गाम गाम लगाउ दहेज मुक्त मिथिला के बैनर आ दहेज मुक्त विवाह केँ बढावा दियौक

१९ मार्च २०२२ । मैथिली जिन्दाबाद!!

सामाजिक संजाल सँ संचालित अभियान दहेज मुक्त मिथिला द्वारा प्रत्येक सदस्य सँ अपन-अपन गाम मे एकटा बैनर लगबेबाक आग्रह कयल गेल अछि। एहि बैनर मे बैनर प्रायोजक अपन फोटो आ व्हाट्सअप नम्बर देथि, ताहि नम्बर मार्फत दहेज मुक्त विवाह केर प्रस्ताव (वैवाहिक परिचय, फोटो, आदि सहित) प्राप्त करथि आ तदनोपरान्त समूह पर संकलित किंवा प्रेषित परिचय व प्रस्ताव मे सँ या फेर नव-नव परिचय स्वयं पोस्ट करैत आपस मे वैवाहिक जोड़ी मिलानीक कार्य केँ जनस्तर पर करथि। एहि तरहें बहुतो लोक केर लम्बित विवाह आ समय पर उपयुक्त कथा नहि भेटबाक समस्याक निदान होयत। ई बात दहेज मुक्त मिथिलाक संस्थापक प्रवीण नारायण चौधरी कहलनि। हुनका द्वारा कयल गेल आह्वान निम्न अछिः

बैनर मे कि सब लिखबाक अछि तेकर एक प्रारूप संलग्न बैनर डिजाइन मार्फत राखि रहल छी, दहेज मुक्त विवाह केँ बढावा देबाक लेल वैवाहिक परिचय प्रस्ताव अहाँ अपन या हमर व्हाट्सअप नम्बर मार्फत मंगा सकैत छी। हमर व्हाट्सअप नम्बर नेपाल के नम्बर थिकः +9779801722981, अहाँ सेहो अपन नम्बर दय सकैत छियैक। आर प्राप्त वैवाहिक परिचय-प्रस्ताव समूह केर कोर ग्रुप धरि पहुँचय, समूह पर पोस्ट हुए, तदनुसार उचित जोड़ी मिलानी करय मे हम-अहाँ स्वयं सम्बन्धित पक्ष लेल चौकन्ना भ’ समाधानक विकल्प अर्थात् हुनका लायक समुचित जोड़ीक वैवाहिक परिचय-प्रस्ताव, समूह सँ प्राप्त फीडबैक केर आधार पर दय सकैत छियनि। एहि तरहें ई मुहिम बहुत बेसी कारगर सिद्ध होयत। हमरा विश्वास अछि जे एहि तरहें जन-जन मे अभियानक लोकप्रियता सेहो बढत। त लगे हाथ एहि पुण्यक काज मे सहयोग करू। आउ, अभियान केँ हाथ-सँ-हाथ जोड़ैत सौंसे मिथिला धरि पसारू।