कथा गोष्ठी आ मैथिली भाषा-साहित्यक नव दिनमान पर विशिष्टजनक प्रतिक्रिया

कथागोष्ठी :

पहिल 2018, आठ सितंबर
💐

एम्हर मैथिली कथा जेना एक तरहक गतिरोधक सामना क’ रहल छल ! कारण सोशल मीडियाक आगमन भेने अधिकांश मसिजीवी कविता दिस अधिक रुचि लेब’ लागल रहथि, छथिहो । ओना ईहो साहित्य लेल अनुचित नहि, तथापि साहित्य सर्वांग पुष्ट हो, से सहजहि अपेक्षा । अस्तु ।

एहिना किछु दशक पूर्व सेहो एही तरहक गतिरोध मैथिली कथापर आयल छल । तहिया सोशल मीडिया तँ नहि रहै, मुदा पत्रिका-संकट आबि तुला गेल रहै ।

हमरा लोकनि एहि तरहक संकट सँ उबरबाक लेल लोहना गाम मे किरण जयंतीक अवसरपर निर्णय लेने रही आ ‘सगर राति दीप जरय’ नाम सँ एक धारावाहिक कथागोष्ठीक आरंभ कयने रही । तकर सकारात्मक प्रभाव पड़ल आ नव-पुरान लेखक कथालेखन दिस सक्रिय भेल रहथि । ओना ओ कथा-आयोजन एखनो अधिगृहिते रूममे सही, मुदा जीवंत अछि । मुदा एमहर किछु वर्ष सँ ताहि आयोजन मे समवेत उपस्थिति ओ तकर प्रभाव मे एकरसता देखल जा रहल छल ।

तकरे परिणाम भेल जे दरभंगाक साहित्यिक संस्था ‘जखन-तखन’ द्वारा प्रो. अशोक कुमार मेहताक संयोजकत्वमे सर्वथा नवीन परिकल्पनाक संग ‘कथागोष्ठी’ नाम सँ एक धारावाहिक कार्यक्रमक आरंभ काल्हि 08.09.2018 कें एमएमटीएम कालेजक सभागार मे कयल गेल । अस्तु ।

वरीय कथाकार अशोकक अध्यक्षता आ अशोक मेहताक संचालन मे कथागोष्ठीक आरंभ ब्रजकिशोर वर्मा मणिपद्मक ‘बुझले छल’ कथाक वाचन सँ भेल । कथावाचन कयलनि प्रो. दमन कुमार झा । मुदा ताहि सभ सँ पूर्व मंगलाचरण प्रस्तुत कयलनि गीतकार चंद्रमणि । दू बजे सँ आरंभ एहि कथापाठ-अनलिमिटेड मे लगभग अढ़ाइ दर्जन कथा/लघुकथा पढ़ल गेल, जे रातुक बारह बजे जा क’ स्थगित कएल गेल । एहि मे जे-जे कथाकार/कथालेखिका कथावाचन कयलनि, तनिक नाम अछि क्रमशः अभिलाषा, महेन्द्र नारायण राम, नीता झा, प्रणव नार्मदेय, मनोज कुमार झा, लक्ष्मी सिंह ठाकुर, ब्रह्मदेव प्रसाद विमल, मणिकांत झा, उषा चौधरी, स्वर्णिम किरण झा, भवेश चंद्र मिश्र ‘शिवांशु’, चंद्रमणि झा, सुनीता झा, मेनका मल्लिक, अमित मिश्र, मिथिलेश सिंहा मिसिदा, सदरे आलम गौहर, रूपम झा, पुतुल प्रियंवदा, आनंद मोहन झा, शैलेंद्र शैली, सोनू कुमार झा, अमित मिश्र, अवधेश कुमार झा, संतोषी कुमार, कमलेंद्र प्रेमेंद्र, दिलीप कुमार झा, शिवकुमार प्रसाद, रामनारायण सिंह आदि । बैद्यनाथ चौधरी बैजूक मौखिक कथावाचनकें अलग सँ आनंद लेल गेल ।

