गीताः ज्ञानरूपी अग्नि समस्त कर्म केँ भस्म करैछ

एतय भगवान् विवेकहीन – अर्थात् जेकरा मे उचित-अनुचित केर ज्ञानक सर्वथा अभाव रहैत अछि तेकरा अतिरिक्त श्रद्धारहित संशयात्मा – यानि जेकरा गुरुरूपी प्रकाश पर भरोस नहि रहैछ, ओ सदिखन संशय मे घेरायल रहैछ, एहेन मनुष्य लेल कोनो लोक मे कल्याण नहि होयबाक बात कहलैन अछि।

स्वामी स्वरूपानंद जी केर मुताबिक – विवेकहीन अर्थात् अज्ञानी, जे स्वयं केँ आत्मारूप मे नहि जानि सकल अछि; श्रद्धारहित ओ जेकरा अपना अतिरिक्त दोसर केकरो पर विश्वास नहि हो आर संशयात्मा यानि जे सदिखन कोनो न कोनो अविश्वासक चलतबे संदेह मे घेरायल रहैछ… जेकरा एहि संसार मे विद्यमान् विभिन्न अवस्था पर मात्र संदेह टा होएछ, एहेन लोक केँ कहियो संतोष नहि भेटैछ ताहि हेतु ओकरा लेल ई लोक – परलोक – कोनो लोक नहि होयबाक बात भगवान् द्वारा कहल गेल अछि, कहैत छथि।