; मुदा ओकर (कर्मक) फल पर किन्नहुं नहि । अहाँ (अपन) कर्म केर फल केर उत्पादक जुनि बनू; नहिये अपन आसक्ति केँ अकर्मण्यता (कर्महीनता) दिश जाय दिय’ ।
अहाँ उत्पादक आदि नहि बनू: अर्थात् फल केर इच्छा सँ कर्म जुनि करू, कियैक तँ इच्छा सँ कयल गेल कर्महि सँ फल या बन्धन उत्पन्न होइत अछि ।
योगस्थः कुरु कर्मणि सङ्गं त्यक्त्वा धनञ्जय ॥
सिद्ध्यसिद्ध्योः समो भूत्वा समत्वं योग उच्यते ॥२-४८॥
हे धनंजय, योग मे स्थिर रहिकय, आसक्ति छोड़िकय, सफलता आर असफलताक चिन्ता कएने बिना कर्म करू । मन केर यैह एकरूपता (समत्व भाव) (सफलता व असफलताक सम्बन्ध मे) योग कहाइत अछि ।
दूरेण ह्यवरं कर्म बुद्धियोगाद्धनञ्जय ॥
बुद्धौ शरणमन्विच्छ कृपणाः फलहेतवः ॥२-४९॥
(इच्छाक संग) कर्म करब, मन केँ बिना परिणामक विचार सब सँ परेशान भेने बिना कयल गेल कर्म सँ कतहु बेसिये निम्नतर अछि । हे धनंजय, मन केर एहि समत्व भाव (एकरूपता) मे शरण लिय’ । ओ लोक खराब अछि जे परिणामक लेल कर्म करैत अछि ।
बुद्धियुक्तो जहातीह उभे सुकृतदुष्कृते ॥
तस्माद्योगाय युज्यस्व योगः कर्मसु कौशलम् ॥२-५०॥
मन केर एहि समत्व भाव सँ मनुष्य एहि जीवन मे स्वयं केँ खराब आ नीक दुनू सँ मुक्त कय लैत अछि । तेँ, अहाँ स्वयं केँ एहि योग मे लगा दिय’ । योग टा कर्मक कुशलता थिक ।
खराब आ नीक दुनू सँ एक जेकाँः कर्म-योग केँ मानयवला केँ कोनो काजक लेल कोनो निजी हेतु (उद्देश्य) नहि भ’ सकैत छैक । बिना हेतु केँ हमरा लोकनिक कर्म बेरंग (रंगहीन) भ’ जाइछ, ओहि मे खराब या नीक केर गुण नहि रहैत छैक ।
कर्मक कुशलता: कर्मक स्वभावे छैक बन्धन उत्पन्न कयनाय । कर्म-योग कर्मक कुशलता छी, कियैक तँ ई नहि केवल कर्म बन्हबाक ताकत केँ खत्म करैत अछि, बल्कि ओकरा मुक्तिक एक गोट प्रभावशाली माध्यम सेहो बनबैत अछि ।
कर्मजं बुद्धियुक्ता हि फलं त्यक्त्वा मनीषिणः ॥
जन्मबन्धविनिर्मुक्ताः पदं गच्छन्त्यनामयं ॥२-५१॥
एहि समत्व मन वला बुद्धिमान लोक, अपन कर्मक फल केँ छोड़िकय, जन्मक बन्धन सँ हमेशाक लेल मुक्त भ’ कय, ओहि स्थिति मे चलि जाइत अछि जे सबटा खराबी सँ दूर अछि ।
यदा ते मोहकलिलं बुद्धिर्व्यतितरिष्यति ॥
