रवि कुमार मंडल, मुम्बई। २३ जून २०१९. मैथिली जिन्दाबाद!!
मैथिल समाज सेवा संस्था द्वारा काल्हि २२ जून २०१९ तदनुसार शनि दिन आयोजित तेसर १०वीं ओ १२वीं कक्षाक छात्र-छात्रा सभक वास्ते उच्च शिक्षा सम्बन्धी परामर्श सभा राखल गेल छल। जाहि मे विज्ञ शिक्षाविद् लोकनि उपस्थित छात्र-छात्रा ओ अभिभावक लोकनि सँ १०वीं आ १२वीं कक्षाक बाद कोन विषय, कोन संकाय आ केहेन शिक्षण संस्थान केँ प्राथमिकता दैत आगू पढबाक चाही, बच्चा सब मे बहुमूखी प्रतिभाक विकास कोना होयत, पढाई सँ इतर आर व्यक्तित्व विकास लेल कि-कि उपाय अपनेबाक चाही, एहि सब विषय पर सारगर्भित विचार रखने छलाह। सत्र मे प्रश्न आ उत्तर सेहो राखल गेल छल।
१०वीं आ १२वीं केर बच्चा सब द्वारा प्राप्त कयल गेल उत्कृष्ट लब्धांक वास्ते हुनका लोकनिक सत्कार समारोह केर आयोजन मुबंई केर मीरा रोड के माउली हाॅल मे सम्पन्न भेल। ई सभा विशेष रूप सँ मैथिल छात्र-छात्रा आ अभिभावक केँ समेटिकय राखल गेल छल जाहि मे विज्ञजन लोकनि सेहो एक सँ बढिकय एक चिकित्सक, चार्टर्ड एकाउन्टेन्ट, एडवोकेट, प्राध्यापक, न्यायाधीश आ आइपीएस-आइएएस सब अपन अनुभव आ उत्साह बढाबयवला विचार रखलनि। ई सब लोकनि अपन अपन वक्तव्य सॅ बच्चा सब केँ समझेलैन। मुख्य अतिथिक रूप मे विधायक नरेंद्र मेहता छलाह। आयोजनकर्ता ललित झा आ हुनकर टीम छल। ललित झा स्वयं एक जानल-मानल चार्टर्ड एकाउन्टेन्ट आ मैथिली-मिथिलाक सर्वथा हित लेल प्रखर समाजसेवी सेहो छथि। एहि अवसर पर आयोजक संग मुम्बई केर विभिन्न संस्थाक गणमान्य नेतृत्वकर्ता, कलाकार, रंगकर्मी आ अभियन्ता लोकनिक उपस्थिति सेहो छल।
