अमित आनन्द, महिषीधाम। जुलाई ८, २०१५. मैथिली जिन्दाबाद!!
साहित्य अकादमी सँ सम्मानित साहित्यकार उपेन्द्र नाथ झा व्यास केर पौत्र मयंक कुमार झा सिविल सर्विस परीक्षा मे मैथिली विषय सँ सफलता प्राप्त केलनि अछि। एक सुशिक्षित आ प्रतिष्ठित पारिवारिक पृष्ठभूमिक जुझारू छात्र मयंक ऐच्छिक विषय मे अपन मातृभाषाक चुनाव केलनि। माता मनु रानी इतिहास सँ एमए आ पिता सत्येन्द्र कुमार झा बिहार सरकारक पुरातत्त्व विभाग मे पुरातनविद् छथि, जखन कि मयंक केर पितामह उपेन्द्र नाथ झा व्यास साहित्य अकादमी द्वारा सम्मानित आ पेशा सँ मुख्य अभियंता पीएचइडी छलाह। मयंक पिछला एक वर्ष सँ नौकरी छोड़िकय तैयारी करबाक लेल भरपूर पढाई केलनि, पटना सँ पीटी केर तैयारी, फेर दिल्ली जाय मेन्स केर तैयारी आ साक्षात्कारक राउन्ड मे कैल गेल प्रदर्शन सँ आत्मसंतोष नहियो रखैत ओ अपन सफलता सँ काफी प्रसन्न छथि। एहि सँ पूर्वो मे ओ प्रयास कएने छलाह, असफलता सँ सफलता दिशि जयबाक आनन्द अलगे छैक, ओ अपन व्यक्तिगत भावना रखैत छथि।मयंक स्वयं मेकेनिकल ईन्जिनियरिंग एन आइ टी जमशेदपुर सँ बीटेक पूरा केलाक बाद टाटा मोटर्स लिमिटेड मे सहायक प्रबंधक पद पर कार्यरत सेहो छलाह। मयंक अपन ईन्जिनियरिंग कालेज केर ओहि दलक सदस्य सेहो रहलाह अछि जेकरा नासा द्वारा यूएवी (unmanned aerial vehicle) डिजाइन बनेबाक लेल सम्मानित कैल गेल छल। मातृभाषा मैथिली सँ सहज अन्य भाषा नहि भऽ सकैत अछि आ निश्चित रूप सँ रैंकिंग नीक आनय मे एकर मार्क्स सहायक हेबाक भावना मयंक रखैत छथि। मयंक केर मूलग्राम हरिपुर बक्शीटोल अछि आर एहि गामक माटि – पानि मे सरस्वतीक विशेष कृपा होयबाक बात काफी प्रचलित अछि।
विदित हो जे एहि बेर सिविल सर्विसेज परीक्षा मे कुल १५ छात्र ऐच्छिक विषय मैथिली सँ सफलता प्राप्त केलनि अछि। मैथिली भाषाभाषी लेल ई एकटा उत्साहक विषय भेल जे भाषाक भविष्य सुरक्षित रखबा मे रोजगारक प्रमुख भूमिका केँ वर्तमान सकारात्मक परिणाम जोगा सकल अछि। मैथिली जिन्दाबादक तरफ सँ समस्त सफल अभ्यर्थी आ भविष्य मे सेहो जे एहि लेल प्रयास करता, तिनका सबहक लेल विशेष प्रशंसाक संग शुभकामना सेहो बेर-बेर देल जा रहल अछि। मैथिली जिन्दाबाद!!