तदा गन्तासि निर्वेदं श्रोतव्यस्य श्रुतस्य च ॥२-५२॥
जखन अहाँक बुद्धि भ्रम केर दाग सँ आगाँ निकलि जायत, तखन अहाँ सुनल गेल आ सुनल जायवला चीज सभक बारे मे बेपरवाह भ’ जायब ।
भ्रम केर दाग: स्वयं केँ गैर-स्वयं, अहंकार केर संग चिन्हब ।
श्रुतिविप्रतिपन्ना ते यदा स्थास्यति निश्चला ॥
समाधावचला बुद्धिस्तदा योगमवाप्स्यसि ॥२-५३॥
जखन अहाँक बुद्धि, जे विचार सभक टकराहट सँ एम्हर-ओम्हर भटैक रहल छल, स्थिर भ’ जायत आ स्वयं मे दृढ़ता सँ स्थापित भ’ जायत, तखन अहाँ केँ आत्म-साक्षात्कार भेटि जायत ।
गीताक दोसर अध्यायक प्रवीण व्याख्या – भाग ४
हमरा बुझने गीताक दोसर अध्याय गीताज्ञानक मेरुदण्ड थिक । कारण, एहि अध्याय मे विषाद आ शोक सँ ग्रसित अर्जुनक आँखि सँ बहैत अश्रुधारा केँ रोकबाक संगहि हुनका बौंसबाक-बुझेबाक आ युद्ध लेल तैयार करबाक कार्य श्री कृष्ण केँ करय पड़लन्हि । तेँ, हिसाब सँ देखल जाय त दोसरहि अध्याय मे अर्जुन केँ ब्रह्मज्ञान, सांख्य दर्शन, कर्म योग केर सिद्धान्त, स्थितप्रज्ञ आदिक सविस्तार वर्णन करैत बेर-बेर युद्धकर्म सँ पाप नहि हेबाक वचन दैत एहि समयोचित कर्म जेँ करबाक लेल उद्यत् कयल गेलनि ।
दोसर अध्यायक प्रवीण व्याख्याक पूर्णता लेल एहि चारिम लेख (भाग) मे हम सब स्थिरबुद्धिक सम्बन्ध मे चर्चा करब । पैछला भाग केर चर्चा मे ५३मा श्लोक मे भगवान कृष्ण अर्जुन सँ कहलनि जे जखन अहाँक बुद्धि एम्हर-आम्हर केर बात सँ शान्ति-स्थिर भ’ जायत तखन अहाँ केँ आत्मसाक्षात्कार भेटि जायत । त एहि पर अर्जुनक मन मे जिज्ञासा जगलन्हि – ओ अपन मनक बात रखैत कहलनिः
स्थितप्रज्ञस्य का भाषा समाधिस्थस्य केशव ॥
स्थितधीः किं प्रभाषेत किमासीत व्रजेत किम् ॥२-५४॥
अर्जुन कहलनि:
हे केशव, समाधि मे डूबल रहल, स्थिर बुद्धिवला आदमीक कि वर्णन अछि ? दोसर दिश, स्थिर बुद्धिवला आदमी केना बजैत अछि, केना बैसैत अछि, केना चलैत अछि ?
अर्जुन पुछि रहल छथि, (१) समाधि मे रहला पर ज्ञानी आदमी (स्थिर बुद्धिवला लोक) केर मनक हालत केहेन होइत छैक ? आर (२) समाधि सँ बाहर रहला पर ओकर व्यवहार पर एकर असर केना देखाइत छैक ?
