सम्पन भेल सवा लाख ‘लखराम’ महादेव पूजन संगहि ‘दहेज मुक्त मिथिलाक’ सदस्यता अभियान
रिपोर्ट: प्रकाश कमती, मुम्बई। अप्रैल १९, २०१६. मैथिली जिन्दाबाद!!
१६ अप्रैल, शनिदिन महाराष्ट्र केर उपनगर कल्याण केर शहाड़ (सेंचुरी मील) में सवा लाख ‘लखराम महादेव’ केर भव्य पूजन सम्पन भेल। जाहि में स्थानीय आयोजक लोकनि में श्री दिलीप मिश्रा जी, श्री श्रवण झा जी सन बहुत रास मैथिल आन्दोलनी केर पुरषार्थ आ समर्पित भाव देखय योग्य छल। पहिने तs विधिवत महादेव पूजन सम्पन्न भेल तत्पश्चात महाप्रसाद वितरण आ भंडारा केर आयोजन सेहो कएल गेल छल। संध्या काल में मैथिली भजन कार्यक्रमक आयोजन सेहो स्थानीय कलाकर द्वारा कएल गेल जाहि मे उपस्थित मैथिल समाजक सब वर्गक लोक भरपूर आनन्द उठौलनि।
शहाड़ मैथिल मित्र मंडल द्वारा अहि आयोजन में ‘दहेज मुक्त मिथिला’ महाराष्ट्रइकाई केर सेहो आमंत्रित कएल गेल छलैन जाहि में राष्ट्रीय संरक्षक श्री पंडित धर्मानन्द झा जी, महाराष्ट्र संरक्षक श्री कुणाल ठाकुर जी, महाराष्ट्र अध्यक्ष श्री विजय मिश्रा जी एवम् महाराष्ट्र प्रवक्ता श्री प्रकाश कमती जी संगहि श्री महेश मिश्रा जी उपस्थित छलाह।
भजन कार्यक्रमक पश्चात दमुमि राष्ट्रीय संरक्षक श्री पंडित धर्मानन्द जी उपस्थित मैथिल लोकनिक बीच ‘दहेज-प्रथा’ पर संबोधित केलनि। सम्बोधन में दहेजक रोग सँ निजात कोना पाओल जाय, माँगरूपी दहेज महापाप थिक, बेटीक महत्व, कन्याक शिक्षा संगहि बेटा आ बेटी में कुनो अंतर नहि ताहि पर दमुमि राष्ट्रीय संगरक्षक श्री धर्मानन्द जी द्वारा विस्तृत रूपे चर्चा कएल गेल जेकर उपस्थित जनमानस द्वारा भरपूर समर्थन भेटलनि। स्थानीय लोकैन केर बीच श्री श्रवण झा जी एवम् उपस्थित दमुमि पदाधिकारी द्वारा फॉर्म बाँटि सदस्यता अभियान सेहो चलाओल गेल। संभवतः दस हजार सँ बेसी मैथिल अहि क्षेत्र में अपन जीविका लेल प्रवासी बनि रहि रहलाह अछि। अहि क्षेत्र में दमुमि टीम पहिल बेर श्री श्रवण जीक सहयोग सँ पहुँचल छल आ आगामी समय में अहि क्षेत्रसँ दमुमि केर अभियान केर और प्रखर बनाबैक लेल समर्पित सदस्य जोड़ि नव ऊर्जा संग महाराष्ट्र में अभियान केँ गति देबाक घोषणा श्री श्रवण जी द्वारा कएल गेल।
