मिथिला सौन्दर्य प्रतियोगिताक औडिशन कार्यक्रम जनकपुर मे सम्पन्न – ६० प्रतियोगी सहभागिता देलनि

तहिना चर्चित संचारकर्मी एवं मूल-मौलिकताक पृष्ठपोषण करनिहार युवा अभियानी घनश्याम मिश्र कहलनि, “‘मिथिला सौन्दर्य प्रतियोगिता’ नाम अनुसारक काज कयलक अछि। फैशनक नाम पर जनकपुरधाम मे बहुतो कार्यक्रम सभ भेल आ भ’ रहल देखल गेल मुदा पहिल बेर संभवतः जनकपुरधाम मे PRZ Group and Event Company Pvt. Ltd द्वारा आयोजन भ रहल “मिथिला सौन्दर्य प्रतियोगिता”क ऑडिसन केँ अप्पन मिथिला-मैथिली प्रति के जिम्मेवारी बोध करैत सुन्दर आयोजनक तैयारी भ’ रहल प्रसन्नता के विषय थिक । आयोजनकर्ता आ सम्बद्ध समस्त युवा-युवती भाइ-बहिन सबकेँ अग्रिम बधाई । एहि सुन्दर आयोजनक सफलताक कामना सेहो । ई सभक लेल अनुकरणीय हो ।”

ओना त सौंसे सोशल मीडिया मे एखन जेम्हर देखू तेम्हर एहि प्रतियोगिताक चर्चा भेटत । एहि क्रम मे नवीन झा लिखने छथि, “PRZ Group & Envent Co. Pvt. Ltd द्वरा मिति ८ गते शनि दिन सम्पन्न मिथिला सौन्दर्य प्रतियोगिता औडिसन कार्यक्रम मे ६० जना किशोर तथा किशोरी सब मिथिलाक अद्भुत पहिरन-ओढन लगाकय विभिन्न मिथिला कला सब प्रस्तुत कयलनि । ई प्रतियोगिता मिथिलाक पहिचान आ युवा युवती सब मे हेराइत जा रहल अपन गरिमामयि इतिहास प्रति जिम्मेदारी बोध करबैत भविष्य मे मैथिल पहिचान केँ आर मजगूत बनेबाक काज भेल अछि । जनकपुरधाम मिथिलाक राजधानी रहल मान्यता अछि आ एहि तरहक गतिविधिक आयोजन स्वयं मे महत्वपूर्ण अछि । आयोजक केँ विधेष धन्यवाद एवं शुभकामना दियए चाहब आ मिथिला सम्बन्धी एहने कार्यक्रम सब केँ निरन्तरता देबाक लेल अग्रिम शुभकामना सेहो देब ।”