स्थिर बुद्धि: प्रत्यक्ष अनुभूति (सीधा अनुभव) सँ भेटयवला स्वयं केर पहिचान ब्रह्म संग हेबाक दृढ़ विश्वास ।
तत्पश्चात् श्री भगवान कहलनि –
प्रजहाति यदा कामान्सर्वान्पार्थ मनोगतान् ॥
आत्मन्येवात्मना तुष्टः स्थितप्रज्ञस्तदोच्यते ॥२-५५॥
हे पार्थ, जखन कोनो लोक मनक सारा इच्छा केँ पूर्णतया त्याग कय दैछ, आर केवल आत्मा मात्र सँ सन्तुष्ट भ’ जाइत अछि, तखन ओकरा स्थिर बुद्धि वला (स्थितप्रज्ञ) कहल जाइत छैक ।
अर्जुनक पूछल समस्त जिज्ञासा केँ शान्त करबाक लेल कृष्ण अपन कहब निरन्तरता मे रखैत छथि –
“जेकर मन कठिन घड़ी मे नहि डगमगाइछ, जे सुखक पाछाँ नहि भागैछ, जे प्रेम, भय एवं क्रोध सँ मुक्त अछि, ओ दृढ़ ज्ञानवल (स्थिरबुद्धि) मुनि थिक । (मुनि – अर्थात् ध्यान करयवला मनुष्य ।) जे हर जगह अनासक्त रहैछ, नीक प्राप्ति सँ प्रसन्न नहि होइछ, आ न खराब सँ परेशान होइछ, ओकर बुद्धि स्थिर रहैत छैक । जखन कछुआ जेकाँ, ओ अपन सबटा अंग केँ खिचिकय, इंद्रिय सब केँ ओकर चीज सब सँ पूर्ण रूप सँ हंटा सकैत अछि, त ओकर बुद्धि स्थिर भ’ जाइत छैक । संयमी मनुष्य सँ वस्तु सब दूर भ’ जाइत अछि आर लालसा सब सेहो पाछाँ छुटि जाइत अछि । मुदा जे परम (परमात्मा) केँ देखि लैत अछि, ओकरो लालसा सब समाप्त भ’ जाइत छैक । हे कुंतीपुत्र, अशांत इंद्रिय सेहो पूर्णताक खोज मे लागल बुद्धिमान लोकक मन केँ एकदम बेतरतीब ढंग सँ हरण कय लैत अछि । जे दृढ़ निश्चयी अछि, ओ ओहि सबटा (अशान्त इंद्रिय सब) केँ नियंत्रण मे कयकेँ, सर्वोच्च मानिकय हमरहि मे ध्यान लगाकय बैसैत अछि । जेकर इंद्रिय सब वश मे छैक, ओकर बुद्धि स्थिर अछि । चीज सभक बारे मे सोचला सँ मनुष्य मे ओकरा सब प्रति लगाव उत्पन्न होइत छैक । लगाव सँ चाह उत्पन्न होइत छैक । आ चाह सँ तामस बढ़ैत छैक । तामस (क्रोध) सँ भ्रम (दुविधा, वहम) होइत अछि, आर भ्रम सँ स्मरणशक्ति हरा जाइत अछि । स्मरण हरा गेला सँ बुद्धिक नाश (बुझनाय खत्म) भ’ जाइछ, आ बुद्धिक नाश भेलापर ओ (स्वयं) खत्म भ’ जाइछ ।”
एहि महान उक्ति आ सन्देश केँ हम सब एना बुझी –
एकटा सुन्दर तस्वीर सोझाँ अबैछ । मनक आदति ओकरा दोहराकय देखयवला होइत छैक । फेर, अगर ओहि तस्वीर केँ बेर-बेर आबय देल जाय, त पसिन पड़य लगैछ । पसिन बढ़ला सँ ओकर लग एबाक, ओकरा हासिल करबाक इच्छा, (हासिल नहि भेलापर) तामश चढ़ब, तामश मन केँ सन्देह मे पाड़ि दैछ, जे पहिनेक अनुभव सँ सिखल समझदारीक बात सब पर पर्दा डालि दैत अछि । आर, एहि तरहें अपन नैतिक मानक (स्टैन्डर्ड) सँ दूर भ’ कय, ओ अपन समझ केर उपयोग नहि कय पबैछ । समझ मे चूक (फेल) भेला पर, ओ बिना सोचने-बुझने (अविवेकी जेकाँ), जोश मे आबिकय काज करैत अछि, आर नैतिक मरण केर रास्ता बनबैत अछि । अर्थात् नाशोन्मुख भ’ गेल करैछ ।
एहि तरहें कृष्ण नैतिक गिरावट केर पता ओहि पहिल साँस सँ लगबैत छथि जे मन मे धीरे-धीरे लगभग अन्जानहि मे अबैत अछि ।
