किसलय कृष्ण, समाचार संपादक, मैथिली जिन्दाबाद!
सहरसा, अगस्त १७, २०१५.
सोझे सभास्थलसँ!!
खाकी, कजरी आ करिया बर्दीधारी आयोजन स्थले टा नहि अपितु सहरसाक जर्रा-जर्रामे परेड कय रहल अछि । चिन्हार-अनचिन्हार नेताक पोस्टरसँ पटल अछि सहरसाक सड़कक दुनू कात । दिल्लीसँ पहुँचल एसपीजी टीम मुख्य सभास्थलक कमान अपना संग रखने अछि, जखन कि बिहारक प्राय: सभ जिलाक पुलिस पदाधिकारी सहरसा मे तैनात अछि । आब देखबाक अछि जे काल्हि मोदीजी की सभ उपहार दैत छथि मिथिलाकेँ ।मोदीजी सँ क्षेत्रक जनताकेँ अनेकों आशा:
सहरसा मे एम्स – कोसी पनबिजली उद्योग योजनाक विस्तार – सिंचाई लेल समुचित नहर विस्तार – किसान केँ राहत लेल व्यवस्था – कोसीक्षेत्र सहित समस्त मिथिला क्षेत्र मे पूर्वहि समान औद्योगिक विकास – रोजगारक समुचित अवसरक निर्माण – मधेपुरा मे प्रस्तावित रेल कारखाना – निर्मली सँ फारबिसगंज धरिक बड़ी रेल लाइन केर शुरुआत - कोसी तटबंध केर सुरक्षा आ बाढिक स्थायी निदान – जुट सहित अन्य नकदी फसल केर संवर्धन लेल क्षेत्र केँ विशेष कृषि विकास एवं कल्याण पैकेज – कोसी-गंगा केर बाट सँ कोलकाता बंदरगाह धरि पनिया जहाज आ जल-परिवहन केर महात्वाकांक्षी योजना पर कार्यारंभ, जलकृषि मे मत्स्य आ मखान पर विशेष ध्यान – एहेन तरहक सैकड़ो विकासक परियोजना पर केन्द्र सरकार समय-समय पर किछु न किछु घोषणा करैत आयल अछि, कतेक रास काजो शुरुआत भऽ चुकल अछि। मुदा राज्यक उपेक्षा सँ त्रस्त एहि क्षेत्रक जनता केँ वर्तमान मोदी सरकार सँ अत्यधिक अपेक्षा छैक।
मिथिला परंपरा सँ प्रधानमंत्री मोदीक होयत स्वागत:
मैथिली जिन्दाबाद सँ बात करैत आयोजक समितिक व्यवस्थापक कहलनि जे मिथिलाक एहि क्रान्तिभूमि सहरसा मे प्रधानमंत्री मोदीक स्वागत पूर्वहि समान अहू बेर मिथिलाक विशेष शुभ-प्रतीक पाग एवं मखानक माला पहिराय कैल जायत। विदित हो जे मिथिला मे माछ, मखान एवं पानक विशिष्ट भूमिका रहैत अछि जे प्रत्येक शुभ कार्य मे प्रयोग कैल जाइत अछि। प्रधानमंत्री मोदी जाहि अभियान पर छथि – ओ जाहि तरहें राष्ट्रवाद केर बढावा दय रहला अछि ताहि मे मिथिलाक स्थान उच्च अछि आ विश्व भरि एकर प्रचार होयबाक आवश्यकता अछि। प्रधानमंत्री द्वारा अपन विदेशक मित्र सबकेँ मिथिला चित्रकला केर उपहार भेंट करबाक उदाहरण केँ स्मृति करैत स्वयं मिथिलावासी मे अपन अस्मिताक एहेन गूढ चिन्तन निश्चिते एकटा सुनहरा भविष्यक संकेत करैत अछि।मैथिली जिन्दाबाद केर प्रतिनिधिक तौर पर समाचार संपादक किसलय कृष्ण केँ भेटल स्पेशल प्रेस-पास:
आयोजक एवं प्रशासनक विशेष सिफारिश पर ‘मैथिली जिन्दाबाद’ केर प्रतिनिधिक तौर पर समाचार संपादक किसलय कृष्ण केँ प्रधानमंत्रीक एहि महत्वपूर्ण कार्यक्रम मे प्रतिनिधित्व करबाक अवसर देल गेल अछि। मात्र चुनित पत्रकार केँ एहि सुविधाक लाभ देल गेल अछि। मैथिली जिन्दाबाद एहि लेल आभार सहित धन्यवाद ज्ञापन करैत अछि आ अपन गुणस्तर सदैव निरपेक्ष एवं निर्भीक राखि राष्ट्र एवं राष्ट्रीयताक हित मे रखबाक वचनबद्धता प्रकट करैत अछि।
