ब्रेकिंग न्युज – सहरसा सँ….
एखनहि ८:३० बजे। २४ जुन, २०१५. मैथिली जिन्दाबाद संवाददाता!
वर्तमान मिथिलाक प्रसिद्ध उद्घोषक किसलय कृष्ण आ पत्रकारिताक संग मैथिली-मिथिला अभियानी, समाजसेवा, राजनीति आ हरेक क्षेत्र मे समर्पित योगदानदाता सुभाषचंद्र झा एखन सहरसाक एम्स आन्दोलन केर रहुआमणि गाममे राखल बैसार मे भाग लेबय जाइत समय दुर्घटना मे पड़ि गेला। दुनू गोटा केँ काफी चोट लागलनि अछि। किसलय कृष्ण केँ सामान्य चोट लागल छन्हि जखन कि सुभाषचंद्र झा केँ मुंह आ हाथ मे गंभीर चोट लागल छन्हि। एखन सहरसा मे डा. भुवन सिंह केर क्लिनीक पर दुनू गोटाक इलाज चलि रहल छन्हि। डाक्टर दुनू गोटाकेँ खतरा सँ मुक्त कहलनि अछि।
दिल्ली सँ अमित आनन्द जानकारी करौलनि अछि जे सुभाषजी संग गप भेलनि आ ओ सब किछु ठीक होयबाक जानकारी देलनि। कहलनि जे एम्स आन्दोलन जाहि मे सहरसाक युवा समाजक संग सब उम्र आ समुदायक लोक जोरदार आन्दोलनक तैयारी कय रहल अछि, ताहि क्रम मे आइ रहुआमणि गाम मे कार्यक्रम राखल गेल छल। समाचार संकलन करबाक उद्देश्यक संग स्वयं अभियान संचालन मे सक्रियतापूर्वक योगदान देबाक लेल ओतहि जाइत काल एकटा साइकिल सवारी केँ बचेबाक क्रम मे एना दुर्घटना घटि गेल। ईश्वरक कृपा सँ सब ठीक अछि। मैथिली जिन्दाबाद कार्यसमूह सेहो हिनका दुनू गोटाकेँ शीघ्र स्वस्थ होयबाक कामना करैत अछि।
