४. जखन नारदजी ई सब समाचार सुनलनि त ओ कौतुकता सँ हिमाचलक घर पहुँचलाह। पर्वतराज हुनकर बड़ा आदरपूर्वक चरण पखारिकय हुनका उत्तम आसन देलनि। फेर अपन स्त्री सहित मुनिक चरण मे सिर नमाकय आर चरणोदक केँ चारूकात घर मे छिड़काव करैत हिमाचल अपन सौभाग्यक खूब बखान कयलथि। पुनः ओ बेटी पार्वती केँ बजाकय मुनिक चरण मे राखि देलथि आर कहलथि, “हे मुनिवर! अपने त्रिकालज्ञ और सर्वज्ञ थिकहुँ, अहाँक सब तैर पहुँच अछि। तेँ अहाँ हृदय मे विचारिकय एहि कन्याक भाग्यक गुण-दोख कहू। 

९. मुनीश्वर कहलखिन – हे हिमवान्‌! सुनू, विधाता जे किछु ललाट पर लिखि देलाह अछि ओकरा देवता, दानव, मनुष्य, नाग और मुनि कियो नहि मेटा सकैत अछि। तैयो हम एक उपाय अहाँ केँ बतबैत छी। जँ दैवक सहयोग भेटत त ओ सिद्ध भ’ सकैत अछि। उमा केँ वर तँ निःसन्देह ओहने भेटतनि जेहेन हम वर्णन कयलहुँ, मुदा हम वरक जे-जे दोष बतेलहुँ, हमरा हिसाब सँ ओ सब शिवजी मे छन्हि। जँ शिवजीक संग विवाह भ’ जाइन त दोषहु केँ लोक गुणहि समान कहत। जेना विष्णु भगवान शेषनागक शय्या पर सुतैत छथि, तैयो पण्डित लोक हुनका कोनो दोष नहि लगबैत छथि। सूर्य और अग्निदेव नीक-बेजा सब तरहक रस केर भक्षण करैत छथि, मुदा हुनका कियो बेजा नहि कहैत छन्हि। गंगाजी मे शुभ और अशुभ सब जल बहैत अछि, धरि कियो हुनका अपवित्र नहि कहैत छन्हि। सूर्य, अग्नि और गंगाजीक भाँति समर्थ केँ किछु दोष नहि लगैत अछि। जँ मूर्ख मनुष्य ज्ञान केर अभिमान सँ एहि तरहक होड़ करैत छथि त ओ कल्प भरि लेल नरक मे पड़ि गेल करैत छथि। भला कहूँ जीवो ईश्वर समान सर्वथा स्वतंत्र भ’ सकैत अछि की? गंगा जल सँ बनायल गेल मदिरा केँ कहियो जानि-बुझि संत सब पान नहि करता। मुदा वैह गंगाजी मे मिल गेलापर जेना पवित्र भ’ जाइत अछि, ईश्वर और जीव मे सेहो तहिना भेद अछि। शिवजी सहजहि समर्थ छथि, कियैक त ओ भगवान छथि, ताहि लेल एहि विवाह मे सब प्रकारे कल्याणहि होयत। परञ्च महादेवजीक आराधना बड़ा कठिन अछि, तैयो क्लेश (तप) कयला सँ ओ  बहुत जल्दी भ’ जाइत छथि। जँ अहाँक कन्या तप करथि त त्रिपुरारि महादेवजी होनहार केँ मेटा सकैत छथि। यद्यपि संसार मे वर अनेक अछि मुदा हिनका लेल शिवजी केँ छोड़िकय दोसर वर नहि अछि। शिवजी वर देनिहार, शरणागत सभक दुःख केँ नाश करनिहार, कृपाक समुद्र आ सेवक सभक मोन केँ प्रसन्न करनिहार छथि। शिवजीक आराधना कएने बिना करोड़ों योग और जप कयलोपर वांछित फल नहि भेटैत छैक। 

१२. एतेक कहिकय मैना पतिक चरणपर मस्तक राखि देलीह। तखन हिमवान्‌ हुनका प्रेमपूर्वक कहलथि – चाहे चन्द्रमा मे अग्नि प्रकट भ’ जाय लेकिन नारदजीक वचन झूठ नहि भ’ सकैत अछि। हे प्रिये! सबटा सोच-विचार केँ छोड़िकय श्री भगवान केर स्मरण करू, जे पार्वतीक रचा कयलनि अछि वैह कल्याणो करता। आब जँ अहाँक बेटी पर प्रेम अछि त जाय केँ ओकरा ई शिक्षा दियौक जे ओ एहेन तप करय जाहि सँ शिवजी ओकरा भेटि जाइथ। नारदजीक वचन रहस्य सँ युक्त और सकारण अछि आर शिवजी समस्त सुन्दर गुणक भण्डार छथि। एना विचारिकय अहाँ मिथ्या सन्देह केँ छोड़ू। शिवजी सब तरहें निष्कलंक छथि।

