दोहा – कतार मे होयत विद्यापति स्मृति पर्व समारोहः विन्देश्वर

नवम्बर २४, २०१५. मैथिली जिन्दाबाद!!

अपन मातृभाषा मैथिली प्रति सदैव जागरुक – दोहा, कतार मे कार्यरत मैथिल समाजक विभिन्न स्रष्टा लोकनि एहि बेरुक ‘सांझक चौपारि पर’ कार्यक्रम मे महाकवि विद्यापति केर स्मृति दिवस समारोहपूर्वक मनेबाक निर्णय केलनि अछि। संयोजक विन्देश्वर ठाकुर जे स्वयं एकटा प्रख्यात युवा मैथिली साहित्यकार, कवि एवं अभियानी छथि, ओ मैथिली जिन्दाबाद केँ जानकारी देलनि अछि जे सामान्य साहित्यिक गतिविधि मे किछु विशेष करबाक नियार हमरा लोकनि बहुत दिन सँ कए रहल छलहुँ, एहि विशेष मास कार्तिक आर महाकवि विद्यापति सँ जुड़ल उक्ति ‘कार्तिक धवल त्रयोदसी जान- विद्यापतिक आयू अवसान’ आर एहि संग शुरु भेल महाकविक स्मृति सँ हम मैथिली साहित्यकार अछूता नहि रहि सकलहुँ। एहि बेर महाकविक स्मृति दिवस हमरो लोकनि गाम-घर-समाज सँ दूर विदेशक प्रवास-भूमि कतार केर दोहा मे मनेबाक निर्णय केलहुँ अछि।

विन्देश्वर ठाकुर, अब्दुल रज्जाक, अशरफ राइन, प्रणव कान्त झा व दर्जनों मैथिली स्रष्टा लोकनि दोहाक मुर्तजा पार्क मे ‘अकास तर बैसकी’क तर्ज पर साँझक चौपारि केर रूप मे मासिक साहित्यिक गोष्ठी करैत आबि रहल छथि।

फेसबुक पर प्रकाशित आमंत्रण मे ओ लिखैत छथिः

“मातृभाषाक जगेर्णा हमरासबहक प्रेरणा” मूल नाराके संग बिगत ४ मास सँ निरन्तर रुपमे चलैत आबि रहल मैथिली काव्य-सन्ध्या एहिबेर सेहो निम्न मिति तथा स्थानमे होबए जा’ रहल अछि । एहिबेरक महत्वपूर्ण आकर्षण- “महाकवि विद्यापति स्मृति समारोह-२०१५” रहल अछि । मैथिली साहित्यक पैघ विभूति महाकवि विद्यापतिक स्मृति सबठाँ अपना-अपना तरहे मनाबि रहल देखि कतारमे रहल मैथिल सर्जकसबद्वारा सेहो पहिल बेर एहि कार्यक्रमके शुरु करबाक कोसिस कएल गेल अछि । अत: दोहा-कतारमे रहनिहार सम्पूर्ण सर्जक, स्रष्टा एवं साहित्यप्रेमी सबसँ सादर निवेदन जे कृपया एहि पुनित अवसरपर अवश्य पधारी आ कार्यक्रमके सफल बनाबी । संगे कतार सँ बाहर रहल मित्रसब सेहो अपन-अपन ‘महाकवि विद्यापति’ विशेष रचना एहि कार्यक्रममे पठा सकैत छी । एहिके लेल अपने सब फेसबूकमे -“साँझक चौपारि-पर’ पेज आ वाट्स एप्पमे अपन नम्बर सहित जुडि सकैत छी । संगे एहि पोष्टके कमेन्ट बक्समे सेहो अपन रचना भेजी । हमसब अहुठाँ सँ ल’ क वाचन करब ।