मार्च २३, २०१७. मैथिली जिन्दाबाद!!
विभिन्न ब्युटी कन्टेस्ट मे खिताबी जीत हासिल केनिहाइर मिथिलाक बेटी ऋचा सिंह उर्फ ऋचा राजपूत केँ मधेपुरा स्थित माया विद्या निकेतन मे सम्मान कएल जेबाक समाचार अछि।
मिस बिहार आ मिस बालीवूड दिवा केर टाइटिल प्राप्त ऋचा मिथिला पेन्टिंग केर संरक्षण, संवर्धन एवम् प्रवर्धन लेल सेहो ब्रान्ड एम्बेसेडर केर रूप मे सामाजिक अभियान चलबैत महत्वपूर्ण भूमिका निर्वाह करैत आबि रहल छथि। हिनकर मानब छन्हि जे मिथिला पेन्टिंग केर प्रशिक्षण हरेक विद्यालय स्तर पर छात्र-छात्रा केँ देल जेबाक चाही, कारण ई चित्रकला मे मिथिलाक संस्कृति केँ विश्व धरि पहुँचेबाक सामर्थ्य छैक आर एकर बाजार सेहो बड पैघ छैक। मिथिला चित्रकला सिखनाय अपना केँ स्वाबलंबी बनेनाय आ वर्तमान अर्थ युग मे रोजगारक साधन बना किछु अर्थ उपार्जन सेहो करब संभव छैक। ऋचा राजपूत निरंतर सफलताक नव-नव मंजिल तय करैत मातृभूमि ओ मातृराज्यक संग देशक नाम रौशन करैथ – मधेपुरा स्थित माया विद्या निकेतन केर निदेशिका ऋचा केँ आशीर्वाद दैत विद्यालयक छात्रा-छात्रा तथा खासकय केँ बेटीधन सभकेँ हिनका सँ प्रेरणा ग्रहण करबाक सन्देश देलनि अछि। विद्यालयक छात्र-छात्रा आ शिक्षक-शिक्षिकाक बीच ऋचाक उपस्थिति सँ एकटा अलगे उत्साहक माहौल बनल ऋचा अपन फेसबुक मार्फत जनौलनि अछि। ऋचा विद्यालयक निदेशिका, शिक्षक, छात्र – सब केँ धन्यवाद केलनि आर हुनका सब सँ भेटल सिनेह सँ अपना केँ आरो मजबूती भेटबाक बात कहलनि।