१६. प्राणपति शिवजीक चरण केँ हृदय मे धारण कय केँ पार्वतीजी वन मे जाय तप करय लगलीह। पार्वतीजी केर अत्यन्त सुकुमार शरीर तपक योग्य नहि छलन्हि, तैयो पतिक चरण केँ स्मरण कय केँ ओ सब भोग केँ तेजि देलीह। स्वामीक चरण मे नित्य नया अनुराग उत्पन्न हुए लगलनि आर तप मे एहेन मोन लागि गेलनि जे शरीरक सब सुधि-बुधि बिसरा गेलनि। एक हजार वर्ष धरि ओ मूल आ फल खेलीह, फेर सौ वर्ष साग खाकय बितेलीह। किछु दिन जल और वायु केँ भोजन कयलीह आर फेर किछु दिन कठोर उपवास कयलीह, जे बेलक पात सुखाकय धरती पर खसि पड़ैत छल वैह खाकय तीन हजार वर्ष धरि रहि गेलीह। तेकर बाद ओ सुखायल पत्तो खायब छोड़ि देलीह, तहिये पार्वतीक नाम ‘अपर्णा’ भ’ गेलनि।

१७. तप सँ उमाक शरीर क्षीण देखिकय आकाश सँ गंभीर ब्रह्मवाणी भेल – हे पर्वतराजक कुमारी! सुनू, अहाँक मनोरथ सफल भेल। अहाँ आब सम्पूर्ण असह्य क्लेश (कठिन तपस्या) केँ छोड़ि दिअ। आब अहाँ केँ शिवजी भेटताह। हे भवानी! धीर, मुनि और ज्ञानी बहुत भेलथि लेकिन एतेक कठोर तपस्या कियो नहि कयलनि। आब अहाँ एहि श्रेष्ठ ब्रह्माक वाणी केँ सदा सत्य और निरंतर पवित्र जानिकय अपन हृदय मे धारण करू। जखन अहाँक पिताजी बजबय आबथि तखन सारा हठ छोड़िकय घर चलि जायब आर जखन अहाँ केँ सप्तर्षि भेटथि तखन एहि वाणी केँ ठीक बुझि जायब।

१९. याज्ञवल्क्यजी भरद्वाजजी सँ कहलथि – हम अहाँ केँ पार्वतीक सुन्दर चरित्र सुनेलहुँ, आब शिवजीक सुहाओन चरित्र सुनू। जहिया सँ सती अपन शरीर त्यागि देलथि तहिये सँ शिवजीक मन मे वैराग्य भ’ गेलनि। ओ सदा श्री रघुनाथजीक नाम जपय लगलाह आर जतय-ततय श्री रामचन्द्रजीक गुण सभक कथा सुनबय लगलाह। चिदानन्द, सुख के धाम, मोह, मद और काम सँ रहित शिवजी सम्पूर्ण लोक केँ आनंद देनिहार भगवान श्री हरि (श्री रामचन्द्रजी) केँ हृदय मे धारण कय भगवानक ध्यान मे मस्त होइत पृथ्वी पर विचरन करय लगलाह। ओ कतहु मुनि लोकनि केँ ज्ञानक उपदेश करथि आर कतहु श्री रामचन्द्रजीक गुण सभक वर्णन करथि। यद्यपि सुजान शिवजी निष्काम छथि, तैयो ओ भगवान अपन भक्त (सती) केर वियोगक दुःख सँ दुःखी छथि।

२०. एहि प्रकारे बहुतो समय बीति गेल। श्री रामचन्द्रजीक चरण मे नित नव प्रीति भ’ रहल अछि। शिवजीक कठोर नियम, अनन्य प्रेम और हुनकर हृदय मे भक्तिक अटल टेक केँ जखन श्री रामचन्द्रजी देखलनि तखन कृतज्ञ (उपकार मानयवला), कृपालु, रूप और शील केर भण्डार, महान्‌ तेजपुंज भगवान श्री रामचन्द्रजी प्रकट भेलथि। ओ बहुतो तरहें शिवजी केर सराहना कयलनि आर कहलनि जे अहाँ बिना एहेन कठिन व्रत दोसर के निबाहि सकैत अछि। श्री रामचन्द्रजी ने बहुतो प्रकार सँ शिवजी केँ बुझेलनि आर पार्वतीजीक जन्म हेबाक कथा सेहो सुनेलनि। कृपानिधान श्री रामचन्द्रजी विस्तारपूर्वक पार्वतीजी केर अत्यन्त पवित्र तपस्याक वर्णन कयलथि।