एतेक दिन कतेको बेर सुनी जे ‘दहेज लेल हत्या’ बेसीतर बहन्ना होएत छैक, यथार्थ किछु आरे कारण होएत छैक…. लेकिन ‘रंजना हत्याकाण्ड’ स्वयं रंजना अपना हाथ सँ भाइ-बहिन सब केँ संबोधित कय केँ चिट्ठी मे अपन पीड़ा लिखने अछि जाहि मे स्पष्ट छैक जे विवाहक चारि मासक भीतर ओकरा संग ओकर पति आ बाकी परिवार कोन तरहें दुर्व्यवहार केलकैक। कारण छैक – कनियाँ सुन्दर नहि भेटल… दहेज खूब नहि देलक… एकरा मारिकय फेर दोसर विवाह करायब…. फेर दहेज खूब लेब… आदि।

काल्हिये भेटल समाचार सँ ई ज्ञात भेल छल जे लड़कीक हत्या ओकरा खूब मारा-पिटी केलाक बाद गला दबाकय कयल गेल अछि। ई संकेत आरोपी परिवारक आसपासक लोके लड़कीक परिवार केँ नाम नहि खोलबाक शर्त पर देलक। ओम्हर लड़कीक हाथक लिखल पत्र मे स्पष्ट उल्लेख अछि एहि सब बातक जे ओकरा संग ओकर सासूरक लोक आ पति कोन तरहें व्यवहार करय, ताहि सँ सेहो हत्या मात्र कयल जेबाक बात सिद्ध होएत अछि।

एखन प्राप्त सूचना अनुसार हत्याक आरोपी पतिदेव केँ अलौकिक बेहोशी तऽ टूटि गेलनि, आब ओ बेचैनी मे प्राइवेट नर्सिंग होम केर भीतर टहलान लगा रहला अछि। कियैक नहि! योजना मुताबिक पुलिस केस सलटबाक छन्हि। पोस्टमार्टम रिपोर्ट एक बेर एक्सीडेन्ट देखाबय वला बनिये गेलैन योजना अनुरूप। आब कनीकाल मे दोसर रिपोर्ट आबयवला छैक। ओहो रिपोर्ट किछु तेहने गोल-मटोल एबाक आशंका छैक। लेकिन मिथिला स्टुडेन्ट यूनियन आ दहेज मुक्त मिथिला सहित करोड़ों मैथिल जनमानस आब एहि हत्याकाण्ड पर नजरि गड़ौने अछि। पहिल दिन तऽ कहाँ दिना दू टा पत्रकार सेहो मैनेज भऽ गेल छल, ओ सब समाचार हबड़-दबड़ रोड एक्सीडेन्ट वला बना देलकैक। हम तऽ आग्रह करब सरोकारवाला सब सँ जे ओहि पत्रकारो केँ हिरासत मे लय केँ पुछताछ कयल जाय जे ओ घटनाक समय ओतेक राति हाईवे पर कतय छल आर कोन आधार पर समाचार प्रकाशित केलक, कतेक पैसा खेलक ई सब काज करय लेल… आ ई दहेज लोभी परिवार दहेजे वला पाइ मे सँ ई सबटा मैनेज केलक आ कि दरोगा साहेब केर कमेलहा आर सम्पत्ति केँ भुष्ट कय केँ ई सब मैनेज भऽ रहल य?

बिहार पुलिस केर एक सेवानिवृत्त अधिकारी आ दोसर सेवारत कर्मचारी – दहेज मुक्त बिहार मे दहेजक लोभ मे कयल एक बेटीक नृशंस हत्या सँ समूचा सूबा बदनाम भेल अछि।

दहेज मुक्त मिथिला आह्वान करैत अछि जे जा धरि अपराधी केँ सही सजा नहि भेटि जाइत अछि, कृपया अहाँ सब कियो अपन मिथिला केँ एहेन अपराधी आ अपराध सँ मुक्त करबाक लेल विरोध जारी राखू। एतेक शेयर करू जे सरकारक कान धरि ई मामिला अवस्स पहुँचि जाय। सब जनप्रतिनिधि एहि मामिला मे पीड़ित पक्ष केँ न्याय दियाबथि, ओहि बेटीक अकाल मृत्युक बदला लेनाय समाजक कर्तव्य बनैत अछि। ई बदला एहि लेल नहि जे खूनक बदला खून सँ न्याय हेतैक, बल्कि एहि लेल जे अन्य दहेज लोभी आ दहेजक लोभ मे केकरो बेटीक हत्या कय देबाक गलत हिम्मत कयनिहार केँ १० बेर सोचय पड़तैक ई काज करय सँ पहिने। अस्तु! मैथिली जिन्दाबाद केर नजरि बनल अछि घटना पर, दहेज मुक्त मिथिला संग अछि पीड़ित परिवार केर।