समयाभावक कारणे जे-जे कथाकार कथा नहि पढ़ि सकलाह, से सभ रहथि क्रमशः शैलेंद्र आनंद, शिवशंकर श्रीनिवास, प्रदीप बिहारी, गिरिजा नंद झा ‘अर्धनारीश्वर’, चंद्रेश, फूलचंद्र झा ‘प्रवीण’, हीरेन्द्र कुमार झा, अमलेंदु शेखर पाठक, सत्येंद्र कुमार झा, बीना प्रसाद, अखिलेश कुमार झा आदि ।

पढ़ल गेल कथा सभक समीक्षा कयलनि क्रमशः भीमनाथ झा, उदयचन्द्र झा ‘विनोद’, फूलचंद्र मिश्र ‘रमण’, शिवशंकर श्रीनिवास, नारायणजी, प्रदीप बिहारी, चंद्रमणि, अजित आजाद, किसलय कृष्ण, कमल मोहन चुन्नू, रमेश झा, गुफरान जिलानी आदि ।

अल्पविरामक बाद एक नब सोच जोड़ल गेल, जकर शीर्षक राखल गेल छल- ‘कथा उत्स’ ! एकर अंतर्गत वरीय कथाकार प्रदीप बिहारी अपन कथा-लेखन-प्रक्रिया पर प्रकाश देलनि ।

मुदा एहि क्रममे एक बात बहुत गंभीरता संग अकानल गेल जे कथालेखक/लेखिकाक संख्या मे नव-नव आमद सभ तँ भेल, मुदा कथाक गुणवत्ता मे शिथिलताक संग, आ तें कथा सभ मे समयकें नहि बाजब, आ शैल्पिक अराजकता संग कथ्यक प्रति अगंभीरता आदि स्पष्ट अछि ! तहिना एहि तरहक गोष्ठीक एक ईहो निहित उद्देश्य रहैत अछि जे ई समीक्षक एक वर्ग सेहो ठाढ़ करय । एहू स्तरपर ह्रासक अनुभव कएल गेल । अस्तु ।

समग्रता मे तें एहि कथागोष्ठी कें उद्देश्य-पूर्तिक दिशा मे एक सकारात्मक डेग बूझल जयबाक चाही । एही निश्चयक संग गोष्ठी विभूति आनन्दक धन्यवाद ज्ञापन सँ स्थगित कएल गेल तथा अग्रिम आयोजन लेल श्रीमती मेनका मल्लिक कें कमान देल गेलनि, जे तीन मासक अभ्यंतर एकर क्रम के आगाँ बढ़ौतीह…

अंतमे संपूर्ण कार्यक्रमक फेसबुक लाइव करबा लेल साहित्यकर्मी सुमित मिश्र गुंजन आ राघव रमण कें धन्यवाद देल गेल । तहिना मुफ्त मे सभागारक उपयोग करबा लेल मैथिलीस्ट बैद्यनाथ चौधरी ‘बैजू’ जीक प्रति आभार व्यक्त कएल गेल ।

गोष्ठीक व्यवस्था-बात मे सर्वश्री हीरेन्द्र कुमार झा, प्रो.नारायण झा, बीणा प्रसाद, रौशन, दीपक, आ राजनाथ जीक सक्रियता कें उपस्थित लोक गंभीरता सँ नोटिस लेलक…

*कैलाश कुमार मिश्र कहलनिः

बहुत नीक आयोजन। एहि आयोजन सँ बहुत किछु सिखल जा सकैत अछि। दिल्लीक मौथिली भोजपुरी अकादमी सेहो लघु स्तर पर एहि तरहक आयोजन लेल सोचि रहल अछि। हम अकादमीक उपाध्यक्ष श्रीमान नीरज पाठक Nirraj Pathak लग ई बात राखब। अगर ओ स्वीकृति द’ देताह त’ शीघ्र तिथि आ स्थानक जानकारी प्रेषित करब। अहाँक रपट बहुत नीक लागल। एकर लाभ सेहो भेटल। बहुत बहुत बधाई।

