अपन वचन के सत्यापित केलनि दमुमि उपसचिव सगुण मिश्रा
– प्रकाश कमती, मुम्बई। अप्रैल ५, २०१६. मैथिली जिन्दाबाद!!
कहबी छैक जे पहिने अपनहि घर आ अपन मोन में कुनो काज प्रति सच्चा निष्ठा राखु आ ओहि काज लेल स्वतः संकल्पित होऊ तखन देखा-देखी समाज में सेहो बदलाव निश्चित रूपे हेतैक। यैह सन्दर्भ केर पूर्ण केलनि अछि श्री सगुण जी, तs आऊ किछु जानकारी ली हमसब।‘दहेज मुक्त मिथिला’ अपन उद्धेश्य में दिनों-दिन अग्रसर भए रहलाह अछि। केवल प्रवासी मैथिल टा में मात्र नहि बल्कि आब गामों-घर में दमुमि केर लक्ष्य पूर्तिक लेल बढ़ाओल डेग में सहयोगक संगहि समर्थन सेहो भेंट रहल अछि।
विगत 11 मार्च, 2016 केर दिन दमुमि महाराष्ट्र इकाई केर उपसचिव श्री सगुण जीक विवाह रानीपुर दरभंगा स्थित श्री ललन झा जीक सुपुत्री जूही झा जीक संग आदर्श विवाह केर रूप में संपन्न भेल। कन्याक पिता पेशा सँ किसान जरूर छथि मुदा हिनका द्वारा कएल गेल शुभ कार्य सँ समाज में एकबेर पुनः दहेज लोभी केर आत्मचिंतन करैक लेल बाध्य कए देलनि। श्री सगुन जी याज्ञवल्क्य जीक तपोभूमि जगवन(बिस्फी) केर रहनिहार छथि, हिनक पिता श्री सुपेन्द्र मिश्रा जी अवकाश प्राप्त बिहार सरकारक मवेशीक डागडर छथि। ओना तs श्री सगुण जी दसवीं कक्षा धरि शिक्षण केलनि मुदा इलेक्ट्रॉनिक एंड कम्युनिकेशन इंजीनियरिंग में डिप्लोमा कएने छथि संगहि ‘चैनल मास्टर प्राइवेट लिमिटेड’ में सर्विस इंजीनियर केर पद पर कार्यरत छथि। श्री सगुणजी मिथिलाक सबसँ पैघ रोग केर खात्मा लेल चलाओल जा रहल अभियान ‘दहेज मुक्त मिथिला’ महाराष्ट्र यूनिट केर उपसचिव सेहो छथि।
