विराटनगर, १४ सितम्बर २०१९. मैथिली जिन्दाबाद!!
भव्य सफलताक संग जीतिया महोत्सवक आयोजन भेल विराटनगर मे
देव महिला समाज द्वारा आयोजित जीतिया महोत्सव भव्य सफल रहल। नेपालक पूर्व नागरिक उड्डयन ओ पर्यटन मंत्री श्री जितेन्द्र नारायण देव केर प्रमुख अतिथिक रूप मे उपस्थिति तथा समाजक अध्यक्षा संगीता देव केर अध्यक्षता व संजय कुमार देवक संचालन मे उद्घाटन सत्र भेल छल। अतिथिक तौर पर दहेज मुक्त मिथिला अन्तर्राष्ट्रीय संयोजक प्रवीण नारायण चौधरी एवं मैथिलीक अति-विशिष्ट हास्य सम्राट अद्भुतानन्द केर उपस्थिति रहल। विराटनगर वार्ड नम्बर १२ केर अध्यक्ष हीरालाल कामत सेहो विशिष्ट अतिथिक रूप मे उपस्थित छलाह। एहि सत्रक आरम्भ भैरवि वन्दना जय जय भैरवि असुर भयाउनि गायक वीरेन्द्र झा एवं मुनचुन देव सहित अन्य कलाकार लोकनि सामूहिक रूप सँ गाबिकय कयलनि। उद्घाटनक सत्र मे प्रमुख अतिथि जितेन्द्र नारायण देव केर हाथ सँ देव समाजक १५ गोट वयोवृद्ध महिला लोकनि केँ माला ओ चादर ओढाकय कयल गेल। ई क्षण काफी आनन्दित करयवला छल। जतय एक दिश आइ-काल्हि लोक वृद्ध-वृद्धा सब केँ अवहेलनाक पराकाष्ठा पार कय केँ घोर अमानवीयताक क्रूर उदाहरण सरेआम देखबैत अछि ताहि ठाम देव महिला समाज द्वारा जीतिया पाबनिक उपलक्ष्य मे राखल गेल उत्सव मे सम्मान करैत एकटा सार्थक आ महत्वपूर्ण सन्देश देल गेल अछि। निश्चित रूप सँ जीतिया पाबनि कयनिहारि मातृरूपा जननी (महिला) लोकनि केँ सम्मानित करब देव समाजक उच्च बौद्धिकता केँ सिद्ध करैत बुझायल।
पूर्वमंत्री देव अपन संबोधन मे महिला आ देव समुदायक लोक सँ अपील कयलनि जे कोनो हाल मे केकरो निन्दा आ उलहन-उपराग नहि करू। प्रत्येक महिला एकटा इंजीनियर होइत छथि जिनका अपन परिवार केर संग समाज आ राष्ट्र निर्माण मे विशेष रूप सँ सहभागिता देबय पड़ैत छन्हि। मुख्य अतिथि देव आयोजक सँ ईहो आह्वान कयलनि जे केवल राजनीतिक क्षेत्र सँ प्रमुख अतिथि बनेबाक बदले शैक्षणिक एवं सामाजिक स्तर पर जिनका सभक उत्कृष्ट योगदान भऽ रहल छन्हि हुनको सब केँ मुख्य अतिथि बनेबाक प्रथा आरम्भ करू। देव समुदायक लोक मे सरस्वतीक विशेष कृपा होयबाक आ अपन निजता प्रति साकांक्ष होयबाक बात दहेज मुक्त मिथिलाक अन्तर्राष्ट्रीय संयोजक प्रवीण नारायण चौधरी बतेलनि, ओ सबकेँ चेतबैत ईहो कहलनि जे बुद्धिजीवी समाज मे ईरबाजी आ ईगो केर कारण एकता कम देखल जाइत अछि ताहि मे देव समाज कदापि नहि फँसथि आर अपन मिथिलाक अनुपम भाषा-संस्कृति ओ सभ्यता केँ बचेबाक लेल सदिखन अग्र भूमिका निभेबाक परम्परा केँ आगू सेहो निरन्तरता मे राखथि। अद्भुतानन्द एहि सत्र मे आयोजनकर्ता प्रति विशेष आभार जतबैत कहलनि जे जीतिया पाबनि केँ उत्सवक रूप मे देखि ओ काफी प्रभावित भेलाह आर एहने उत्सव हरेक गाम मे हो ताहि लेल अपन राष्ट्रीय-अन्तर्राष्ट्रीय कार्यक्रम मे जन-जन सँ अपील करबाक आश्वासन देलनि। अध्यक्षा देव अपन अध्यक्षीय संबोधन मे जीतिया उत्सवक महत्व पर प्रकाश देलीह। विराटनगर मे लगातार दोसर वर्ष आयोजित एहि उत्सव केँ निरन्तरता प्रदान करैत अपन पहिचान केँ राष्ट्रीय स्तर धरि पहुँचेबाक काज देव महिला समाज आ समस्त देव समाज द्वारा कयल जायत, ओ वचनबद्धता प्रकट केलीह। अपन मैथिली भाषा आ मिथिलाक सभ्यताक भरपूर गुणगान करैत नव पीढी मे एहि तरहक उत्सव सँ जुड़ाव उत्पन्न होयबाक भाव लगभग प्रत्येक वक्ता रखने रहथि। 
कार्यक्रमक दोसर सत्र मे गायक वीरेन्द्र झा, मुनचुन देव, सिन्धु देव, संगीता देव आदिक भव्य गीत सभक प्रस्तुति भेल छल। देव समाज केर कइएक बौआ आ बुच्ची सब अपन-अपन नृत्य सँ दर्शक सभक मन मोहि लेलनि। तहिना जीतियाक गीत सेहो समाजहि केर महिला लोकनि मिलिकय रम्भा देवक अगुवाई मे गओलनि। एहि सत्रक संचालन श्री पुरुषोत्तम चौधरी तथा श्रीमती चित्रलेखा देव द्वारा कयल गेल छल। मैथिलीक हास्य सम्राट अद्भुतानन्द द्वारा मनोरंजनक संग-संग अपन संस्कृति आ सभ्यता सँ सदिखन जुड़िकय रहबाक सन्देश सेहो देल गेल छल। कुल तीन पारी मे अद्भुतानन्दक प्रस्तुति सँ उपस्थित जनमानस हँसैत-हँसैत लोटपोट त भेबे केलाह, हुनकर कहल महत्वपूर्ण वचनामृत पाबि ओ सब कृतज्ञताक भाव मे सेहो देखेलाह। कार्यक्रमक अन्त सहभोज सँ कयल गेल छल। आयोजक लोकनिक उत्साह आ समर्पण समाजक सब वर्ग लेल अनुकरणीय छल। कार्यक्रमक संयोजन आ तैयारी मे दिन-राति खटनिहार भास्कर चौधरी सहित कतेको रास युवा लोकनिक व्यवस्थापनक जतेक प्रशंसा कयल जाय से कम होयत। अभिभावक वर्ग मे फूल कुमार देव सहित पूरे देव समुदायक घरही प्रतिनिधिक उपस्थिति आ एकजूटता सच मे सभक लेल अनुकरणीय शिक्षा बुझाइत अछि। एहि कार्यक्रम मे उपस्थित विशाल संख्या आ दर्शकक सौम्यता एहि बात केँ सिद्ध करैत अछि जे देव समुदाय मिथिलाक एक बुद्धिजीवी समुदाय हेबाक संग-संग अपन भाषा आ संस्कृति लेल सेहो काफी आगाँ छथि। 
