युवा एकता सहरसा ‘एम्स’ केर स्थापना लेल लगातार जिला भरिक गाम-गाम आ चौक-चौक पर घूमिकय लोक सब मे जागृति पसारि रहल अछि। आइ अल ईन्डिया इस्लाहे केर अंजुमन सिद्दिकी सेहो एहि अभियान मे युवा एकताक संग जुड़ि गेलाह। ओ कहला जे, “सहरसा मे होय एम्स केर स्थापना – एहि लेल राज्य सरकार आ केन्द्र सरकार दुनू आपस मे तालमेल बैसाबय। एहि आन्दोलन मे सहरसाक सब जाति आ धर्मक लोक – बच्चा-बच्चा हाथ मे झंडा लऽ के क्रान्ति लेल तैयार अछि।” युवा एकताक नेतृत्वकर्ता सब चारूकात घूमि-घूमिकय लोक सब केँ एम्स केर जरुरत सहरसा मे कोन तरहक छैक से बता रहल अछि, जनमानस केर मोन मे एकटा नव आशा उत्पन्न भेल अछि जे स्वास्थ्य परीक्षण आ गंभीर रोगक इलाज हेतु जे पटना आ दिल्ली जेबाक बाध्यता छल, कतेको लोक जमीन-जथा सब बेचि लैत छल से आब एहि युवा आ समस्त जन-प्रतिनिधिक संयुक्त प्रयास संग जनताक माँग भेला पर सहरसे मे स्थापित होयत एम्स आ सब समस्याक समाधान निकैल जायत।आइ बरियाही मे आयोजित रैली मे युवा एकताक दीपनारायण ठाकुर, राहुल बनगाँव, रोशन कुँअर, शाहनवाज आ रणवीर यादव सहित स्थानिय जनमानस मे सँ अनेको वक्ता सभाकेँ संबोधित करैत सहरसा मे एम्स केर माँग पूरा करबाक लेल पटना आ दिल्ली धरि घेराव करबाक जरुरत होयत तऽ ताहि लेल सब कियो तैयार हेबाक बात कहलनि। विदित हो जे सहरसा मे एम्स केर स्थापना लेल युवा एकता पिछला एक महीना सँ निरन्तर प्रयास मे लागल अछि। हलाँकि एहि आन्दोलन मे राज्यक सोझाँ कोनो ज्ञापन पत्र आदि सौंपल जाइत अछि वा नहि, एहि माँग प्रति कैल जा रहल अभियानक संज्ञान राज्य सरकार लैत अछि वा नहि, एहि सब दिशा मे आन्दोलनकारीक प्रवक्ता चुप्पी सधने अछि जे एहि आन्दोलनक एकटा कमजोर पक्ष मानल जा सकैत अछि। मुदा क्रान्तिक नवधारा सहरसा सँ बहत एकरा कियो नहि रोकि सकैत अछि ई जानकारी हिनका लोकनिक प्रतिबद्धता सँ जगजाहिर भऽ रहल अछि।