कृष्ण आगू कहैत छथि –
“मुदा आत्म-नियंत्रित मनुष्य, इंद्रिय सब केँ संयमित कयकेँ आर आकर्षण (राग) तथा द्वेष सँ मुक्त भ’ केँ वस्तु सभक बीच घुमितो शान्ति प्राप्त करैत अछि । शान्ति मे, सबटा दुःख नष्ट भ’ जाइत छैक । कियैक तँ जे शान्तचित्त अछि ओकर बुद्धि जल्दिये दृढ़ भ’ जाइत छैक । अस्थिर व्यक्ति केँ (स्वयं केर – आत्मा केर) ज्ञान नहि होइत छैक । आ न ओकरा मे ध्यान होइत छैक । ध्यान नहि करनिहार केँ शान्ति नहि भेटैत छैक । आर शान्तिक बिना लोक केँ खुशी केना भेटि सकैत छैक ? कियैक तँ, मन, जे भटकैत रहल इंद्रिय सभक पाछाँ चलैत अछि, ओकर समझ केँ ओनाही दूर लय जाइत छैक, जेना हवा पानि पर नाव केँ ओकर रास्ता (निर्धारित मार्ग) सँ दूर लय जाइत छैक । तेँ, हे महाबाहो, ओकर ज्ञान स्थिर छैक, जेकर इंद्रिय सब अपन विषय सब सँ पूरा तरीका सँ नियंत्रित छैक ।”
एकर मतलब ई नहि अछि जे इंद्रिय सब पूरे तरीका सँ अलग-थलग रहैत छैक, बल्कि ई छैक जे ओ सब अपन स्वेच्छा कयला सँ अलग-थलग रहैत छैक ।
आर देखू –
“जे सब प्राणीक लेल राति अछि, ताहि मे आत्म-नियंत्रित लोक जागैत अछि । जाहि मे सब प्राणी जागैत अछि, ओ आत्म-द्रष्टा मुनिक लेल राति अछि ।”
जेतय सब प्राणी अन्हार मे रहैछ, ओतय मुनि देखैत छथि, आर एकर उल्टा सेहो होइत छैक । ज्ञानी लोकक चेतना ईश्वर सँ एतबे भरल रहैत छैक जे ओ हुनका अलावा किछु नहि देखि सकैछ । दोसर दिश, अज्ञानी लोक मात्र बहुजनक दुनिया मे रहैत अछि आर ईश्वर ओकरा लेल किछु होइत छथि ।
एकर मतलब अछि, जे प्रकृति केर प्रभाव सँ दूर रहनाय, यानि पूर्ण आत्म-नियंत्रण (जेकरा बारे मे श्लोक ६८ मे कहल गेल अछि) ज्ञानी आत्मा केर ओतबेक प्राकृतिक गुण छैक जतेक कि एकर उलटा अज्ञानी केर ।
पुनः कृष्ण अपन उपदेश निरन्तरता मे रखैत स्थितप्रज्ञक सन्दर्भित अर्जुनक प्रश्न केर जवाब दैत कहैत छथि –
“जेना समुद्र मे – जे लबालब भरल अछि आ शान्त अछि – पानि बहैत छैक, तहिना जाहि मुनि मे सबटा इच्छा सब समा जाइत अछि, हुनका शान्ति भेटैत अछि, नहि कि इच्छा सब केँ चाहनिहार केँ ।”
समुद्र पर चारू दिश सँ बहैत पानिक कोनो प्रभाव नहि पड़ैत छैक । तहिना, मात्र वैह लोक सचमुच मे शान्ति पबैत अछि जेकरा मे धरती पर रहबाक दरम्यान भेटयवला भोग-विलास केर चीज-वस्तु सँ कोनो इच्छा उत्पन्न नहि होइत छैक ।
“जे आदमी बिना कोनो चाहत केर, सबटा इच्छा सब केँ छोड़िकय, “हम” आ “हमर” केर भावनाक बिना जिबैत अछि, ओकरा शान्ति भेटैत छैक । हे पृथापुत्र, यैह ब्रह्म मे रहबाक केकरहु स्थिति थिक । ई पाबिकय कियो भ्रमित नहि होइत अछि । एहि मे स्थित भ’ कय, जीवनक अन्त मे पर्यन्त, मनुष्य ब्रह्म केर संग एक भ’ जाइत अछि ।”
ब्रह्म संग एकाकार धरिक बात कहैत दोसर अध्याय जेकरा सांख्ययोगक वर्णन उपाधि सँ विद्वान् लोकनि अलंकृत कएने छथि, से पूरा होइत अछि ।
हरिः हरः!!
