स्वाध्याय मे आइ ‘ब्राह्मण’ शब्द केर वृहत् विन्यास आ अर्थ आदि बुझबाक प्रयत्न कय रहल छी। जातिकर्म अनुसार आजुक युग मे कतेको तरहक जाति विद्यमान् अछि। हिन्दू धर्म मे वर्ण व्यवस्था कालान्तर मे आरो उपवर्गीकृत होइत ४ वर्ण सँ कतेको जातिक रूप मे परिणति पाबि चुकल अछि। मिथिलाक एकटा कहाबत जे बुढ-पुरानक मुंहें हमहुँ सब सुनलहुँ “चारि वर्ण छत्तीसो जाति’, ताहि अनुसार ई कहि सकैत छी जे छत्तीस जातिक परिकल्पना हमरा लोकनिक मिथिला समाज मे विद्यमान् रहैत आयल अछि। समयाभाव आ मिथिलाक अपन सामाजिक संरचना वा इतिहास केर अल्प अध्ययनक कारण एकरा पर आरो विशद् वेक्षण हमरा सँ संभव नहि अछि। बस, कहाबत धरि सीमित रहि निज जीवन केर – निज अस्तित्वक प्रयोग लेल मात्र आजुक स्वाध्याय मे ‘ब्राह्मण’ शब्दक अर्थ आर वर्तमान प्रचलित कर्म-व्यवस्था आदि विभिन्न अवस्था अनुसार ब्राह्मणक स्थिति पर मनन कय रहल छी बुझू।

उपरोक्त वर्णित शब्द अनुसार ‘ब्राह्मण’ केर दर्शन आजुक युग मे असंभव प्रतीत भऽ रहल अछि। तथापि, निजी अनुभव सँ आइयो एहेन कतेको नियम-निष्ठा सँ चलनिहार ब्राह्मण भेटैत छथि। आर जाहि तरहक जीवन पद्धति ‘ब्राह्मण’ लेल निर्दिष्ट अछि, सच मे आजुक युग मे एतेक कठोर नियम केँ वहन करैत जीवन चलायब नगण्य ब्राह्मण सँ मात्र संभव देखाइत अछि। एहेन समय मे जातीयताक कोन आधार पर ‘ब्राह्मण’ जाति-व्यवस्था के टिकल कहि सकब? ई एकटा प्रश्न हमर मस्तिष्क केँ बझा देने अछि। जहिना साधु-महात्मा, ऋषि-मुनि, योगी-संत आदिक दर्शन आजुक कलियुग मे दुर्लभ, तहिना विशुद्ध ब्राह्मणक दर्शन दुर्लभ देखैत छी।

तथापि ‘ब्राह्मण’ जाति व्यवस्था आइयो ‘ब्राह्मण’ कुल अथवा वंश मे जन्म हेबाक आधार पर कायल अछि, ईहो सच्चाई थिक। आइयो धरि एहेन कय गोट संस्कार भले विकृत स्वरूप मे मुदा जीबित अछि जे ब्राह्मण व्यवस्था केँ कायम रखैत देखबैत अछि। उपरोक्त शब्द आ अर्थ केर क्रमांक संख्या २ मे वर्णित जाति-कर्म केर आध्यात्मिक स्वरूप केँ जियैत रेयरेस्ट अफ रेयर ब्राह्मण मे हम देखि रहल छी। परञ्च भावनात्मक जीवनशैली मे उपरोक्त वर्णित विभिन्न कर्म, सदाचार, दिनचर्या निश्चित बहुल्य व्यक्ति ओ परिवार मे देखल जाइछ। आर एकर प्रत्यक्ष प्रभाव ब्राह्मण परिवारक सन्ततिक संस्कार मे सेहो देखल जा सकैत अछि। लेकिन ईहो कहय मे अतिश्योक्ति नहि होयत जे ब्राह्मणक संस्कार शत-प्रतिशत ब्राह्मण-परिवार मे आजुक युग मे नहि बाँचल। आइ परिस्थिति एहि व्यवस्था केँ धुमिल कय देलक। व्यक्ति अपन धर्म-कर्म केँ संरक्षित नहि राखि सकल। स्खलित अवस्था मे क्षीण शक्तिक संग ई व्यवस्था जिबैत अछि, ई हमर अवलोकन थिक। आर यैह कारण छैक जे ब्राह्मणक सर्वोच्चता पर वैदिक निर्देशन केँ लोक, अन्य जाति-समुदाय द्वारा कठोर आलोचना झेलय पड़ि रहलैक अछि। हमरा हिसाबे, स्वयं ब्राह्मणजन केँ अपन धर्म-कर्म आ सदाचार केँ कोना जोगाकय राखल जा सकत ताहि पर विशेष चिन्तन-मनन करबाक चाही।