बुटवल, रुपन्देही, नेपाल। अप्रैल २३, २०१६. मैथिली जिन्दाबाद!!
साल २०७२-७३ केर विद्यापति स्मृति पर्व समारोह मैथिल समाज नेपाल रुपन्देही द्वारा चरणबद्ध रूप मे मनाओल जा रहल अछि। एहि कार्यक्रम मे पैछला शुक्र वैसाख ३ गते लुम्बिनी अंचल अस्पताल मे भरती असहाय रोगी व अन्य सहित कुल १५० जन केँ फलफूल, बिस्कुट, औषधि, फ्रूटी आदि वितरण कैल गेल छल। तहिना शनि दिन वैसाख ४ गते रक्तदान कार्यक्रम कैल गेल जाहि मे करीब ४० गोटे रक्तदान केलनि।
आइ शनि वैसाख ११ गते एहि समारोहक मूल कार्यक्रम राखल गेल अछि जाहि मे महाकवि विद्यापति केँ स्मृति करैत मैथिली भाषा व मिथिला संस्कृति प्रति निरंतर कार्य कएनिहार स्रष्टा लोकनि केँ सम्मानित करबाक योजना अछि। एहि सम्मानक सूची मे मैथिली जिन्दाबाद केर संपादक प्रवीण नारायण चौधरी विराटनगर सँ तथा विभिन्न महत्वपूर्ण शोधकार्य करैत पोथी सब प्रकाशित कय अपन इतिहास केँ संरक्षित रखबाक महत्वपूर्ण कार्य कएनिहार श्याम सुन्दर यादव ‘पथिक’ राजविराज सँ आ किछु अन्य व्यक्तित्व सबहक सम्मान कैल जेबाक अछि। मैथिल समाज नेपाल रुपन्देही (बुटवल) केर अध्यक्ष मुखीलाल चौधरी ई जानकारी करौलनि अछि।
