मिथिला मे जीतिया पाबनि – कठिन व्रतक संग एकजुटताक सन्देश

“जितिया पावनि बड़ भारी…धिआ पुता के ठोकि सुतएलौं, अपने खएलौं भरि थारी” – एहि पाबनि सँ जुड़ल ई लोक-कहिनी बहुत अर्थपूर्ण अछि। यथार्थतः जितिया मे निर्जला व्रत कएल जाएछ – एकर विधान बहुत कड़ा आ सावधानी सँ पूरा करयवला होएछ। माय अपन सन्तानक संग-संग पति व सम्पूर्ण परिवार एवम् परिजनक कुशलताक कामना संग ई विशेष व्रत धारण करैत छथि, व्रत आरम्भ करय सँ पूर्वक रात्रिकाल ओ बेस भोजन करैत छथि कारण ऐगला दिन सँ हुनका जलो नहि ग्रहण करबाक छन्हि आर व्रतक सब विधान पूरा केलाक बादे ओ पारन कय सकतीह। तैँ, ई कहिनी बेसी प्रचलित अछि।

जीतिया पाबनि मनाबय के पाछाँ कथा छैक जे एकटा राक्षस एकटा गाम में आतंक मचौने छल जकरा सँ श्रीकृष्ण जी जीमूतवाहन केर रूप में अवतार लय रक्षा केलाह । परम्परानुसार तेकरा बाद सँ एहि विशेष तिथि केँ हुनका सँ विशेष आशीर्वाद निमित्त ई पाबनि मनेबाक विधान मिथिला मे खास रूप सँ प्रचलित अछि। कहबियो छैक, वेदक विधान मिथिलाक जीवनशैली मे निहित अछि।