बटुकनाथ झा, जनकपुर। १६ सितम्बर, २०१८. मैथिली जिन्दाबाद!!
जनकपुरधाम–पटना बस सेवा संचालन शुरू
नेपालके प्रदेश नं. २ के राजधानी जनकपुरधाम सँ भारत बिहार राज्यक राजधानी पटना लेल आइ सँ जनकपुर पटना मैत्री बस सेवा संचालनमे आयल अछि । प्रदेश नं. २ केर मुख्यमन्त्री लालबाबु राउत तथा जनकपुरधाम उपमहानगरपालिकाक नगर प्रमुख लालकिशोर साह द्वारा बस केँ संयुक्त रुप सँ हरियर झण्डा देखा पटनाक लेल रवाना कयल गेल अछि ।
गत बैसाख २८ गते अर्थात ११ मई केर दिन भारतीय प्रधानमन्त्री नरेन्द्र मोदी तथा नेपालक प्रधानमन्त्री केपी ओली जनकपुर अयोध्या बस सेवा केँ हरियर झण्डा देखा उद्घाटन केलाक बादो एखन धरि ओ बस सेवा संचालन नहि भऽ सकल बेर मे ई दोसर बस सेवा आरम्भ कयल गेल अछि ।
शुभारंभ कार्यक्रम केँ संबोधित करैत मुख्यमन्त्री राउत कहलन्हि जे ई बस सेवा संचालन सँ दुनू राजधानी बीचक सम्बन्ध प्रगाढ होयत । एहि सँ पर्यटक लोकनिक आवागमन मे सेहो सहुलियत होयबाक ओ विश्वास जतौलन्हि । कार्यक्रममे बजैत ओ भारतीय प्रधानमन्त्रीक जनकपुरधाम भ्रमणकबाद जनकपुरधाम मे भारतीय पर्यटक अयबाक संख्यामे बृद्धि भेल बतबैत ई बस संचालन सँ आरो बेसी पर्यटक जनकपुरधाम एबाक संयोग बनत जाहि मे ई बस सेवा सँ सहुलियत होयत ओ कहलन्हि । एहि प्रकार सँ जनकपुरधाम पटना बस संचालनमे सीमा क्षेत्रक भंसार विभाग केँ कोनो समस्या भेलापर तेकर तत्काल समाधान लेल प्रदेश नं. २ केर प्रहरी प्रमुख दिनेश अमात्य तथा प्रमुख जिल्ला अधिकारी प्रेमलाल लामिछाने केँ निर्देशन देलन्हि ।
इम्हर, जनकपुर अञ्चल बस व्यवसायी संघक अध्यक्ष मनोज चौधरी सेहो भंसारमे आबयबला समस्याक समाधान करबाक लेल आग्रह कयलन्हि । नेपाल–भारत मैत्री बस सेवा नाम देलगेल ओ बस मञ्जुश्री प्रा. लि. द्वारा बस उपलब्ध कराओल गेल अछि । जनकपुर सँ जाएबला बस भिठ्ठामोड, सीतामढी, मुजफ्फरपुर होइत पटना पहुँचबाक रूट निर्धारण कयल गेल अछि । जनकपुरधाम–पटनाक भाड़ा भारतीय टका २७५ निर्धारण कयल गेल अछि ।
