गीतः प्रसंग दहों दिस आयल बाढि मिथिला मे
– प्रेम विदेह, जनकपुरधाम
गीत : जल प्रलय
भेलै प्रलय जलक, ऐलै विपति घड़िया,
मिथिला नगरिया ना……………
+
गेला सूरूज बहुत दूर, भेलै आकासोमे भूर,
बाबा इन्द्रो बनि गेला बड़का बैरिया। मिथिला…
+
घरसब पोखरि बनि गेल, सड़क नदी बनि गेल,
सागर बनल बाधो-बनो, चाँचर-चौरिया। मिथिला..
+
दौलति-सम्पतिके क्षति भेल, मालोजालक मौगति भेल,
डूबल फसल रोपल, ढहल घर-दुअरिया। मिथिला…………..
+
बन्धु हजारो दहाएल, मनुक्ख बहुतो हेराएल,
बिछड़ल बच्चा बहुतो बाप-महतरिया। मिथिला..
+
अछि दुर्दशा दुनु पार, लोथ-नांगरि सरकार,
बाँटए रेडियो-टिभी राहत खबरिया। मिथिला..
+
बान्हू धीरज बहिन, भाइ! दिन फिरतै गे माई!
फेरत प्रभु जरूर पीड़ितपर नजरिया। मिथिला…
*****