*अजित आजाद कहलाह –

विगत 5-6 वर्ष सँ कथा नहि लिखने रही। कथा-विमुख त नहि भेल रही मुदा कोनो बहन्ना अवश्य चाहैत रही। सगर राति दीप जरयक कारणे 40-50 कथा लिखने रही। गोटेक सय लघुकथा सेहो मुदा बाद मे कटैत चलि गेल रही। आब एकटा उद्देश्य अछि सोझाँ। काल्हिक आयोजन सँ बहुत उत्साहित छी। जे योजना अशोक मेहता जीक संग बनेलहुँ, से साकार भेल। 10 घंटा चलल ई आयोजन। युवा लोकनिक बहुलता छल। आर युवा सभ जुड़ता। बेगूसराय मे ई गोष्ठी आर भकरार होयत।

*श्यामानन्द चौधरी

आयोजन चलैत रहय आ एहि मे किछु श्रोता किम्बा पाठक के सेहो हँकार भेटय. मात्र ,सुनता उपास जकाँ नहि औ संगहि प्रतिष्ठित कथाकार लोकनि क कथा सेहो, सुनबाक ब्यौंत रहक चाही.

*मैथिल सदरे गौहर

कथा गोष्टी मे अपन कथा पढिकें बड उत्साहित छी। अपन वरिष्ठ कथाकार जनिका सभक कथाक हम मैथिली सं उर्दू मे अनुवाद कयने छी तनिका सभक समक्ष कथा पढिकें गौरवान्वित भेलहुं। अशोक मेहता जी विभूति जी आ जखन तखन परिवार कें धन्यवाद एहन नीक आ सफल आयोजनक लेल।

*महेश लाल दास

 साधुवाद ; साहित्यक समृद्धि के लेल अहि तरहक आयोजन अत्यंत सराहनीय। प्रत्येक बैसारि के प्रकाशन सेहो आवश्यक । हमरा बुझने अगला सम्मेलन दू दिनक होना चाही : पहिल दिन किछ सैद्धांतिक , विधा सम्बन्धी चर्चा , अन्य साहित्य सबहक संग मैथिली कथा साहित्यक तुलना आदि होय, समीक्षा होय ; जं किनकों कथा पुस्तक प्रकाशित भेल होइन्ह ते एंकर परिचय होय । अपराह्न सत्र से कथा वाचन लगातार दोसर दिन तक चलै : तखन धन्यवाद ज्ञापन – समापन आदि । अहि आयोजन के ऐतिहासिक कहनाय उचित । मैथिली साहित्य केर संवर्द्धना लेल सराहनीय । हम दूरे सं ( अमेरिका से) साधुवाद पठा रहल छी ।

*ईशनाथ झा

मैथिली साहित्यमे कथा अपन वैश्विक महत्त्व रखैत अछि। मणिपद्मक एकटा कथा “युधिष्ठिरक पत्नी” हमरा अंग्रेजी/फ्रेंचक सैकड़ो अति प्रसिद्ध कथा सबसँ ठोस लागल रहय अपन गत्यात्मकता, शैली, चरित्र चित्रण आ शब्द विन्यासक अर्थे। तहिना कतेको कथा छिड़िआयल पड़ल अछि। युवावर्गक कथालेखनक प्रति उत्साह सँ अभिभूत छी। सर, जे चिंता अपने व्यक्त कयल अछि तकर निदान सेहो अपने लोकनिक हाथमे अछि। समय-समय पर कथा लेखन कार्यशालाक सेहो आयोजन करबाक प्रयास कयल जाओ जाहिसँ उत्सुक नवतूरकें तकनीकक ज्ञान हेतनि आ कलममे धार औतनि। समीक्षाक विषयमे हम किछु नहि कहब !

*उषा किरण खान

सगर रातिक भेष बदलल पुनरागमन! सुस्वागतम्!! आलोचक जोरगर ठाहिं पठाहिं बाजयबला चाही। कथा लिखब के मामूली बूझि नव लेखक के अधिक रिजक्शनक जरूरति छैक। गुणवत्ता ताही सँ विकसित हेतै। नवलेखक अपना पूर्वजों कथानहि पढ़ने रहै छथि, तैं पाछां आगांक बोध नै रहै छैन्ह। समृद्ध मैथिली साहित्य पर दयाभाव सँ कियो कथा नै लिखथु। हम बिनु मांगल सलाह देबै के अधिकारी नै छी तथापि बुढारीक बै बूझब!!!